അരുണ്‍ പ്രഭു സംവിധാനം അരുവി എന്ന ചിത്രത്തിനെതിരെ രൂക്ഷവിമര്‍ശനവുമായി നടി ലക്ഷ്മി രാമകൃഷ്ണന്‍ രംഗത്ത്. അതിഥി ബാലകൃഷ്ണന്‍ പ്രധാന വേഷത്തിലെത്തിയ ചിത്രത്തിന് മികച്ച പ്രതികരണം വന്നുകൊണ്ടിരിക്കുമ്പോഴാണ് ലക്ഷമി രാമകൃഷ്ണന്റെ പ്രതികരണം. വിദേന്ത് ഭരദ്വാജാണ് ചിത്രത്തിലെ നായകന്‍. ടെലിവിഷന്‍ ചാനലില്‍ ലക്ഷ്മി അവതരിപ്പിക്കുന്ന ഷോയെ ചിത്രത്തില്‍ പരിഹസിക്കുന്നുണ്ട്. ഇതാണ് അവരെ ചൊടിപ്പിച്ചത്. 

കുടുംബ പ്രശ്‌നങ്ങള്‍ പരിഹരിക്കുന്നതിനുള്ള സൊല്ലുവതെല്ലാം ഉണ്‍മെ എന്ന പരിപാടിയാണ് ലക്ഷ്മി അവതരിപ്പിക്കുന്നത്. ഈ ഷോയെ പരിഹസിക്കുന്ന രംഗങ്ങള്‍ ചിത്രത്തിലുണ്ട്. ചിത്രത്തിനും സംവിധായകനുമെതിരെ രൂക്ഷവിമര്‍ശനമാണ് ലക്ഷ്മി രാമകൃഷ്ണന്‍ ഉന്നയിച്ചിരിക്കുന്നത്. ട്വിറ്ററിലൂടെയാണ് ലക്ഷ്മിയുടെ വിമര്‍ശനം. മറ്റൊരു സ്ത്രീയെ ആക്രമിച്ച് ഒരു ഫെമിനിസ്റ്റ് ചിത്രത്തിന് പ്രചരണം കൊടുക്കുന്നത് മഹത്തരമായ കാര്യമാണോയെന്ന് അവര്‍ ചോദിക്കുന്നു.

ജീവിച്ചിരിക്കുന്ന സ്ത്രീകളേയും മറ്റുള്ളവരേയും ബഹുമാനിക്കാത്തവര്‍ എങ്ങനെയാണ് മറ്റുള്ളവരുടെ വികാരത്തെ മാനിക്കുന്നത്. സ്ത്രീകളെ അപകീര്‍ത്തിപ്പെടുത്തിയിട്ടും ആ സിനിമയെ പ്രശംസിക്കുന്നതാണ് ഏറ്റവും മോശം കാര്യമെന്നും ലക്ഷ്മി പറയുന്നു. സംവിധായകരുടെ ഭാവന യാഥാര്‍ത്ഥ്യമാണെന്ന് കരുതുന്ന ചില വിഡ്ഡികളുണ്ടെന്നും ലക്ഷ്മി രാമകൃഷ്ണന്‍ കൂട്ടിച്ചേര്‍ത്തു.

സ്വന്തം കാര്യത്തിന് വേണ്ടിയും അവരുടെ അജണ്ടകള്‍ നടപ്പിലാക്കുന്നതിനും സ്പൂഫുകള്‍ക്കും വ്യക്തിപരമായ ആക്രമണത്തിനും സിനിമാ മേഖല തന്നെയാണ് ഉത്തരവാദി. ഈ ഷോയോട് എതിര്‍പ്പുണ്ടെങ്കില്‍ തന്റെ സേവനങ്ങളെ കൊച്ചാക്കുകയായിരുന്നില്ല ചെയ്യേണ്ടിയിരുന്നത്. അത് ചര്‍ച്ച ചെയ്യുകയായിരുന്നു വേണ്ടതെന്നും ലക്ഷ്മി തുറന്നടിച്ചു.