മോഹന്‍ലാല്‍വൈശാഖ് ടീമിന്റെ പുലിമുരുകന്‍ കണ്ടവര്‍, ജൂലി എന്ന കഥാപാത്രത്തെ ഒരിക്കലും മറക്കില്ല. തെന്നിന്ത്യന്‍ താരം നമിതയുടെ ഗംഭീരതിരിച്ചുവരവ് കൂടിയായിരുന്നു ജൂലി എന്ന കഥാപാത്രം. മോഹന്‍ലാലിനൊപ്പമുള്ള അഭിനയഅനുഭവത്തെക്കുറിച്ച് നമിത പറയുന്നു. 
നല്ലൊരു ചിത്രത്തിനായാണ് ഇത്രനാളും കാത്തിരുന്നതെന്നും പുലിമുരുകന്റെ തിരക്കഥ കേട്ട ഉടന്‍ തന്നെ ചിത്രത്തില്‍ അഭിനയിക്കാന്‍ തീരുമാനിക്കുകയായിരുന്നുവെന്നും നമിത പറയുന്നു. താന്‍ ശരിയായ തീരുമാനമാണ് എടുത്തതെന്നും സിനിമയുടെ വിജയത്തില്‍ അതിയായ സന്തോഷവുമുണ്ടെന്നും നമിത പറഞ്ഞു. മോഹന്‍ലാല്‍ എന്ന നടന്‍ നമുക്ക് എല്ലാവര്‍ക്കും സൂപ്പര്‍സ്റ്റാറാണ്. പക്ഷേ അധികമാര്‍ക്കും അറിയാത്തൊരു മുഖം അദ്ദേഹത്തിനുണ്ട്. വളരെ ഇന്റലെക്ച്വലാണ് അദേഹം. ഒരുപാട് പുസ്തകങ്ങള്‍ വായിക്കുന്ന ആളാണ്. പുലിമുരുകന്‍ സിനിമയില്‍ മോഹന്‍ലാലിന് പകരം വയ്ക്കാന്‍ മറ്റൊരു നടനില്ല. ആ കഥാപാത്രമായി അദേഹം ജീവിക്കുകയായിരുന്നുനമിത പറഞ്ഞു.
ചിത്രത്തിന്റെ ലൊക്കേഷനില്‍ വച്ച് നമിത മോഹന്‍ലാലിനൊപ്പം എടുത്ത ഒരു സെല്‍ഫി സോഷ്യല്‍ മീഡിയയില്‍ നേരത്തെ ഹിറ്റായിരുന്നു. ആ സെല്‍ഫി എടുത്തതിനെക്കുറിച്ച് നമിത പറയുന്നു:
അദ്ദേഹത്തിനൊപ്പം ഒരു സെല്‍ഫി എടുക്കാന്‍ ധൈര്യമില്ലായിരുന്നു. എങ്ങനെയായിരിക്കും മോഹന്‍ലാലിന്റെ പ്രതികരണം എന്നു അറിയില്ലല്ലോ? എന്നാല്‍ എന്നെ അത്ഭുതപ്പെടുത്തി അദ്ദേഹം സെല്‍ഫി എടുക്കാന്‍ സന്തോഷത്തോടെ അരികിലെത്തുകയായിരുന്നു. ശരിക്കും പേടിച്ചാണ് ചെന്നത് എന്നാല്‍ താരം തന്നെ ചേര്‍ത്തു നിര്‍ത്തി. ആ സെല്‍ഫി ഇത്രയധികം ലൈക്കുകള്‍ നേടുമെന്ന് കരുതിയിരുന്നില്ലെന്നും നമിത കൂട്ടിച്ചേര്‍ത്തു.