ശ്രീനിവാസന്റെ സൂപ്പര്‍ഹിറ്റ് ചിത്രം വടക്കുനോക്കിയന്ത്രത്തിന്റെ രണ്ടാംഭാഗം  വരുന്നു. ശ്രീനിവാസന്റെ കഥയില്‍ മകന്‍ വിനീതാണ് അഭിനയിക്കുന്നത്. ചിത്രത്തിന്റെ കഥാചര്‍ച്ചകള്‍ പുരോഗമിക്കുന്നേയുള്ളൂ. കൂടുതല്‍ വിവരങ്ങള്‍ പറയാന്‍ അണിയറ പ്രവര്‍ത്തകര്‍ തയ്യാറായില്ല. തളത്തില്‍ ദിനേശന്റെ മകനായി വിനീത് അഭിനയിക്കുന്നു എന്ന പ്രത്യേകതയുണ്ട്. വടക്ക്‌നോക്കിയന്ത്രം കലപരമായും വാണിജ്യപരമായും വലിയ വിജയമായിരുന്നു. ശ്രീനിവാസനും പാര്‍വതിയും അഭിനയിച്ച സിനിമയിലെ ഡയലോഗ് ഇന്ന് ട്രോളുകളില്‍ വരെ ഉപയോഗിക്കുന്നുണ്ട്. സ്‌കിസോഫ്രീനിയ ബാധിച്ച യുവാവിന്റെ കഥയായിരുന്നു വടക്ക്‌നോക്കിയന്ത്രം.

മകന്റെ അച്ഛന്‍ എന്ന സിനിമയിലാണ് ശ്രീനിവാസനും വിനീതും ആദ്യമായി അഭിനയിച്ചത്. ചിത്രം സൂപ്പര്‍ഹിറ്റായിരുന്നു. വിനീത് സംവിധാനം ചെയ്ത മലര്‍വാടി, തട്ടത്തിന്‍ മറയത്ത് തുടങ്ങിയ സിനിമകളില്‍ ശ്രീനിവാസന്‍ അഭിനയിച്ചിട്ടുണ്ട്. അടുത്ത ഒരു വര്‍ഷം അഭിനയത്തിനായി മാറ്റിവച്ചിരിക്കുകയാണെന്ന് വിനീത് ഫെയിസ്ബുക്കിലൂടെ അറിയിച്ചിരുന്നു. ശ്രീനിവാസന്‍ പ്രിയദര്‍ശന്റെ പൃഥ്വിരാജ് ചിത്രത്തിനും സത്യന്‍ അന്തിക്കാട് ചിത്രത്തിനും തിരക്കഥ എഴുതുന്നുണ്ട്. അതിന് മുന്‍പായി വടക്ക്‌നോക്കിയന്ത്രത്തിന്റെ രണ്ടാംഭാഗം വരുമെന്ന് അറിയുന്നു. ശ്രീനിവാസന് വളരെ വേണ്ടപ്പെട്ട ഒരു നിര്‍മാതാവിനെ സഹായിക്കാനാണ് ചിത്രം ഒരുക്കുന്നത്.