സത്യസായി ബാബയായി ദിലീപിന് പകരം മലയാളത്തിലെ യുവനടന്‍ ശ്രീജിത്ത് വിജയ് അഭിനയിക്കുമെന്ന് റിപ്പോര്‍ട്ട്. നടന്‍ ദിലീപ് അഭിനയിക്കേണ്ടിയിരുന്ന വേഷമാണ് ശ്രീജിത്ത് വിജയ്ക്ക് ലഭിച്ചിരിക്കുന്നത്. 
മറ്റ് പ്രോജക്റ്റുകളുടെ തിരക്കുള്ളതിനാല്‍ സായ് ബാബയ്ക്ക് ആവശ്യമായ നൂറ്റന്‍പതോളം ദിവസങ്ങള്‍ ദിലീപിന് മാറ്റിവയ്ക്കാനില്ല. ഇതിനാല്‍ ദിലീപ്, ചിത്രത്തില്‍ നിന്ന് പിന്‍മാറിയെന്നാണ് റിപ്പോര്‍ട്ടുകള്‍. ദിലീപ് തന്റെ കരിയറിലെ ഏറ്റവും ഉയര്‍ന്ന പ്രതിഫലമാണ് വാങ്ങുന്നതെന്ന് റിപ്പോര്‍ട്ടുകളുണ്ടായിരുന്നു. 
എന്നാല്‍ മറ്റുചില കുഴപ്പങ്ങളുണ്ടെന്നും പറഞ്ഞുകേള്‍ക്കുന്നു. കാരണം ദിലീപ് വല്ലാതെ മോഹിച്ച കഥാപാത്രമായിരുന്നു അത്. അതിന്റെ ത്രില്ലിനെക്കുറിച്ച് താരം പലയിടത്തും പറയുകയും ചെയ്തിരുന്നു. തെലുങ്ക്, മലയാളം, തമിഴ്, ഹിന്ദി ഭാഷകളിലായി പ്രമുഖ ടോളിവുഡ് സംവിധായകന്‍ കോടി രാമകൃഷ്ണ ഒരുക്കുന്ന ചിത്രത്തില്‍ അനുഷ്‌ക ഷെട്ടി നായികയാകുമെന്നാണ് റിപ്പോര്‍ട്ടുകള്‍. നായകന്‍ മാറിയ സാഹചര്യത്തില്‍ നായികയും മാറുമോ എന്നത് അണിയറക്കാര്‍ വ്യക്തമാക്കിയിട്ടില്ല. 
മലയാളത്തിലും തമിഴിലുമായി പതിനഞ്ചോളം ചിത്രങ്ങളില്‍ അഭിനയിച്ച ശ്രീജിത്ത് വിജയ്യുടെ ശ്രദ്ധേയമായ മലയാള ചിത്രം രതിനിര്‍വേദത്തിന്റെ റീമേയ്ക്കാണ്.