പെണ്‍കുട്ടികള്‍ സിനിമയില്‍ അഭിനയിക്കുന്നത് മോശമാണെന്ന് വിശ്വസിക്കുന്നവര്‍ കേരളത്തിലുണ്ടെന്ന് അപര്‍ണ ബാലമുരളി. മഹേഷിന്റെ പ്രതികാരത്തിലൂടെ ശ്രദ്ധേയയായ നായിക പറഞ്ഞു. അടുത്തിടെ താരം ചെയ്ത മേക്കോവര്‍ ഫോട്ടോ ഷൂട്ട് പലര്‍ക്കും ഇഷ്ടമായില്ല. ഒരു സിനിമയില്‍ അഭിനയിച്ചതോടെ താന്‍ വഷളായെന്നാണ് പലരുടെയും മനോഭാവം.ഇങ്ങിനെയുള്ളവരോട് നല്ല സിനിമകള്‍ ചെയ്ത് പ്രതികാരം ചെയ്യാനാണ് തീരുമാനം. വിക്രമിനൊപ്പം അഭിനയിക്കണം എന്നതാണ് തന്റെ സ്വപ്‌നമെന്നും താരം പറഞ്ഞു. സിനിമയ്ക്ക് വേണ്ടി അദ്ദേഹം എടുക്കുന്ന റിസ്‌ക്ക് അപാരമാണ്. 

കല തനിക്ക് പാരമ്പര്യമായി ലഭിച്ചതാണെന്ന് അപര്‍ണ പറഞ്ഞു. അച്ഛന്‍ ബാലമുരളി പ്രൊഫഷണല്‍ മ്യുസിഷനും അമ്മ ശോഭ അഡ്വക്കേറ്റുമാണ്. രണ്ട് പേരും നന്നായി പാടും. അതിന്റെ ഗുണം താരത്തിനും ലഭിച്ചിട്ടുണ്ട്. മഹേഷിന്റെ പ്രതികാരത്തില്‍ പാടാന്‍ കിട്ടിയ ചാന്‍സ് ശെരിക്കും പറഞ്ഞാല്‍ ബോണസാണ്. പാലക്കാട് ഗ്ലോബല്‍ ആര്‍ക്കിടെക്ചര്‍ സ്‌കൂളില്‍ രണ്ടാം വര്‍ഷ സിലബസുമായി മല്‍പ്പിടുത്തത്തിലാണ് താരം. ജോളജില്‍ ചേര്‍ന്നപ്പോള്‍ ആദ്യം ആരും കമ്പനി തന്നില്ല. ഉള്ളകാര്യം അതേ പോലെ തുറന്ന് പറയുന്ന പ്രകൃതമാണ് അപര്‍ണയുടേത്. അതുകൊണ്ടാണ് പലരും ആദ്യം അടുക്കാത്തത്. 

ഒരു മുത്തശ്ശി ഗദ തന്റെ ഓണ സമ്മാനമാണെന്ന് താരം പറഞ്ഞു. ഇക്കൊല്ലം തൃശൂരാണ് ഓണം. ഖത്തറില്‍ നിന്ന് നാട്ടിലേക്ക് വന്നത് നാലാംക്ലാസില്‍ പഠിക്കുമ്പോഴാണ്. ബന്ധുക്കളെല്ലാം പലയിടങ്ങളിലാണ്. ഇക്കൊല്ലം അവരെയെല്ലാം വിളിച്ച് കൂട്ടിയാണ് ഓണം ആഘോഷിച്ചത്. ചെറിയൊരു പ്രതികാരം കൂടിയായിരുന്നു അത്. ഇങ്ങിനെ കൊച്ച് കൊച്ച് പ്രതികാരങ്ങള്‍ കൂടിയാണല്ലോ ജീവിതം. ദിലീപിന്റെ നായികയായി ക്ഷണിച്ചിട്ടുണ്ട്. പക്ഷെ, കാര്യങ്ങള്‍ കൂടുതല്‍ പറയാറായിട്ടില്ല.