ശ്രീ റെഡ്ഡി പറഞ്ഞത് വെറും കഥയല്ലെന്ന് തെളിയിക്കുന്ന തരത്തിലുള്ള വാര്‍ത്തകളാണ് സിനിമയിലെ കാസ്റ്റിംഗ് കൗച്ചിനെപ്പറ്റി ഇപ്പോള്‍ പുറത്തു വരുന്നത്. ടോളിവുഡില്‍ മാത്രമല്ല ഹോളിവുഡിലും ബോളിവുഡിലും കാസ്റ്റിംഗ് കൗച്ച് നിലനില്‍ക്കുന്നുണ്ട്. പലരും സത്യങ്ങള്‍ക്ക് നേരെ കണ്ണുകള്‍ അടക്കുകയാണ്. പലതും കണ്ടില്ലെന്ന് നടിക്കുന്നു. രാജ്യമൊട്ടാകെ കാസ്റ്റിംഗ് കൗച്ച് ചര്‍ച്ച വിഷയമായിരിക്കുകയാണ്. ഞെട്ടിപ്പിക്കുന്ന പല കഥകളാണ് ദിനം പ്രതി പുറത്തു വരുന്നത്. ഇപ്പോഴിത പുതിയ വെളിപ്പെടുത്തലുമായി താരങ്ങളായ രാധിക ആപ്‌തെയും ഉഷാ യാദവും രംഗത്തെത്തിയിരിക്കുകയാണ്. ലൈംഗിക ചൂഷണങ്ങള്‍ക്കെതിരെ തുറന്ന് സംസാരിക്കുകയാണ് താരങ്ങള്‍.

ബോളിവുഡിനു നേരെയാണ് രാധിക വിരല്‍ ചൂണ്ടുന്നത് . ബോളിവുഡിലെ സിംഹാസനങ്ങളില്‍ അമര്‍ന്നിരിക്കുന്ന പലര്‍ക്കും കാസ്റ്റിംഗ് കൗച്ചുമായി ബന്ധമുണ്ട്. ഇവിടെ പലര്‍ക്കും അവര്‍ ദൈവ തുല്യരാണ്. കൂടാതെ ശക്തരുമാണ്. അവര്‍ക്കെതിരെ ഒരു അക്ഷരം ശബ്ദിച്ചാല്‍ കരിയര്‍ ഉണ്ടാകില്ല എന്നാണ് ഭീഷണിയെന്നും രാധിക പറഞ്ഞു. ഇതിനും മുന്‍പും സിനിമ മേഖലയിലെ ലൈംഗിക ആക്രമണത്തെ കുറിച്ചു രാധിക തുറന്നടിച്ചിരുന്നു. തന്നോട് ഒരു തെന്നിന്ത്യന്‍ താരം മോശമായി പെരുമാറി എന്ന് ധൈര്യമായി തുറന്നടിച്ച താരമാണ് രാധിക ആപ്‌തെ.

ഇതേ അനുഭവം ദേശീയ പുരസ്‌കാര ജേത്രിയും മറാത്തി താരവുമായി ഉഷ യാദവും പങ്കുവെച്ചിട്ടുണ്ട്. കാസ്റ്റിംഗ് കൗച്ചിനെ കുറിച്ചു സമാനമായ അനുഭവമാണ് ഉഷയ്ക്കും പറയാനുള്ളത്. ഒരിക്കല്‍ തനിയ്‌ക്കൊരു സിനിമയില്‍ അഭിനയിക്കാന്‍ അവസരം ലഭിച്ചു. ഇതിനു പ്രത്യുപകാരം സംവിധായകന്‍ ചോദിച്ചിരുന്നു. തന്റെ കയ്യില്‍ പണമില്ലാന്ന് അദ്ദേഹത്തിനോട് താന്‍ പറഞ്ഞിരുന്നു. എന്നാല്‍ അയാള്‍ക്ക് അവശ്യം മറ്റൊന്നായിരുന്നു. കിടപ്പറ പങ്കിടാന്‍ അയാള്‍ ആവശ്യപ്പെട്ടിരുന്നു താരം തുറന്നടിച്ചു.