എഴുത്തുകാരി മാധവിക്കുട്ടിയുടെ ജീവിതം സിനിമയാകുമ്പോൾ ചിത്രം പുറത്തിറങ്ങുന്നതിനു മുന്നോടി​യായുള്ള സംവിധായകന്റെ പ്രസ്താവന ഏറെ വിവാദങ്ങൾക്കു വഴി വച്ചിരുന്നു. ആമിയാകാന്‍ ആദ്യം നിശ്ചയിക്കപ്പെട്ടിരുന്നത് വിദ്യാ ബാലനെയാണ്. എന്നാല്‍ വിദ്യാ ബാലന്‍ പ്രൊജക്ട് ഉപേക്ഷിക്കുന്നതോടെയാണ് വിവാദങ്ങൾ തുടങ്ങുന്നത്. ആമിയില്‍ വിദ്യാബാലന്‍ അഭിനയിക്കാത്തതില്‍ തനിക്ക് ഇപ്പോള്‍ സന്തോഷം മാത്രമാണെന്നും വിദ്യ അഭിനയിച്ചിരുന്നെങ്കില്‍ സിനിമയില്‍ ലൈംഗീക രംഗങ്ങള്‍ കടന്ന് വരുമായിരുന്നുമെന്ന് കമൽ പറഞ്ഞിരുന്നു. എന്നാല്‍ ഒരു മാധ്യമത്തിന് അനുവദിച്ച അഭിമുഖത്തില്‍ യഥാര്‍ത്ഥത്തില്‍ പറഞ്ഞതെന്താണെന്ന്കമൽ പിന്നീട് വ്യക്തമാക്കിയിരുന്നു.

'വിദ്യയാണ് നായികയായിരുന്നത് എങ്കില്‍ ശരീരപ്രദര്‍ശനം കൂടുതല്‍ നടത്താവുന്ന തലത്തില്‍ സിനിമ ചിത്രീകരിക്കുവാന്‍ എനിക്ക് കുറച്ചുകൂടി സ്വാതന്ത്ര്യം ലഭിക്കുമായിരുന്നു. മഞ്ജു വാര്യര്‍ക്ക് കേരളത്തിലുള്ള പ്രതിച്ഛായ അതല്ല. അതുകൊണ്ടുതന്നെ ചിത്രീകരണവുമായി ബന്ധപ്പെട്ട ഒരു സ്വാതന്ത്ര്യത്തിന്റെ പരിമിതി എനിക്കുണ്ടായിരുന്നു'- കമൽ പറഞ്ഞു.

ഇപ്പോഴിതാ കമലിന്റെ പ്രസ്താവനയിൽ പ്രതികരിച്ചിരിക്കുകയാണ് നടി വിദ്യാ ബാലൻ. 'വിഷയത്തില്‍ പ്രത്യേകിച്ച് ഒന്നും പറയാനില്ല. എനിക്കു സംവിധായകനായ കമലിനു മറുപടി നല്‍കാന്‍ ആഗ്രഹമില്ല. ഞാന്‍ ഇത് സംബന്ധിച്ച എല്ലാം നേരത്തെ അവസാനിപ്പിച്ചതാണ്. അതു കൊണ്ട് ഇനി ഇതില്‍ പ്രതികരിക്കുന്നില്ല'- വിദ്യാബാലൻ പറഞ്ഞു.