ബോളിവുഡിലെ ചുംബനവീരന്‍ ഇമ്രാന്‍ ഹഷ്മിയുമായുള്ള പുതുമുഖനടി കൃതി ഘര്‍ബന്ദയുടെ ചുംബനം ഏറെ വിവാദമുണ്ടാക്കി. പക്ഷെ ഇമ്രാന്‍ ഹഷ്മിയെ അക്കാര്യത്തില്‍ ആര്‍ക്കു തോല്‍പ്പിക്കാന്‍ കഴിയുമെന്ന് കൃതി ഘര്‍ബന്ദ തന്നെ ചോദിക്കുന്നു. ഇമ്രാനുമായുള്ള പുതിയ സിനിമ റാസ് റീബൂട്ടിലെ ചുംബനരംഗം ഒരു സമ്മര്‍ദ്ദവും ഉണ്ടാക്കിയില്ലെന്നും സിനിമയിലെ ഏതൊരു രംഗവും ചിത്രീകരിച്ചത് പോലെ മാത്രമേ തോന്നിയുള്ളെന്നും കൃതി പറഞ്ഞു. 

സിനിമയില്‍ ഇതുവരെ ഒരു ചുംബന രംഗവും അഭിനയിച്ചിട്ടില്ലാത്തതിനാല്‍ ആശയം ആദ്യം പറഞ്ഞപ്പോള്‍ ഒന്നു ഞെട്ടി. എന്നാല്‍ ചെയ്തപ്പോള്‍ ഒരു വലിയ കാര്യമായി തോന്നിയില്ല. സാധാരണ രംഗം പോലെ അത് കടന്നുപോയി. അണിയറക്കാരാകട്ടെ ഇമ്രാന്‍ ഹഷ്മിയുമായി മുമ്പ് ജോലി ചെയ്ത പോലെ തന്നെയായിരുന്നു സെറ്റില്‍. ചുംബനം ഒരു വികാരപ്രകടനമാണ്. അതിനെ മോശം കാര്യമായി പരിഗണിക്കേണ്ടതില്ല. കിടപ്പറ രംഗങ്ങള്‍ ഒട്ടേറെയുണ്ടെങ്കിലും അതൊന്നും നമ്മുടെ പ്രേക്ഷകര്‍ അധികകാലം ചര്‍ച്ച ചെയ്യാറില്ല. ഇതൊരും കിടപ്പറ ചിത്രമല്ല. ട്രെയിലറില്‍ എന്താണോ കാണുന്നത് അതു തന്നെയാണ് സിനിമ. ഞങ്ങളുടെ സിനിമ സസ്‌പെന്‍സും ഹൊററുമാണ്. 

ഇമ്രാന്‍ ഹഷ്മിയുമായി ആദ്യം അകലം ഉണ്ടായിരുന്നു. എന്നാല്‍ അദ്ദേഹം തന്നെ മുന്നോട്ട് വന്ന് പരിചയപ്പെട്ടതോടെ അത് സൗഹൃദമായി മാറി. വിമാനത്താളവത്തില്‍ വെച്ച് താന്‍ ബാഗ് എടുക്കാന്‍ ബുദ്ധിമുട്ടുന്നത് കണ്ട് അദ്ദേഹം വന്ന് ബാഗ് എടുക്കാന്‍ സഹായിച്ചെന്നും ഇമ്രാനുമൊത്ത് താന്‍ ഏറെ ആസ്വദിച്ചാണ് അഭിനയിച്ചതെന്നും കൃതി പറയുന്നു. റാസിലെ സഹതാരം ഗൗരവ് അറോറ തന്റെ വെറും സുഹൃത്ത് മാത്രമാണെന്നും കൃതി പറഞ്ഞു. നേരത്തേ ഇരുവരും പ്രണയത്തിലാണെന്ന ഗോസിപ്പ് പരന്നിരുന്നു. തനിക്ക് ഒരു ബന്ധമുണ്ടെങ്കില്‍ അത് തുറന്നു പറയാന്‍ തയ്യാറാകുമെന്നും താരം പറയുന്നു.