മോഹന്ലാല് ആലപ്പുഴയില്
നീണ്ട കാലത്തിന് ശേഷം മോഹന്ലാല് ആലപ്പുഴയില് അഭിനയിക്കാനെത്തുന്നു. മഞ്ഞില് വിരിഞ്ഞ പൂക്കളില് അഭിനയിക്കാന് ഇന്റര്വ്യൂന് ചെന്നത് ആലപ്പുഴയിലായിരുന്നു. അന്ന് മുതല് ആലപ്പുഴയുമായും ഫാസിലുമായും നവോദയ അപ്പച്ചനുമായും ഉദയാ സ്റ്റുഡിയോയുമായും മോഹന്ലാലിന് അടുത്ത ബന്ധമാണ്. ഫാസിലിന്റെ എല്ലാ സിനിമകളിലും കുറച്ച് സീനുകള് ആലപ്പുഴയിലും ഉദയായിലും ഉണ്ടായിരിക്കും. ലൈഫ് ഈസ് ബ്യൂട്ടിഫുള് ഫാസിലിന്റെ വീട്ടിലാണ് ചിത്രീകരിച്ചത്. പടയോട്ടത്തില് അഭിനയിക്കാന് ചെന്നപ്പോള് ഉദയായിലാണ് മോഹന്ലാല് താമസിച്ചത്. ഹരികൃഷ്ണന്സിലെ പാട്ട് സീനുകളിലെ ചില ഷോട്ടുകള് എടുത്തതും ഉദയായില്.
ഇപ്പോള് ജിബുജേക്കബിന്റെ പേരിടാത്ത സിനിമയില് അഭിനയിക്കാനാണ് മോഹന്ലാല് കിഴക്കിന്റെ വെനീസില് എത്തിയത്. വെള്ളിമൂങ്ങക്ക് ശേഷം ജിബു സംവിധാനം ചെയ്യുന്ന സിനിമയാണിത്. വി.ജെ ജയിംസിന്റെ കഥക്ക് എം. സിന്ധുരാജാണ് തിരക്കഥ എഴുതിയത്. മീനയാണ് നായിക. ദൃശ്യത്തിന് ശേഷം മോഹന്ലാലും മീനയും ഒരുമിക്കുന്ന ചിത്രമാണ്. മീനയുടെ ഡേറ്റ് ക്ലാഷായതോടെയാണ് ആലപ്പുഴയിലെ ചിത്രീകരണം തുടങ്ങാന് വൈകിയത്. സഫിയ പോളാണ് ചിത്രം നിര്മിക്കുന്നത്. അതേസമയം മോഹന്ലാലിന്റെ മാസ് ചിത്രം പുലിമുരുകന് ഓണത്തിന് എത്തില്ലെന്ന് ഉറപ്പായി.
മേജര് രവിയുടെ പുതിയ ചിത്രം, വടക്കന് സെല്ഫിയുടെ സംവിധായകന് പ്രജിത്ത് എം. രഞ്ജിത്തിനായി ഒരുക്കുന്ന ബെന്സ് വാസു എന്നിവയാണ് അടുത്ത മോഹന്ലാല് ചിത്രങ്ങള്. ഓണചിത്രമായി ഒപ്പം വെള്ളിയാഴ്ച തിയേറ്ററുകളിലെത്തും. ട്രെയിലറും പാട്ടുകളും ഇതിനകം ഹിറ്റായ ഒപ്പത്തെ കുറിച്ച് വലിയ പ്രതീക്ഷകളാണുള്ളത്. ആരാധകരുടെ പ്രതീക്ഷ വാനോളമാണ്. അതിനാല് വലിയ ഹിറ്റോ, വലിയ പരാജയമോ ആകാനാണ് സാധ്യത. മോഹന്ലാലും പ്രിയനും ഒരുമിച്ച കഴിഞ്ഞ ചിത്രം ഗീതാഞ്ജലി വലിയ പരാജയമായിരുന്നു.
https://www.facebook.com/Malayalivartha
