നടി ദിവ്യാ ഉണ്ണി വിവാഹബന്ധം വേര്‍പെടുത്തിയതായി അറിയുന്നു. പ്രമുഖ മാസികയ്ക്ക് നല്‍കിയ അഭിമുഖത്തിലാണ് ഇക്കാര്യം പങ്കുവച്ചത്. കൂട്ടുകാരോട് വേര്‍പിരിയുമ്പോള്‍ പോലും തനിക്ക് കരച്ചില്‍ വരുമായിരുന്നെന്ന് താരം പറയുന്നു. അങ്ങനെയുള്ള തനിക്ക് ജീവിതത്തിലെ ഏറ്റവും വലിയ വേര്‍പിരിയല്‍ നേരിടേണ്ടി വന്നു. ജീവിതാവസാനം വരെ ഒപ്പമുണ്ടാകേണ്ട ആളോടുള്ള വേര്‍പിരിയല്‍, ആരും തളര്‍ന്ന് പോകുന്ന സമയമാണ്. പക്ഷെ, തനിക്ക് തിരിച്ചുവരണമായിരുന്നെന്നും താരം പറയുന്നു. അമേരിക്കയില്‍ ഡോക്ടറായ സുധീര്‍ ശേഖര്‍ എന്ന മലയാളിയെയാണ് ദിവ്യാ ഉണ്ണി വിവാഹം കഴിച്ചത്.
കാലിടറിപ്പോയെന്ന് തോന്നിയ നിമിഷങ്ങളില്‍ നിന്ന് കൂടുതല്‍ കരുത്തോടെ തിരിച്ചുവരാനായി. ജീവിതത്തില്‍ സുഖങ്ങള്‍ മാത്രം ഉണ്ടാകണം എന്നല്ലേ നമ്മുടെ പ്രാര്‍ത്ഥന. ദുഖം കൂടി വരുമ്പോഴേ ജീവിതം പൂര്‍ണമാകൂ. ഇനിയുള്ള ജീവിതം മക്കള്‍ക്ക് വേണ്ടിയാണെന്നും താരം പറയുന്നു. അര്‍ജുന്‍, മീനാക്ഷി എന്നിവര്‍ മക്കളാണ്. കുച്ചിപ്പുടി, ഭരതനാട്യം എന്നിവയിലൂടെ ശ്രദ്ധേയയായ ദിവ്യാ ഉണ്ണി തൊണ്ണൂറുകളുടെ പകുതി മുതല്‍ മലയാള സിനിമയില്‍ സജീവമായിരുന്നു. 2002ലായിരുന്നു വിവാഹം. അതിന് ശേഷം അമേരിക്കയിലേക്ക് പോയി.
മമ്മൂട്ടി, മോഹന്‍ലാല്‍, ദിലീപ് , ജയറാം എന്നിവരുടെ നായികയായിരുന്നു ദിവ്യാ ഉണ്ണി. ഒരിക്കല്‍ പോലും ഗോസിപ്പ് കോളങ്ങളില്‍ താരം ഇടംനേടിയിരുന്നില്ല. എന്നാല്‍ എന്താണ് ജീവിതത്തിലെ തകര്‍ച്ചയ്ക്ക് കാരണമെന്ന് താരം പൂര്‍ണമായും വ്യക്തമാക്കുന്നില്ല. എണറാകുളത്ത് അച്ഛനും അമ്മയ്ക്കും ഒപ്പമാണ് താരമിപ്പോള്‍. അനുജത്തി വിദ്യാ ഉണ്ണി ബാംഗ്ലൂരിലാണ്.