കുട്ടികള്‍ക്കും മുതിര്‍ന്നവര്‍ക്കും ഒരുപോലെ ആരോഗ്യപരമായ ഗുണങ്ങള്‍ നല്‍കുന്ന ഒന്നാണ് മുട്ട. പ്രോട്ടീനുകളും വൈറ്റമിനുകളും ധാതുക്കളുമെല്ലാം ഒത്തിണങ്ങിയതാണ് മുട്ടയെന്നു പറയാം. എന്നാൽ ഇത് പാകം ചെയുമ്പോൾ അൽപ്പമൊന്നു ശ്രദ്ധിക്കണം. 

മുട്ട പല രീതിയിലും പാകം ചെയ്തു കഴിയ്ക്കാം. പുഴുങ്ങിയും പൊരിച്ചും ഓംലറ്റായും കറി വച്ചുമെല്ലാം പല തരത്തില്‍ ഇത് ഉപയോഗിയ്ക്കുന്നുണ്ട്. ഇതില്‍ തന്നെ ആരോഗ്യകരം പുഴുങ്ങിയ മുട്ട എന്നു പറയാം.  മുട്ട പുഴുങ്ങുമ്പോൾ ശ്രദ്ധിച്ചില്ലെങ്കിൽ ഗുണത്തേക്കാളേറെ ദോഷം സംഭവിച്ചേക്കാം. 
മുട്ട പുഴുങ്ങാന്‍  അടുപ്പത്ത് വച്ചിട്ട് സമയം നോക്കാതെ എപ്പോഴെങ്കിലും പോയി അത് ഓഫ് ചെയ്യുന്ന സ്വഭാവക്കാരാണ് വീട്ടമ്മമാരിൽ അധികവും. എന്നാൽ ഇത് ആരോഗ്യത്തിനു ദോഷം ചെയ്യും.

മുട്ട അമിത സമയം പുഴുങ്ങരുതെന്നാണ് സയന്‍സ് പറയുന്നത്. ഇത് മുട്ടയുടെ ഗുണം നശിപ്പിയ്ക്കുമെന്നു മാത്രമല്ല, മുട്ടയെ വിഷമയമാക്കുമെന്നും പറയണം. മുട്ട കൂടുതല്‍ സമയം വെന്തുവെന്നു മനസിലാക്കാന്‍ പുഴുങ്ങിയ മുട്ടയുടെ തോല്‍ കളഞ്ഞ് ഉളളിലെ മഞ്ഞ ശ്രദ്ധിച്ചാല്‍ മതിയാകും. മഞ്ഞയ്ക്കു ചുറ്റുമായി പച്ച നിറത്തിലെ ചെറിയൊരു ആവരണം പോലെ കാണാം. ഇത് മുട്ട കൂടുതല്‍ നേരം വെന്തുവെന്നതിന്റെ സൂചനയാണ്. ഇത്തരം മുട്ടകൾ കഴിക്കുന്നത് നല്ലതല്ല 
മുട്ട അമിതമായി വേവിക്കുമ്പോള്‍ ഹൈഡ്രജൻ സൾഫൈഡ് മുട്ടയുടെ വെള്ളയില്‍ ഉല്‍പ്പാദിപ്പിക്കപ്പെടും. മുട്ടയുടെ വെള്ളയിലാണ് ഹൈഡ്രജന്‍ സള്‍ഫൈഡ് രൂപപ്പെടുന്നത്. മുട്ടയുടെ പ്രോട്ടീനിലാകട്ടെ, സള്‍ഫറും ഇരുമ്പും ഉണ്ട് . ഇതാണ് മുട്ടയ്ക്ക് രൂക്ഷ ഗന്ധം നല്‍കുന്നത്. സവാളയ്ക്കുള്ളതു പോലെ. സവാളയിലും സള്‍ഫറുണ്ട്.   മുട്ട അമിതമായി വേവിയ്ക്കുമ്പോള്‍ മുട്ടയുടെ മഞ്ഞയില്‍ ഉള്ള അയണ്‍,    ഹൈഡ്രജൻ സൾഫൈഡിനോടു ചേർന്ന് അയൺ സൾഫൈഡ് ആകുകയും മഞ്ഞയ്ക്ക് പച്ച നിറത്തിലെ കോട്ടിങ് നല്‍കുകയും ചെയ്യുന്നു....മുട്ട തിളപ്പിച്ച്‌ കഴിഞ്ഞാല്‍ ഉടന്‍ തന്നെ അവ തണുപ്പിക്കാന്‍ പച്ചവെള്ളത്തില്‍ ഇടണമെന്ന് പറയുന്നത് ഇതുകൊണ്ടാണ് 
മുട്ട 10 മിനിറ്റു വരെ വേവിച്ചാല്‍ മതിയാകും, പിന്നീട് ഇത് തണുത്ത വെള്ളത്തിലിട്ടാല്‍ ഉറച്ചു കിട്ടുകയും ചെയ്യും.  മാത്രമല്ല, കൂടുതല്‍ വേവിയ്ക്കുമ്പോള്‍ പ്രോട്ടീനും മുട്ട മഞ്ഞയുമെല്ലാം കൂടുതല്‍ ഉറച്ച് റബ്ബര്‍ പോലെയാകുന്നു. ഇത് ഗുണത്തിനു മാത്രമല്ല, സ്വാദിനും നല്ലതല്ല. 

ഇതു പൊലെ മുട്ട പുഴുങ്ങുമ്പോള്‍ തിളച്ച വെള്ളത്തില്‍ ഇടരുത്. തണുത്ത വെള്ളത്തില്‍ തന്നെ മുട്ടയിട്ടു തിളപ്പിയ്ക്കുന്നതാണ് നല്ലത്. ഇത് മുട്ട ശരിയായി വെന്തു കിട്ടാനും അതേ സമയം മാര്‍ദവത്തോടെയിരിയ്ക്കാനും സഹായിക്കും. തിളച്ച വെള്ളത്തില്‍ മുട്ടയിടുമ്പോള്‍ പുറത്തെയും അകത്തേയും ടെംപറേച്ചറില്‍ പെട്ടെന്നു തന്നെ വ്യത്യാസം വരികയും ചെയ്യും. ഇതുപോലെ ചെറിയ പാനില്‍ മുട്ടയിട്ടു വേവിയ്ക്കുന്നതാണ് കൂടുതല്‍ നല്ലത്. ഇത് ചൂട് ഒരേ പോലെ മുട്ടയിലേയ്‌ക്കെത്താന്‍ സഹായിക്കും.

ഫ്രീഡ്ജില്‍ വച്ച മുട്ടയാണ് പുഴുങ്ങാന്‍ എടുക്കുന്നതെങ്കില്‍ പുഴുങ്ങുന്നതിന് പത്ത് മിനിറ്റ് മുമ്പ് മുട്ടയെടുത്ത് പുറത്തു വച്ച് അതിന്റെ തണുപ്പ് പോയശേഷമേ പുഴുങ്ങാവൂ. ഇല്ലെങ്കില്‍ മുട്ട പെട്ടെന്ന് പൊട്ടിപ്പോകും. ഫ്രിഡ്ജില്‍ നിന്നെടുത്ത മുട്ട പുഴുങ്ങുന്ന വെള്ളത്തില്‍ അല്‍പം എണ്ണ കൂടി ചേര്‍ത്താല്‍ മുട്ടയുടെ തോട് പൊട്ടുന്നത് ഒഴിവാക്കാം.