ഈ വര്‍ഷത്തെ ജെ.സി ദാനിയല്‍ പുരസ്‌കാരം മുതിര്‍ന്ന സംവിധായകന്‍ കെ.ജി ജോര്‍ജിന്.മലയാള സിനിമക്ക് നല്‍കിയ സമഗ്ര സംഭാവനകള്‍ കണക്കിലെടുത്താണ് അദ്ദേഹത്തെ പുരസ്‌കാരത്തിന് തിരഞ്ഞെടുത്തത്. ഗഹനമായ ജീവിതാവബോധത്തിലും ആഴമേറിയ അനുഭവങ്ങളിലുംനിന്ന് പിറക്കുന്നവയാണ് അദ്ദേഹത്തിന്റെ സിനിമകള്‍. കഠിനമായ ജീവിതയാഥാര്‍ത്ഥ്യങ്ങളുടെ സത്യസന്ധമായ ചിത്രീകരണങ്ങളെന്ന നിലയില്‍ അവ ചലച്ചിത്രലോകത്ത് വേറിട്ടുനിന്നു.

രാമു കാര്യാട്ടിന്റെ അസിസ്റ്റന്റായി മൂന്നു വര്‍ഷം ജോലി ചെയ്തു. സമകാലിക രാഷ്ട്രീയ സാമൂഹ്യ പ്രശ്‌നങ്ങളെ ആസ്പദമാക്കി ചിത്രങ്ങളെടുത്തു . 1970 കളിലെ ചലച്ചിത്രങ്ങളെ ആധുനികരിച്ച സംവിധായകരില്‍ ഒരാളാണ് ജോര്‍ജ്.

1975ല്‍ പുറത്തിറങ്ങിയ സ്വപ്നാടനമാണ് ആദ്യ ചിത്രം. ആ വര്‍ഷത്തെ മികച്ച സിനിമയ്ക്കുള്ള സംസ്ഥാന ചലച്ചിത്ര പുരസ്‌കാരം സ്വപ്നാടനം കരസ്ഥമാക്കി. 1982ല്‍ പുറത്തിറങ്ങിയ മേളയോടെയാണ് കെ.ജി ജോര്‍ജ് മുഖ്യധാരയില്‍ ചുവടുറപ്പിക്കുന്നത്. 1982ല്‍ പുറത്തിറങ്ങിയ യവനികയാണ് കെ.ജി ജോര്‍ജിന്റെ ഏറ്റവും പ്രശസ്തമായ സിനിമ.ഒക്ടോബര്‍ 15ന് പുരസ്‌കാരം സമ്മാനിക്കും.