സമീപകാലത്തിറങ്ങിയ സിനിമകളില്‍ വളരെയധികം പ്രക്ഷകപിന്തുണ നേടിയ ചിത്രമായിരുന്നു അനുരാഗ കരിക്കിന്‍ വെള്ളം. ആസിഫ് അലി, രജിഷ വിജയന്‍, ബിജു മേനോന്‍ തുടങ്ങിയവര്‍ അഭിനയിച്ച ചിത്രം തിയറ്ററുകളിലും നല്ല ചലനമുണ്ടാക്കി.

കഴിഞ്ഞ ജൂലൈ 7 നാണ് ചിത്രം റിലീസ് ചെയ്തത്. എന്നാല്‍ റിലീസ് ചെയ്ത് ഇത്രയും നാള്‍ ഇല്ലാത്ത പ്രശ്‌നങ്ങളാണ് ചില സാമൂഹിക വിരുദ്ധര്‍ ഈ ചിത്രത്തിനെ പറ്റി ഇപ്പോള്‍ പടച്ചുവിട്ടിരിക്കുന്നത്. ചിത്രത്തിന്റെ ക്ലൈമാക്‌സിലെ ചുംബനരംഗമാണ് ഇപ്പോള്‍ വിവാദം തൊടിത്തുവിട്ടിരിക്കുന്നത്. രജിഷ വിജയനും ആസിഫ് അലിയുമാണ് ചുംബനരംഗത്തില്‍ അഭിനയിച്ചിരിക്കുന്നത്.

ഇൗ രംഗത്തിന്റെ സ്‌ക്രീന്‍ഷോട്ട് എടുത്ത്  അസഭ്യ കമന്റുകളോടെ  വാട്‌സ് ആപ്പില്‍ പ്രചരിപ്പിക്കുകയാണ് ഈ സാമൂഹിക വിരുദ്ധരുടെ ഇപ്പോഴത്തെ പണി. ഏതായാലും സംഭവം ചൂടു പിടിച്ചിചിരിക്കുകയാണ്.

സംഭവത്തെക്കുറിച്ച് ചിത്രത്തിന്റെ അണിയറപ്രവര്‍ത്തകര്‍ പ്രതികരിക്കുന്നതിങ്ങനെ..

''ഞാന്‍ കമ്മിറ്റഡായ ഒരു ആക്ടറാണ്. സംവിധായകന്‍ പറയുന്നതുപോലെ അഭിനയിക്കുകയെന്നതാണു നടന്റെ കടമ. ബാക്കിയൊക്കെ ആളുകള്‍ ഓരോന്നു സങ്കല്‍പിച്ചെടുക്കുന്നതല്ലേ. നമുക്ക് എന്തു ചെയ്യാന്‍ പറ്റും? ആളുകള്‍ ഇത്തരത്തില്‍ പ്രചരിപ്പിക്കുന്നതില്‍ നല്ല വിഷമമുണ്ട്''-ആസിഫ് അലി

''അമ്പമ്പോ...കഷ്ടം തന്നെ ചേട്ടന്മാരെ നിങ്ങളുടെ കാര്യം! എന്തായാലും നന്നായിട്ടുണ്ട്. ഇനിയുള്ള കാലവും ഇങ്ങനെത്തന്നെ മുന്നോട്ടുപോകണം. സിനിമയിലല്ല, ഇതൊക്കെ ഇത്തരത്തില്‍ കാണുന്നവരുടെ കണ്ണിലാണ് അശ്ലീലം. കൂട്ടുകാരന്റെ പെങ്ങളുടെ പടത്തിനു താഴെ പോലും വൃത്തികെട്ട കമന്റുകള്‍ എഴുതിച്ചേര്‍ത്തവരുടെ നാടാണല്ലോ ഇത്. ഒരദ്ഭുതവുമില്ല. ഇതൊന്നും തമാശയായി എനിക്കു തോന്നുന്നേയില്ല. മലയാളിയുടെ മാനസികാവസ്ഥ എന്തുമാത്രം മോശമായിരിക്കുന്നുവെന്നതിന്റെ തെളിവാണിത്. ഒരുപണിയുമില്ലാതെ ഓരോന്നൊക്കെ പടച്ചുവിടുന്നതു മാനസിക രോഗം തന്നെയല്ലേ? ഇതു പ്രചരിപ്പിക്കുന്നവരെങ്കിലും ചെയ്യുന്നതു ശരിയാണോ എന്നു ചിന്തിക്കണ്ടേ? അഭിനേതാക്കള്‍ പൊതുസ്വത്താണെന്നാണോ ഇവരുടെയൊക്കെ വിചാരം?'' - തിരക്കഥാകൃത്ത് നവീന്‍ ഭാസ്‌കര്‍

മുമ്പ് ചാപ്പാ കുരിശ് എന്ന ചിത്രത്തിനും ഇതേ പ്രശ്‌നം അഭിമുഖീകരിക്കേണ്ടി വന്നിരുന്നു.