മമ്മൂട്ടി മലയാളത്തിന്റെ പ്രിയപ്പെട്ട നടനാണ്. എന്നാല്‍ മമ്മൂട്ടി എന്നൊരു മരമുണ്ട് തലയോലപറമ്പിലെ ചെമ്പില്‍. മമ്മൂട്ടിയുടെ തറവാടാണ് ചെമ്പ്. തറവാട്ടില്‍ ധാരാളം കൃഷിയുണ്ട്. കുട്ടിക്കാലത്ത് മക്കളെ കൊണ്ട് മരങ്ങള്‍ നടിവിക്കുന്ന പതിവുണ്ടായിരുന്നു മമ്മൂട്ടിയുടെ വാപ്പയ്ക്ക്. പാവയ്ക്കയും പടവലങ്ങയും പീച്ചിങ്ങയും വഴുതനങ്ങയും മത്തങ്ങയും കുമ്പളങ്ങയും അങ്ങനെ പലതരം ചെടികള്‍.

മക്കള്‍ എന്നും മണ്ണിനോട് പടവെട്ടണമെന്ന വാശിക്കാരനായിരുന്നു ബാപ്പ. മമ്മൂട്ടി നടുന്ന തൈ വളര്‍ന്നു വലുതാകുമ്പോള്‍ മമ്മൂട്ടിയുടെ പേരിട്ടു വിളിക്കും. അനിയന്‍ വയ്ക്കുന്ന തൈകള്‍ക്ക് അനിയന്റെ പേരിട്ടു വിളിക്കും. ഒരിക്കല്‍ മമ്മൂട്ടി നട്ട ചെറി ഇന്നും തറവാട്ടിലുണ്ട്. അതിനെ മൂഹമ്മദുകുട്ടി ചെറി എന്നു തറവാട്ടുകാര്‍ വിളിക്കുന്നു. 

ചെമ്പിലെ തറവാട്ടില്‍ ചെല്ലുമ്പോഴൊക്കെ ചെറിയുടെ സന്നിധിയില്‍ മമ്മൂട്ടി പോകാറുണ്ട്. അത് അച്ഛനെ കുറിച്ചുള്ള ഓര്‍മ്മ കൂട്ടിയിട്ടുണ്ട്. വീട്ടുകാരുമായി ഏറെ ബന്ധം സൂക്ഷിക്കുന്ന നടനാണ് മമ്മൂട്ടി. അനിയന്‍മാരെന്നാല്‍ മമ്മൂട്ടിയ്ക്ക് ജീവനാണ്. ദുല്‍ഖര്‍ എങ്ങനെയാണോ അങ്ങനെയാണ് മമ്മൂട്ടിയ്ക്ക് ബന്ധങ്ങളും. ബന്ധു ബലത്തിനപ്പുറം ഒന്നുമില്ലെന്നാണ് മമ്മൂട്ടിയുടെ മതം. സ്വന്തം മക്കളെയും ഇങ്ങനെയെല്ലാം തന്നെയാണ് മമ്മൂട്ടി വളര്‍ത്തിയത്. അവരും വാപ്പച്ചിയുടെയും ഉമ്മച്ചിയുടെയും ബന്ധുക്കളോട് സ്‌നേഹപൂര്‍വ്വം പെരുമാറുന്നു. 

മണ്ണിന്റെ മണമറിഞ്ഞവര്‍ക്കു മാത്രമേ ബന്ധുത്വത്തിന്റെ വില അറിയാന്‍ കഴിയുകയുള്ളൂവെന്ന് മമ്മൂട്ടി പറയുന്നു. വളര്‍ന്നു വലിയ താരമായപ്പോഴും മമ്മൂട്ടി മണ്ണിനോടുള്ള ബന്ധം മുറിച്ചില്ല. മണ്ണ് എന്നത് സ്‌നേഹമാണെന്ന് മമ്മൂട്ടി പറയുന്നു. അതിനാലാണ് മക്കള്‍ നടുന്ന വൃക്ഷം മക്കള്‍ തന്നെ പരിപാലിക്കണമെന്ന് വാപ്പച്ചി നിര്‍ബന്ധിച്ചത്.