തന്റെ ലൂസിഫറിനെക്കുറിച്ച് പൃഥ്വി തുറന്നുപറയുന്നു. മുരളി ഗോപിയുടെ തിരക്കഥയിലാണ് പൃഥ്വി തന്റെ ആദ്യ സിനിമ സംവിധാനം ചെയ്യുമെന്ന് അറിയിച്ചത്. വലിയ വാര്‍ത്താപ്രാധാന്യം നേടിയ പ്രോജക്ടിനെക്കുറിച്ച് പുതുതായി ഒരു കാര്യം പങ്കുവെക്കുകയാണ് പൃഥ്വി ഇപ്പോള്‍.
ചിത്രത്തിന്റെ ഫസ്റ്റ്‌ലുക്ക് എന്ന പേരില്‍ പ്രചരിക്കുന്ന മോഹന്‍ലാലിന്റെ ചിത്രം 'ലൂസിഫറി'ന്റേതല്ലെന്ന് പറയുന്നു പൃഥ്വി.
പൃഥ്വി പറയുന്നു..
ഈ പോസ്റ്റ്, 'ലൂസിഫര്‍' എന്ന എന്റെ ആദ്യത്തെ സംവിധാന സംരംഭത്തെ കുറിച്ചാണ്. ആദ്യം തന്നെ ഒരായിരം നന്ദി! ഇതിനോടകം എനിക്ക് ലഭിച്ച സ്‌നേഹത്തിനും ഇങ്ങനെ ഒരു തീരുമാനത്തിന് നല്‍കിയ പ്രോഹത്സാഹനത്തിനും. നിങ്ങളുടെ ആവേശം തന്നെ ആണ് ഈ സിനിമയുടെ ഏറ്റവും വലിയ ശക്തി! എന്നാല്‍... 'ലൂസിഫര്‍' എന്ന സിനിമയുടെ ഇന്നേ വരെ ഇറങ്ങിയ 'ഫസ്റ്റ് ലുക്കുകളും', 'ട്രെയിലറുകളും', 'മോഷന്‍ പോസ്റ്ററുകളും' ഒന്നും തന്നെ ആ സിനിമയുടെ യഥാര്‍ത്ഥ കഥയെയോ കഥാപാത്രത്തെയോ ആസ്പദം ആക്കി ഉള്ളതല്ല. അവ എല്ലാം തികച്ചും അണ്ണോഫിഷ്യല്‍ ആയ ആരാധക സൃഷ്ടികളാണ്. നിരുത്സാഹപ്പെടുത്തുക അല്ല..അവയില്‍ പലതും കലാബോധവും മൂല്യവും ഉള്ളവയാണ്..പക്ഷെ എന്റെ സിനിമയുമായി ഒരു തരത്തിലും ബന്ധമുള്ളതല്ല എന്ന് മാത്രം! 'ലൂസിഫര്‍' ന്റെ പ്രാരംഭ ഘട്ട ചര്‍ച്ചകളില്‍ ആണ് നമ്മള്‍ ഇപ്പോള്‍. ഇനിയും ഒരുപാട് സഞ്ചരിക്കേണ്ടിയിരിക്കുന്നു ലാലേട്ടന്‍ എന്ന സൂപ്പര്‍ സ്റ്റാറും മഹാനടനും അരങ്ങു വാഴുന്ന ആ സിനിമയുടെ സാക്ഷാത്കാരത്തിലേക്കു എത്താന്‍. ഈ യാത്രയില്‍ എന്നോടൊപ്പം നിങ്ങളും ഉണ്ടാവും എന്ന പ്രതീക്ഷയില്‍.. 
പൃഥ്വിരാജ് 
അന്തരിച്ച സംവിധായകന്‍ രാജേഷ് പിള്ളയ്ക്കുവേണ്ടി ഇതേ പേരില്‍ എഴുതാനിരുന്ന പ്രോജക്ട് ഇതല്ലെന്നും തീമില്‍ മാത്രമേ സാമ്യമുള്ളുവെന്നും മുരളിഗോപി പ്രോജക്ടിനെക്കുറിച്ച് പറഞ്ഞിരുന്നു. 'ടിയാന്‍', 'കമ്മാരസംഭവം' എന്നീ സിനിമകള്‍ക്ക് ശേഷമുള്ള മുരളിഗോപിയുടെ തിരക്കഥയാണ് ലൂസിഫറിന്റേത്‌