സൊനാക്ഷി സിന്‍ഹ കലിപ്പിലാണ്. താരത്തിന്റെ വിവാഹം ഉറപ്പിച്ചെന്ന വാര്‍ത്തകള്‍ കഴിഞ്ഞ ദിവസം പ്രചരിച്ചതോടെയാണ് ട്വിറ്ററിലൂടെ താരം കലിപ്പ് തീര്‍ത്തത്. തന്റെ കല്യാണക്കാര്യം പാപ്പരാസികളും ഗോസിപ്പുകാരും തീരുമാനിക്കേണ്ടെന്ന് താരം ട്വീറ്റ് ചെയ്തു. കുറേ നാളായി സൊനാക്ഷി സജേദുമായി പ്രണയത്തിലാണെന്നുള്ള വാര്‍ത്തകള്‍ പ്രചരിക്കാന്‍ തുടങ്ങിയിട്ട്. പക്ഷെ, അതിനൊന്നും താരം മറുപടി പറയുകയോ, അതിനെതിരെ പ്രതികരിക്കുകയോ ചെയ്തില്ല. എന്നാല്‍ സജേദുമായുള്ള വിവാഹം ഉറപ്പിച്ചെന്നും സിനിമകളുടെ എണ്ണം കുറക്കണമെന്നുമുള്ള വാര്‍ത്തകള്‍ കഴിഞ്ഞ ദിവസം വന്നതോടെയാണ് താരം കലിപ്പിലായത്. 

തന്നെയും കുടുംബത്തെയും കൂട്ടുകാരെയും വിവാഹത്തെ കുറിച്ചും ഭാവി കാര്യങ്ങളെ കുറിച്ചും അറിയിച്ചതിന് നന്ദിയുണ്ടെന്നും താരം പരിഹസിച്ചു. അതിനൊപ്പം കൈ കൂപ്പിനില്‍ക്കുന്ന ചിഹ്നവും പോസ്റ്റ് ചെയ്തിട്ടുണ്ട്. സൊനാക്ഷിയും വ്യവസായിയായ സജേദും തമ്മില്‍ പ്രണയത്തിലാണെന്ന് ഏതാനും വര്‍ഷങ്ങളായി ബോളിവുഡില്‍ അടക്കംപറച്ചിലുണ്ട്. ഇരുവരും ഡേറ്റിംഗിലാണെന്നും പറയുന്നു. എന്നാല്‍ ഇക്കാര്യം താരമോ സജേമോ സമ്മതിച്ചിട്ടില്ല. ഇരുവരെയും പൊതുചടങ്ങുകളിലോ മറ്റൊ ഒരുമിച്ച് കണ്ടിട്ടുമില്ല. 

നൂര്‍ എന്ന ചിത്രത്തില്‍ അഭിനയിക്കുന്നതിന് മാത്രമാണ് താരം കരാര്‍ ഒപ്പിട്ടിരിക്കുന്നത്. ചിത്രത്തില്‍ സൊനാക്ഷിയുടെ പഴയ കാമുകന്‍ അര്‍ജുന്‍ കപൂറാണ് നായകന്‍. ഈ ചിത്രത്തിന് ശേഷം വിവാഹജീവിതത്തിലേക്ക് കടക്കാനുള്ള ഒരുക്കങ്ങള്‍ തുടങ്ങും. കാമുകന്റെ അഭ്യര്‍ത്ഥന മാനിച്ചാണ് അഭിനയ ജീവിതം തല്‍ക്കാലത്തേക്ക് ഉപേക്ഷിക്കുന്നതെന്നും ഇംഗ്ലീഷ് പോര്‍ട്ടലുകളില്‍ പ്രചരിക്കുന്ന വാര്‍ത്തയില്‍ പറയുന്നു. ബോളിവുഡിലെ പ്രമുഖനും ബി.ജെ.പി നേതാവുമായ ശത്രുഘ്‌നന്‍ സിന്‍ഹയുടെ മകളാണ് സൊനാക്ഷി.