മറ്റ് സിനിമകളില് ആന്റണി പെരുമ്പാവൂര് അഭിനയിക്കുന്നത് മോഹന്ലാല് വിലക്കി
മോഹന്ലാലിന്റെ കമലദളം മുതലുള്ള പല സിനിമകളിലും ആന്റണി പെരുമ്പാവൂര് അഭിനയിച്ചിട്ടുണ്ട്. ഹരികൃഷ്ണന്സ്, അലീഭായി, ദൃശ്യം, ഒപ്പം, പുലിമുരുകന് എന്നീ ചിത്രങ്ങളിലൊക്കെ ചെറുതും ശ്രദ്ധിക്കപ്പെടുന്നതുമായ വേഷങ്ങള് ആന്റണി ചെയ്തിട്ടുണ്ട്. ഇതോടെ പലരും ആന്റണിയെ അഭിനയിക്കാന് വിളിച്ചു. എന്നാല് തന്റേതല്ലാത്ത സിനിമകളില് അഭിനയിക്കേണ്ടെന്ന് മോഹന്ലാല് ആന്റണിയോട് പറഞ്ഞു. മോഹന്ലാല് തന്നെയാണ് ഇക്കാര്യം വെളിപ്പെടുത്തിയത്. പലപ്പോഴും ലാലിന്റെ നിര്ബന്ധപ്രകാരമാണ് ആന്റണി അഭിനയിക്കുന്നത്. ദൃശ്യത്തിലെ പൊലീസുകാരന്റെ വേഷവും അങ്ങനെയായിരുന്നു.
പട്ടണപ്രവേശം എന്ന സിനിമയുടെ ലൊക്കേഷനില് വെച്ചാണ് ആന്റണി പെരുമ്പാവൂരിനെ മോഹന്ലാല് പരിചയപ്പെടുന്നത്. ഒരു സിനിമയുടെ സെറ്റില് താല്ക്കാലിക ഓട്ടം പോയതായിരുന്നു ആന്റണി. പിന്നീട് മൂന്നാംമുറയുടെ ലൊക്കേഷനില് സുഹൃത്തുക്കളുമൊത്ത് മോഹന്ലാലിനെ കാണാന് ചെന്ന ആന്റണിയോട് തന്റെ ഡ്രൈവറാകാന് മോഹന്ലാല് ക്ഷണിക്കുകയായിരുന്നു. പിന്നീട് മോഹന്ലാലിന്റെ മാനേജരായ ആന്റണി 2000ല് നരസിംഹം എന്ന സിനിമ നിര്മിച്ചു. ചിത്രം സൂപ്പര്ഹിറ്റായി. പിന്നീട് ഇങ്ങോട്ട് പതിനഞ്ചോളം മോഹന്ലാല് ചിത്രങ്ങള് ആന്റണി നിര്മിച്ചു. ദൃശ്യമാണ് ഏറ്റവും വലിയ ഹിറ്റ്.
ഇപ്പോള് മോഹന്ലാലിന്റെ മകന് പ്രണവിനെ നായകനാക്കി സിനിമ നിര്മിക്കാനുള്ള ഒരുക്കത്തിലാണ് ആന്റണി. മുമ്പ് മമ്മൂട്ടിയെയും മോഹന്ലാലിനെയും നായകന്മാരാക്കി ഹലോ മായാവി എന്നൊരു സിനിമ നിര്മിക്കാന് ആന്റണി ആലോചിച്ചെങ്കിലും നടന്നില്ല. രജനികാന്തിന്റെ കബാലിയുടെ കേരളത്തിലെ അവകാശം നേടിയാണ് ആന്റണി തന്റെ ബാനറായ ആശീര്വാദിന്റെ മാറ്റ് കൂട്ടിയത്. പ്രണവിന്റെ ആദ്യ സിനിമയും അതുപോലെയായിരിക്കുമെന്ന് ആന്റണി വിശ്വസിക്കുന്നു.
https://www.facebook.com/Malayalivartha
