രണ്‍ജി പണിക്കര്‍ക്ക് തിരക്കോട് തിരക്കാണ്. അതിനിടയിലാണ് സൂര്യ ടി.വിയില്‍ അണിയറ എന്ന പ്രോഗ്രാം അവതരിപ്പിക്കുന്നത്. അവതരണ ശൈലി കൊണ്ട് പ്രേക്ഷകരെ ആകര്‍ഷിക്കാന്‍ അദ്ദേഹത്തിന് കഴിയുന്നത് കൊണ്ട് പരിപാടിയുടെ റേറ്റിംഗ് കൂടുതലാണ്. ഒരു എപ്പിസോഡിന് ഒരു ലക്ഷം രൂപയാണ് രണ്‍ജി പണിക്കര്‍ പ്രതിഫലം വാങ്ങുന്നത്. എന്നാല്‍ കഴിഞ്ഞ മാസം ഇത് കൃത്യമായി ലഭിക്കാത്തതിനെ തുടര്‍ന്ന് അദ്ദേഹം ഷോ നടത്താതെ പിണങ്ങിപ്പോയി. ഇതേ തുടര്‍ന്ന് പ്രോഗ്രാം പ്രൊഡ്യൂസറും മറ്റും ഇടപെട്ട് അനുനയിപ്പിച്ചു. പ്രതിഫലവും നല്‍കി. ഹാപ്പിയായി പരിപാടി അവതരിപ്പിച്ച് മടങ്ങുകയും ചെയ്തു.
തിരക്കഥ എഴുതിയിരുന്ന കാലത്തേക്കാള്‍ തിരക്കാണ് രണ്‍ജിപണിക്കര്‍ക്ക് ഇപ്പോള്‍. മലയാളത്തില്‍ ഇറങ്ങുന്ന ഏതാണ്ട് 75 ശതമാനം സിനിമകളിലും അദ്ദേഹം അഭിനയിക്കുന്നുണ്ട്. 25 ലക്ഷത്തോളം രൂപയാണ് പ്രതിഫലം. യുവതലമുറയിലെ നിവിന്‍ പോളി അടക്കമുള്ള താരങ്ങളുടെയും നായികമാരുടെയും അച്ഛനാകാനും അങ്കിളാകാനും സുമുഖന്‍ രണ്‍ജിപണിക്കരാണ്. അതുകൊണ്ട് അവരെല്ലാം അദ്ദേഹത്തെ തെരഞ്ഞെടുക്കുന്നു. ഇത് കാരണം സിദ്ധിഖിനും വിജയരാഘവനും അടക്കമുള്ളവര്‍ക്ക് തിരക്ക് കുറഞ്ഞു. വിനീത് ശ്രീനിവാസന്‍, നിവിന്‍ പോളി, അജുവര്‍ഗീസ് ടീമിലെ പ്രധാന സീനിയറാണ് പണിക്കര്‍.
സിനിമാ തിരക്കുകള്‍ക്കിടയില്‍ ഷോകള്‍ക്ക് പുറമേ തിരക്കഥയെഴുത്തും രണ്‍ജിപണിക്കര്‍ നടത്തുന്നുണ്ട്. 1957ലെ കേരള രാഷ്ട്രീയത്തിന്റെ പശ്ചാത്തലത്തില്‍ കഥ പറയുന്ന തിരക്കഥ ആര് സംവിധാനം ചെയ്യുമെന്ന് തീരുമാനിച്ചിട്ടില്ല. ഷാജികൈലാസുമൊത്ത് മുമ്പ് നിരവധി ഹിറ്റുകള്‍ ഒരുക്കിയിട്ടുണ്ടെങ്കിലും കിംഗ് ആന്റ് കമ്മിഷണര്‍ പരാജയപ്പെട്ട ശേഷം ഈ കൂട്ടുകെട്ട് ഉണ്ടായിട്ടില്ല. എന്നാല്‍ ലേലത്തിന്റെ രണ്ടാം ഭാഗം മകന്‍ നിഥിന്‍ എടുക്കുന്നുണ്ടെന്ന് അറിയുന്നു. അതിന് ആര് തിരക്കഥ എഴുതുമെന്ന് തീരുമാനമായില്ല.