പേടിക്കേണ്ട പുലിമുരുകന്‍ നിങ്ങളെ സഹായിക്കും. കള്ളപ്പണം തടയുന്നതിന്റെ ഭാഗമായി കേന്ദ്രസര്‍ക്കാര്‍ 500,1000 രൂപ നോട്ടുകള്‍ പിന്‍വലിച്ചെങ്കിലും തുടര്‍ന്നും ഈ നോട്ടുകള്‍ നല്‍കിയാല്‍ 'പുലിമുരുകന്‍' സിനിമയുടെ ടിക്കറ്റുകള്‍ നല്‍കുമെന്ന് സിനിമയുടെ അണിയറക്കാര്‍ അറിയിച്ചു. പിന്‍വലിച്ച നോട്ടുകള്‍ മാറിയെടുക്കാന്‍ കേന്ദ്രസര്‍ക്കാര്‍ അനുവദിച്ച ഡിസംബര്‍ 30വരെ കേരളത്തിലെ എല്ലാ തീയറ്ററുകളിലും 500, 1000 നോട്ടുകള്‍ നല്‍കി ടിക്കറ്റുകള്‍ വാങ്ങാമെന്നും അണിയറ പ്രവര്‍ത്തകര്‍ സിനിമയുടെ ഫെയ്‌സ്ബുക്ക് പേജിലൂടെ അറിയിച്ചു.
ഇന്നലെ അര്‍ദ്ധരാത്രി മുതലാണ് 500, 1000 നോട്ടുകള്‍ പിന്‍വലിച്ച് സര്‍ക്കാര്‍ ഉത്തരവിറക്കിയത്. പെട്രോള്‍ പമ്പുകളും റീട്ടെയില്‍ ഔട്ട് ലെറ്റുകളിലും നവംബര്‍ 11 വരെ 500, 1000 രൂപയുടെ നോട്ടുകള്‍ സ്വീകരിക്കും എന്നാല്‍ ഓരോ ഇടപാടിന്റെയും വിശദമായ വിവരങ്ങള്‍ പമ്പ് ഉടമകള്‍ സൂക്ഷിച്ച് വെക്കണം. ശ്മശാനങ്ങളിലും നവംബര്‍ 11വരെ ഈ നോട്ടുകള്‍ സ്വീകരിക്കും.
ആയിരത്തിന്റെയും അഞ്ഞൂറിന്റെയും നോട്ടുകള്‍ ഡിസംബര്‍ 30നകം ബാങ്കുകളില്‍ നിന്ന് മാറ്റാന്‍ സാധിക്കാത്തവര്‍ക്ക് 2017 മാര്‍ച്ച് 31വരെ മാറ്റാന്‍ സമയം അനുവദിക്കും. ഇതിന് തിരിച്ചറിയില്‍ കാര്‍ഡ് നല്‍കുകയും വേണം. പ്രദര്‍ശനം തുടങ്ങി ഒരുമാസത്തിനുള്ളില്‍ 100 കോടി ക്ലബ്ബിലെത്തിയ പുലിമുരുകന്‍ കളക്ഷനില്‍ ഒട്ടേറെ റെക്കോഡുകളാണ് ഇതുവരെ കരസ്ഥമാക്കിയത്. ഇന്ത്യയില്‍ 325 തീയറ്ററുകളിലും ഗള്‍ഫില്‍ 56 തീയറ്ററുകളിലും പുലിമുരുകന്‍ റിലീസ് ചെയ്തിരുന്നു.