സത്യന്‍ അന്തിക്കാടും ദുല്‍ക്കര്‍ സല്‍മാനും ഒരു കുടുംബചിത്രത്തിനു വേണ്ടി കൈകോര്‍ക്കുന്നു. ഇതാദ്യാമായാണ് ദുല്‍ക്കര്‍ സത്യന്‍ അന്തിക്കാട് ചിത്രത്തില്‍ അഭിനയിക്കുന്നത്. കുടുംബചിത്രത്തില്‍ അഭിനയിക്കണമെന്ന തന്റെ ഏറെക്കാലത്തെ ആഗ്രഹമാണ് ഇതിലൂടെ സഫലമാകുന്നതെന്ന് ദുല്‍ക്കര്‍ പറഞ്ഞു.

'ജോമോന്റെ സുവിശേഷങ്ങള്‍' എന്നു പേരിട്ടിരിക്കുന്ന ചിത്രത്തിന്റെ രചന നിര്‍വഹിക്കുന്നത് ഇക്ബാല്‍ കുറ്റിപ്പുറമാണ്. ഒരു ഇന്ത്യന്‍ പ്രണയകഥ യുടെ തിരക്കഥയും ഇക്ബാല്‍ കുറ്റിപ്പുറത്തിന്റെതായിരുന്നു. വിന്‍സെന്റ് എന്ന വ്യവസായിയുടെയും കുടുംബത്തിന്റെയും കഥപറയുന്ന ചിത്രമാണ് ജോമോന്റെ സുവിശേഷങ്ങള്‍.

ചിത്രത്തില്‍ ധനികനായ ഒരു വ്യവസായിയുടെ മകനായാണ് ദുല്‍ക്കര്‍ എത്തുന്നത്. ചിത്രത്തില്‍ വിന്‍സെന്റായി എത്തുന്നത് മുകേഷാണ്.  വളരെയധികം പുതുമയും നന്മയുമുള്ള ചിത്രമായിരിക്കും 'ജോമോന്റെ സുവിശേഷങ്ങള്‍' എന്ന് ചിത്രത്തിന്റെ സംവിധായകന്‍ സത്യന്‍ അന്തിക്കാട് പറഞ്ഞു.

ചിത്രത്തില്‍ രണ്ടു നായികമാരാണ്. പ്രേമത്തിലൂടെ തിളങ്ങിയ അനുപമ പരമേശ്വരനാണ് ഒരു നായിക. കാക്ക മുട്ടൈ, ധര്‍മദുരൈ എന്നീ ചിത്രങ്ങളിലൂടെ ശ്രദ്ധേയായ നടി ഐശ്വര്യ രാജേഷ് ആണ് മറ്റൊരു നായിക. നിവിന്‍ പോളി-സിദ്ധാര്‍ത്ഥ് ശിവ ചിത്രത്തിലും നായികയായി തീരുമാനിച്ചിരുന്നത് ഐശ്വര്യയെയാണ്.

തമിഴ്‌നടന്‍ മനോബാലയും ചിത്രത്തില്‍ പ്രധാനവേഷത്തില്‍ എത്തുന്നു. ദുല്‍ക്കറിന്റെ സഹോദരനായി വിനു മോഹനാണ് എത്തുന്നത്. സേതു മണ്ണാര്‍ക്കാട് ഫുള്‍മൂണ്‍ സിനിമയുടെ ബാനറില്‍ നിര്‍മ്മിക്കുന്ന ചിത്രത്തില്‍ ഇന്നസെന്റ്,ഇര്‍ഷാദ്,ജേക്കബ് ഗ്രിഗറി,മുത്തുമണി, ഇന്ദു തമ്പി, രസ്‌ന എന്നിവരും താരങ്ങളാണ്.

വിദ്യാസാഗറാണ് സംഗീത സംവിധാനം. എസ് കുമാറാണ് ഛായാഗ്രഹണം. ക്രിസ്മസ് റിലീസായി ചിത്രം തിയറ്ററുകളിലെത്തും. ചിത്രീകരണം തൃശൂരില്‍ പുരോഗമിക്കുകയാണ്.