ചിമ്പു സമര്‍ത്ഥനായ നടനാണെന്ന് മഞ്ജിമ. ഗൗതംമേനോന്റെ അച്ചം എന്‍പത് മടമയെടാ എന്ന ചിത്രത്തില്‍ ചിമ്പുവിനൊപ്പം നായികയായി അഭിനയിച്ച ശേഷമാണ് താരം ഇക്കാര്യം പറഞ്ഞത്. ക്യാമറാ ആങ്കിള്‍ മുതല്‍ ലൈറ്റിംഗിനെ കുറിച്ച് വരെ ചിമ്പുവിന് നന്നായി അറിയാം. പ്രേക്ഷകരെ കുറിച്ചും സിനിമയെ കുറിച്ചും വ്യക്തമായ ധാരണയും ചിമ്പുവിനുണ്ടെന്നും താരം പറഞ്ഞു. ഒരു വടക്കന്‍ സെല്‍ഫിയുടെ ട്രെയിലര്‍ കണ്ട ഗൗതം വാസുദേവ് മേനോന്‍ വിനീത് ശ്രീനിവാസനോട് മഞ്ജിമയെക്കുറിച്ച് തിരക്കി. അങ്ങനെയാണ് തമിഴില്‍ തുടക്കം കുറിച്ചത്. മലയാളത്തില്‍ മമ്മൂട്ടി, മോഹന്‍ലാല്‍, സുരേഷ്‌ഗോപി എന്നിവരുടെയൊപ്പം ബാലതാരമായി മഞ്ജിമ അഭിനയിച്ചിട്ടുണ്ട്. 

അച്ചം എന്‍പത് മടമയെടാ എന്ന ചിത്രത്തിന്റെ തെലുങ്ക് പതിപ്പില്‍ നാഗ് ചൈതന്യയാണ് നായകന്‍. നായികയായി ഒരേ സമയം രണ്ട് ഭാഷകളില്‍ അഭിനയിക്കുന്നത് ബോറഡിക്കില്ലേ എന്ന് ചോദിച്ചാല്‍, നമ്മള്‍ ഇഷ്ടപ്പെട്ട് ചെയ്യുന്നതൊന്നും ബോറടിക്കില്ലെന്ന് താരം പറഞ്ഞു. ആദ്യം തമിഴിലാണ് ഷൂട്ട്. അതില്‍ അഭിനയിച്ചതില്‍ നിന്ന് വ്യത്യസ്തമായായിരിക്കും തെലുങ്കില്‍ ചെയ്യുക. രണ്ട് ഭാഷയിലെയും നായകന്‍മാര്‍ കിടിലങ്ങളായത് കൊണ്ട് രസകരമായാണ് അഭിനയിച്ചത്. പിന്നെ ഗൗതം മേനോന്റെ ശൈലി ഒന്ന് വേറെ തന്നെ. അദ്ദേഹം ടെന്‍ഷന്‍ ആകാറേയില്ല. ആര്‍ടിസ്റ്റുകള്‍ക്ക് സ്വാതന്ത്ര്യം തന്ന് നമുക്ക് ഇഷ്ടമുള്ളതെടുക്കും, അതാണ് രീതി.

ക്യാമറാമാന്‍ വിപിന്‍മോഹന്റെയും കലാമണ്ഡലം ഗിരിജയുടെയും മകളാണ് മഞ്ജിമ. പണ്ട് മുതലേ ഷൂട്ടിംഗ് ലൊക്കേഷനുകളില്‍ കറങ്ങി നടന്ന മഞ്ജിമക്ക് സിനിമ തന്റെ കുടുംബ വീട് പൊലെയാണ്. വാശിയേറിയ കഥാപാത്രങ്ങള്‍ ചെയ്യണമെന്നാണ് മഞ്ജിമയുടെ ആഗ്രഹം. വിക്രംപ്രഭുവിനൊപ്പം മുടിചൂടാ മന്നനില്‍ അഭിനയിക്കുകയാണ് മഞ്ജിമയിപ്പോള്‍. എന്നാല്‍ ഗൗതം മേനോന്റെ സിനിമയിലെ കഥാപാത്രത്തെ കുറിച്ച് പറയാന്‍ താരം തയ്യാറായില്ല.