പണത്തിന് വേണ്ടി കണ്ട അലവലാതി സിനിമകളില്‍ അഭിനയിക്കില്ലെന്ന് നിത്യാമേനോന്‍. ഇതോടെ ഇക്കൂട്ടര്‍ തന്നെ അഹങ്കാരിയായി ചിത്രീകരിക്കുകയാണെന്ന് താരം പറഞ്ഞു. നടിയാകുമെന്ന് താന്‍ സ്വപ്നത്തില്‍ പോലും വിചാരിച്ചിരുന്നില്ലെന്ന് താരം പറഞ്ഞു. സാമൂഹ്യപ്രവര്‍ത്തനമായിരുന്നു ലക്ഷ്യം.പക്ഷെ, കാലം സിനിമാ നടിയാക്കി. പലരും തനിക്ക് തലക്കനമാണെന്നും പറഞ്ഞ് പരത്തുന്നുണ്ട്. ഇതുകൊണ്ടൊന്നും നിലപാട് മാറ്റില്ലെന്ന് താരം പറഞ്ഞു. സിനിമയില്‍ അഭിനയിക്കണമെന്ന് നിര്‍ബന്ധമില്ല. രുദ്രമാദേവിയില്‍ ചെറിയ വേഷമാണ് ലഭിച്ചത്. നല്ലതായത് കൊണ്ടാണ് അത് സ്വീകരിച്ചത്.

ഇന്നത്തെ യുവതലമുറയിലെ കുട്ടികളില്‍നിന്നും താരങ്ങളില്‍നിന്നും വ്യത്യസ്തയാണ് നിത്യമേനോന്‍. ആത്മീയതയില്‍ വിശ്വസിക്കുകയും സോഷ്യല്‍മാധ്യമങ്ങളെ എതിര്‍ക്കുകയും ചെയ്യുന്നു. ധാരാളം പരാതികള്‍ കേട്ടുവെങ്കിലും വളരെ കുറച്ചുമാത്രം മൊബൈല്‍ഫോണ്‍ ഉപയോഗിക്കാന്‍ ആണ് നിത്യക്കിഷ്ടം. വറുതെ സമയം കൊല്ലികളാണ് ഈ സോഷ്യല്‍മാധ്യമങ്ങള്‍ എന്ന അഭിപ്രായക്കാരിയാണ് താരം. ഇപ്പോള്‍ തെലുങ്കുനടന്‍ വെങ്കിടേഷുമായുള്ള ഒരു ചിത്രത്തിന്റെ കരാറില്‍ ഒപ്പിട്ടുകഴിഞ്ഞു. മലയാളത്തില്‍ അഞ്ജലിമേനോന്റെ സിനിമയില്‍ അഭിനയിക്കാനാണ് താരത്തിനിഷ്ടം.

ജൂനിയര്‍ എന്‍.ടി ആറിന്റെ നായികയായി അഭിനയിച്ച ജനതാ ഗ്യാരേജ് തെലുങ്കില്‍ സൂപ്പര്‍ഹിറ്റായി ഓടുകയാണ്. ചിത്രം 100കോടി ക്ലബില്‍ ഇടം നേടി. മലയാളത്തില്‍ ദുല്‍ഖറാണ് തന്റെ ഇഷ്ടനടനെന്ന് താരം പറഞ്ഞു. താമസിക്കാതെ ദുല്‍ഖറിനൊപ്പം ഒരു സിനിമ ചെയ്യും. 100 ഡേയ്സ് ഓഫ് ലവിന്റെ തെലുങ്ക് പതിപ്പ് അടുത്തിടെ ഇറങ്ങിയെങ്കിലും വേണ്ടത്ര ശ്രദ്ധിക്കപ്പെട്ടില്ല.