തടി കുറയ്ക്കാന്‍ ശ്രമിക്കുന്നവര്‍ പ്രധാനമായും ചെയ്യാറുള്ളത് ഡയറ്റും വ്യായാമവുമാണ്. ഡയറ്റും വ്യായാമവുമെല്ലാം ചെയ്യുന്നത് നല്ലത് തന്നെ. അതോടൊപ്പം നെഗറ്റീവ് കലോറിയുള്ള ഭക്ഷണങ്ങള്‍ കൂടി കഴിക്കാന്‍ ശ്രമിക്കുക. നെഗറ്റീവ് കലോറിയുള്ള ഭക്ഷണങ്ങള്‍ ദിവസവും കഴിക്കുന്നത് തടി കുറയ്ക്കാന്‍ വളരെ നല്ലതാണ്. തടി കുറയ്ക്കാന്‍ ഉദ്ദേശിക്കുന്നവര്‍ ഇനി മുതല്‍ ഡയറ്റില്‍ ഉള്‍പ്പെടുത്തേണ്ട നെഗറ്റീവ് കലോറിയുള്ള ഭക്ഷണങ്ങള്‍ ഏതൊക്കെയാണെന്ന് നോക്കാം.

തണ്ണിമത്തന്‍

ഡയറ്റ് ചെയ്യുന്നവര്‍ ഇനി മുതല്‍ തണ്ണിമത്തന്‍ കൂടി ഉള്‍പ്പെടുത്തണം. ശരീരഭാരം കുറയ്ക്കാന്‍ ഏറ്റവും നല്ലതാണ് തണ്ണിമത്തന്‍. തണ്ണിമത്തനില്‍ കൂടുതല്‍ വെള്ളം അടങ്ങിയിട്ടുള്ളതിനാല്‍ കുറഞ്ഞ കലോറിയാണ് അടങ്ങിയിട്ടുള്ളത്. ഒരു തണ്ണിമത്തനില്‍ 88 കലോറി മാത്രമാണ് അടങ്ങിയിട്ടുള്ളത്.

ക്യാരറ്റ്

നാരുകള്‍, ആന്റി ഓക്‌സിഡന്റുകള്‍, പൊട്ടാസ്യം, ജീവകം കെ എന്നിവയാല്‍ സമൃദ്ധമാണ് ക്യാരറ്റ്. ക്യാരറ്റില്‍ 95 ശതമാനം ജലാംശം അടങ്ങിയിട്ടുണ്ട്. 100 ഗ്രാം ക്യാരറ്റില്‍ 41 കലോറി മാത്രമുളളതിനാല്‍ നല്ലൊരു നെഗറ്റീവ് കലോറി ഭക്ഷണവുമാണ്. ക്യാരറ്റ് ജ്യൂസായോ അല്ലാതെയോ കഴിക്കുന്നത് ശരീരത്തിലെ കൊഴുപ്പ് ഇല്ലാതാക്കാന്‍ സഹായിക്കുന്നു.

ബ്രൊക്കോളി

നാരുകളും ആന്റി ഓക്‌സിഡന്റുകളും അടങ്ങിയതിനാല്‍ ബ്രോക്കോളിയെ സൂപ്പര്‍ ഫുഡായി കരുതുന്നു. ക്രൂസിഫെറസ് പച്ചക്കറികളുടെ ഗണത്തില്‍പ്പെടുന്ന ബ്രൊക്കോളിയില്‍ നാരുകള്‍ ധാരാളം അടങ്ങിയിട്ടുണ്ട്. ഫൈബര്‍ ധാരാളം അടങ്ങിയ ബ്രൊക്കോളിയില്‍ 100 ഗ്രാം ബ്രൊക്കോളിയില്‍ 34 കലോറി മാത്രമേ അടങ്ങിയിട്ടുള്ളൂ. ക്യാന്‍സര്‍ തടയാന്‍ സഹായിക്കുന്ന ഭക്ഷണമാണ് ബ്രൊക്കോളി.

ആപ്പിള്‍

ശരീരഭാരം കുറയ്ക്കാന്‍ ഏറ്റവും നല്ലതാണ് ആപ്പിള്‍. ധാരാളം നാരുകള്‍ അടങ്ങിയ 100 ഗ്രാം ആപ്പിളില്‍ 50 കലോറിയാണ് അടങ്ങിയിട്ടുള്ളത്. ശരീരഭാരം കുറയ്ക്കാനും ദഹനത്തിനു സഹായകവുമായ പെക്ടിന്‍ ആപ്പിളിലുണ്ട്. ഫൈബര്‍ ധാരാളം അടങ്ങിയിട്ടുള്ളത് കൊണ്ട് മലബന്ധം തടയാന്‍ ആപ്പിള്‍ സഹായിക്കുന്നു. രക്തത്തിലെ പഞ്ചസാരയുടെ അളവ് നിയന്ത്രിക്കാനുള്ള കഴിവ് ആപ്പിളിനുണ്ട്.

ഞാവല്‍

ഒരു കപ്പ് ഞാവല്‍ പഴത്തില്‍ ഏതാണ്ട് 83 കാലറി മാത്രമാണ് അടങ്ങിയിട്ടുള്ളത്. നിറയെ ആന്റി ഓക്‌സിഡന്റുകള്‍ അടങ്ങിയിട്ടുള്ളതിനാല്‍ യുവത്വം കാത്തുസൂക്ഷിക്കാനും ഹൃദയ സംബന്ധമായ രോഗങ്ങളില്‍ നിന്ന് സംരക്ഷണമൊരുക്കാനും ഞാവലിന് കഴിയും. ശരീരത്തിലെ കൊഴുപ്പ് അകറ്റാന്‍ ദിവസവും ഞാവല്‍ കഴിക്കുക.