ജിത്തുജോസഫിന്റെ സിനിമയിലൂടെ പ്രണവ് മോഹന്‍ലാല്‍ നായകനാകുന്നു. ആന്റണി പെരുമ്പാവൂരാണ് ചിത്രം നിര്‍മിക്കുന്നത്. ഫെയ്‌സ് ബുക്ക് പേജിലൂടെ മോഹന്‍ലാലാണ് ഇക്കാര്യം അറിയിച്ചത്. ദൃശ്യത്തിന് ശേഷം ആശീര്‍വാദ് ഒരുക്കുന്ന ത്രില്ലറായിരിക്കും. ദൃശ്യത്തിന്റെ തമിഴ്പതിപ്പായ പാപനാശത്തിലും ലൈഫ് ഓഫ് ജോസൂട്ടിയിലും ജിത്തുജോസഫിന്റെ അസിസ്റ്റന്റായിരുന്നു പ്രണവ്. ഇത് അഭിനയം തുടക്കം കുറിക്കാനുള്ള ചുവട് വെപ്പായിരുന്നു. മുമ്പ് ഒന്നാമനിലും സാഗര്‍ ഏലിയാസ് ജാക്കിയിലും പ്രണവ് ചെറിയ വേഷങ്ങള്‍ ചെയ്തിരുന്നു. പുനര്‍ജനി എന്ന ചിത്രത്തിലെ അഭിനയത്തിന് ബാല നടനുള്ള സംസ്ഥാന പുരസ്‌ക്കാരം പ്രണവിന് ലഭിച്ചിട്ടുണ്ട്.

മോഹന്‍ലാലിന്റെ കുടുംബത്തിലെ മൂന്നാമത്തെ അഭിനേതാവാണ് പ്രണവ്. ലാലിന്റെ ചേട്ടന്‍ പ്യാരിലാല്‍ കിളിക്കൊഞ്ചല്‍ എന്ന ചിത്രത്തില്‍ അഭിനയിച്ചിട്ടുണ്ട്. നിരവധി കഥകള്‍ കേട്ട ശേഷമാണ് പ്രണവും മോഹന്‍ലാലും ജിത്തുവിന്റെ ചിത്രത്തില്‍ അഭിനയിക്കാന്‍ തീരുമാനിച്ചത്. തുടക്കം മോശമായാല്‍ മോഹന്‍ലാലിനും നാണക്കേടാണ്. അതുകൂടി കണക്കിലെടുത്താണ് അനുഭവ സമ്പത്തുള്ള സംവിധായകന്റെ ചിത്രത്തില്‍ അഭിനയിക്കാന്‍ തീരുമാനിച്ചത്. പ്രണവിനെ വെച്ച് മുമ്പ് സിനിമ സംവിധാനം ചെയ്യാന്‍ ദുല്‍ഖര്‍ തീരുമാനിച്ചിരുന്നു. ദുല്‍ഖര്‍ അഭിനയ രംഗത്ത് കടന്ന് വന്ന ശേഷമായിരുന്നു അത്.