ഗര്‍ഭനിരോധന ഉറകളുടെ പരസ്യം രാവിലെ 6 നും രാത്രി 10 നുമിടയില്‍ ടെലിവിഷന്‍ ചാനലുകളില്‍ നിരോധിച്ചു കൊണ്ടുള്ള കേന്ദ്ര സര്‍ക്കാര്‍ തീരുമാനം പുനഃപരിശോധിച്ചേക്കും. കുട്ടികളെ വഴിതെറ്റിക്കുമെന്ന പേരിലുള്ള നിരോധനം ബോധ ശൂന്യമായ പ്രവൃത്തിയാണെന്ന ചിന്തയിലേക്കാണ് കേന്ദ്രസര്‍ക്കാര്‍ നീങ്ങുന്നത്. ഇന്‍ഫര്‍മേഷന്‍ ആന്റ് ബ്രോഡ്കാസ്റ്റിംഗ് വകുപ്പാണ് പരസ്യം പകല്‍ വെട്ടത്തില്‍ നിരോധിച്ചത്.

ഇന്റര്‍നെറ്റില്‍ തപ്പിയാല്‍ ഏത് കുഞ്ഞിനും ബ്ലൂ ഫിലിം കാണാന്‍ യഥേഷ്ടം അവസരം ഉള്ളപ്പോഴാണ് ഇത്തരം മണ്ടന്‍ തീരുമാനങ്ങളെന്നാണ് പൊതു വിലയിരുത്തല്‍.

അതിനിടെ ഉറ പരസ്യത്തില്‍ അഭിനയിച്ച ബോളിവുഡ് താരം രാഖി സാവന്ത് സര്‍ക്കാരിനെതിരെ പൊട്ടിത്തെറിച്ചു. ഗര്‍ഭനിരോധന ഉറയുടെ പരസ്യം നിരോധിച്ചാല്‍ രാജ്യത്ത് എയ്ഡ്‌സ് പടര്‍ന്നു പിടിക്കുമെന്ന് രാഖി സാവന്ത് പറഞ്ഞു. രാവിലെ 6 നും രാത്രി 10 നുമിടയില്‍ ഉറ പരസ്യം നിരോധിച്ച കേന്ദ്ര സര്‍ക്കാരിനെതിരെ രംഗത്തെത്തിയ രാഖി കുട്ടികളെ തീരെ കുട്ടികളായി കരുതരുതെന്നും മുന്നറിയിപ്പ് നല്‍കി.

സണ്ണി ലിയോണും ബിപാഷ ബസുവും ഉറ പരസ്യത്തില്‍ അഭിനയിച്ചപ്പോള്‍ സര്‍ക്കാര്‍ എന്തുകൊണ്ട് സെന്‍സര്‍ ചെയ്തില്ലെന്നും രാഖി ചോദിക്കുന്നു. ഉറ പരസ്യം യഥാര്‍ത്ഥത്തില്‍ ബോധവത്കരണമാണ്. രേഖ പ്രധാനമന്ത്രിക്ക് മുന്നിലാണ് തന്റെ അപേക്ഷ സമര്‍പ്പിച്ചത്. കഴിയുന്നതും മുഴുവന്‍ സമയവും ഉറപരസ്യം കാണിച്ചു കൊണ്ടിരിക്കണം. തീര്‍ച്ചയായും അതൊരു ബോധവത്കരണമാണ്. ഉറപരസ്യത്തില്‍ അഭിനയിക്കുക വഴി താന്‍ ചെയ്യുന്നത് ഒരു സാമൂഹ്യ സേവനമാണെന്നും രാഖി പറഞ്ഞു. ഉറ ഉപയോഗിച്ചാല്‍ എയ്ഡ്‌സ് ഒഴിവാക്കാം. സര്‍ക്കാര്‍ ഇത്തരം കാര്യങ്ങളില്‍ ഭയപ്പെടരുത്. പരസ്യം കണ്ടാല്‍ കുട്ടികള്‍ മുന്നറിയിപ്പ് സംവിധാനത്തെ കുറിച്ച് മനസിലാക്കും. മുതിര്‍ന്നവരെക്കാള്‍ ബുദ്ധിയുള്ളവരാണ് കുട്ടികള്‍.

പ്രധാനമന്ത്രി നേരിട്ട് ഇടപെടണമെന്നാണ് രാഖി ആവശ്യപ്പെടുന്നത്. തന്റെ നാട്ടിലെ ജനങ്ങളെ സംരക്ഷിക്കാനുള്ള ബാധ്യത പ്രധാനമന്ത്രിക്കുണ്ട്. ലൈംഗിക പരിപാടികള്‍ കാണാന്‍ യഥേഷ്ടം അവസരങ്ങളുണ്ട്. അതിന് പരസ്യം തന്നെ കാണണമെന്നില്ലാണ് രാഖി പറയുന്നത്. ബോളിവുഡ് സിനിമകളില്‍ ലൈംഗികതക്ക് വലിയ പ്രാധാന്യം ഉണ്ടെന്നും രാഖി പറയുന്നു. എയ്ഡ്‌സ് തടയാന്‍ ആശുപത്രികള്‍ തോറും ഗര്‍ഭനിരോധന ഉറകള്‍ വിതരണം ചെയ്യുന്ന സര്‍ക്കാരിന് എന്തുകൊണ്ടാണ് പരസ്യം കാണുമ്പോള്‍ ഭ്രാന്ത് പിടിക്കുന്നതെന്നും രാഖി ചോദിക്കുന്നു.

അടുത്ത കാലത്താണ് ഉറപരസ്യങ്ങള്‍ ഒരു ഇടവേളക്ക് ശേഷം സജീവമായി രംഗത്ത് വന്നത്. കോടികളാണ് ഇത് വഴി കമ്പനികള്‍ സമ്പാദിച്ചത്. ആകര്‍ഷമായ പരസ്യങ്ങളാണ് ഉറയുടെ പ്രത്യേകത. കണ്ടിരുന്നാല്‍ കണ്ണ് ചിമ്മില്ലെന്നാണ് പരസ്യം കാണുന്നവര്‍ പറയുന്നത്.