ആക്ഷന്‍ ഹീറോ ബിജു എന്ന ഹിറ്റ് ചിത്രത്തിനു ശേഷം കാളിദാസ് ജയറാമിനെ നായകനാക്കി എബ്രിഡ് ഷൈന്‍ സംവിധാനം ചെയ്യുന്ന ചിത്രമാണ് 'പൂമരം. തികച്ചും ക്യാമ്പസ് പശ്ചാത്തലത്തില്‍ ഒരുങ്ങുന്ന ചിത്രത്തിന്റെ ചിത്രീകരണം ഈ മാസം ആരംഭിക്കും.

എബ്രിഡ് ഷൈനിന്റെ മറ്റു രണ്ടു ചിത്രങ്ങളായ 1983, ആക്ഷന്‍ ഹീറോ ബിജു എന്നീ ചിത്രങ്ങളിലേതിനു സമാനമായി നിവിന്‍ പോളി തന്നെയായിരിക്കും ഈ ചിത്രത്തിലും നായകനെന്ന് നേരത്തെ റിപ്പോര്‍ട്ടുകള്‍ പുറത്തു വന്നിരുന്നു. എന്നാല്‍ കാളിദാസ് ജയറാം തന്റെ ഫെയ്‌സ് ബുക്ക് പേജില്‍ താനാണ് ചിത്രത്തിലെ നായകനെന്ന വാര്‍ത്ത പങ്ക് വച്ചതോടുകൂടി അഭ്യൂഹങ്ങള്‍ക്കെല്ലാം വിരാമമായി.

ജയറാം നായകനായെത്തിയ കൊച്ചു കൊച്ചു സന്തോഷങ്ങള്‍ എന്ന സിനിമയില്‍ ബാലതാരമായെത്തിയാണ് കാളിദാസ് സിനിമാ ലോകത്ത് എത്തിയത്. ഈ ചിത്രത്തിലെ അഭിനയത്തിന് കാളിദാസനെ തേടി ദേശീയ പുരസ്‌കാരവുമെത്തിയിരുന്നു. ഏതായാലും പൂമരത്തിലൂടെ മലയാളത്തിലാദ്യമായി നായകവേഷം ചെയ്യുന്ന ത്രില്ലിലാണ് കാളിദാസ്.