ആരോഗ്യത്തിന്റെ കാര്യത്തിൽ 916 ക്യാരറ്റാ ഈ കാരറ്റ്; കാരറ്റ് കഴിക്കുന്നവർ അറിയേണ്ടുന്നത്
പച്ചക്കറികളിൽ പച്ചക്കും കറി വച്ചുമൊക്കെ കഴിക്കാൻ നാം ഇഷ്ടപ്പെടുന്ന ഒന്നാണ് കാരറ്റ്. തോരൻ വച്ചും ജ്യൂസ് രൂപത്തിലും വഴറ്റിയുമൊക്കെ കാരറ്റിനെ നാം അകത്താക്കാറുണ്ട്. ഈ കാരറ്റിന്റെ ആരോഗ്യ ഗുണങ്ങളും അതിൽ അടക്കിയിരിക്കുന്നവ പ്രദാനം ചെയ്യുന്ന ഉപയോഗങ്ങളും അനവധിയാണ്. കാഴ്ചസംബന്ധിയായുള്ള പ്രശ്നങ്ങൾ ചർമ്മം തുടങ്ങി എല്ലാറ്റിനും ഉപകാരപ്രദമാണ് കാരറ്റ്. കരോട്ടിനാണ് കാരറ്റിലേറ്റവും കൂടുതല് അടങ്ങിയിരിക്കുന്നത്. കരോട്ടിന് ശരീരത്തില് ജീവകം എ ആയി മാറ്റപ്പെടുന്നു. കൂടാതെ, ജീവകം ബി, ജീവകം സി. എന്നിവയും കാരറ്റില് അടങ്ങിയിരിക്കുന്നു. പ്രോട്ടീൻ, കൊഴുപ്പ്, കാർബോ ഹൈഡ്രേറ്റ്, ഫൈബർ തുടങ്ങിയവയെല്ലാം കാരറ്റില് ധാരാളമുണ്ട്.
കാരറ്റിന് നമ്മുടെ കാഴ്ചശക്തിക്ക് വലിയ ഉത്തേജനം നൽകാൻ കഴിയും. പതിവായി കാരറ്റ് കഴിക്കുന്നത് തിമിരം, മാക്യുലർ ഡീജനറേഷൻ, രാത്രി അന്ധത എന്നിവ ഒഴിവാക്കാൻ സഹായിക്കും. കാരറ്റിലുള്ള വിറ്റാമിൻ എയാണ് കാഴ്ച ശക്തിയെ സഹായിക്കുന്നത്. ക്യാൻസറിനുള്ള സാധ്യതകളെ തടയാൻ ഈ പച്ചക്കറിക്ക് കഴിയും. ക്യാൻസറിനെ പ്രതിരോധിക്കാനുള്ള ആന്റി ഓക്സിഡന്റുകൾ ഇതിലുണ്ടെന്നു തെളിയിക്കപ്പെട്ടിട്ടുണ്ട്. ഇതിലുള്ള വിറ്റാമിനുകൾ വിവിധ അർബുദങ്ങൾ, പ്രത്യേകിച്ച് ശ്വാസകോശത്തിലെ അർബുദം എന്നിവ കുറയ്ക്കുവാൻ സഹായകമാണ്. എല്ലാ ദിവസവും ഒരു ഗ്ലാസ് കാരറ്റ് ജ്യൂസ് കുടിക്കുന്നത് നല്ലതാണ്. കൂടാതെ, ആഴ്ചയിൽ 3 തവണയെങ്കിലും കാരറ്റ് കഴിക്കുന്ന പുരുഷന്മാർക്ക് പ്രോസ്റ്റേറ്റ് ക്യാൻസറിനുള്ള സാധ്യത കുറവാണ്. കാരറ്റ് ജ്യൂസിന് രക്താർബുദ കോശങ്ങളെ ചുരുക്കാൻ സഹായിക്കുമെന്ന് ഒരു പഠനങ്ങൾ പറയുന്നു.
കാരറ്റിലുള്ള കരോട്ടിനോയിഡുകളായ ബീറ്റാ കരോട്ടിൻ, ആൽഫ-കരോട്ടിൻ, ല്യൂട്ടിൻ എന്നിവ ഹൃദ്രോഗ സാധ്യത കുറയ്യ്ക്കുവാൻ സഹായിക്കുന്നതായി പഠനങ്ങൾ പിന്തുണയ്ക്കുന്നു.രണ്ടോ മൂന്നോ ഇടത്തരം പച്ചക്കാരറ്റ് ദിവസവും കഴിക്കുന്നത് കൊളസ്ട്രോള് കുറയ്ക്കാന് ഫലപ്രദമാണെന്ന് ഗവേഷണങ്ങള് തെളിയിക്കുന്നു. കാരറ്റ് പതിവായി കഴിച്ചാൽ ‘മോശം’ കൊളസ്ട്രോൾ കുറയുവാൻ സഹായിക്കും.
കാരറ്റിനു അണു ബാധയെ തടയാൻ കഴിവുണ്ട്.ഇതിലുള്ള വിറ്റാമിൻ എ, ബി -6, സി, ഇ എന്നിവ രോഗപ്രതിരോധ ശേഷിയുള്ളതാണ്. മാത്രമല്ല ആന്റിഓക്സിഡന്റുകളുടെ കലവറയായതിനാൽത്തന്നെ രോഗപ്രതിരോധശക്തി നൽകി പൊതുവായ ആരോഗ്യവും സംരക്ഷിക്കുന്നു. അരഗ്ലാസ് കാരറ്റുനീര് രാവിലെയും വൈകിട്ടും കഴിക്കുന്നത് വായുക്ഷോഭത്തിന് പരിഹാരമാണ്. പച്ചക്കാരറ്റ് ചവച്ചുതിന്നുന്നത് പല്ലുകള് ശുചിയാക്കാന് എളുപ്പമാര്ഗമാണ്. മലബന്ധമൊഴിവാക്കാന് ദിവസവും ഒന്നോ രണ്ടോ പച്ചക്കാരറ്റ് തിന്നുന്നത് സഹായിക്കും.
ശരീരത്തെ ശുദ്ധീകരിക്കാൻ കാരറ്റിനു കഴിയും. ഇതിലുള്ള വിറ്റാമിൻ എ യുടെ ഉയർന്ന അളവ് ശരീരത്തെ ശുദ്ധീകരിക്കുന്നതിന് കരളിനെ സഹായിക്കുന്നു. വിറ്റാമിൻ എ നമ്മുടെ രക്തത്തെയും കരളിനെയും ശുദ്ധീകരിക്കുന്നു. ത്വക്ക് രോഗങ്ങളെ പ്രതിരോധിക്കുന്നതിന് കാരറ്റ് ഉത്തമമാണ്. കാരറ്റിലെ വിറ്റമിന് സി ചര്മ്മാരോഗ്യത്തിന് വളരെയധികം നല്ലതാണ് . കാരറ്റ് ജ്യുസിൽ വിറ്റാമിൻ സിയുടെ അളവ് കൂടുതലാണ്. ഇത് ശ്വാസകോശ സംബന്ധമായ ശ്വാസംമുട്ടലിനും ആസ്തമക്കുമുള്ള സാധ്യത കുറക്കുന്നു. മറ്റു കിഴങ്ങുവർഗങ്ങളെ വച്ചുനോക്കുമ്പോൾ ഊർജ്ജം കുറഞ്ഞ കാരറ്റ് അമിതവണ്ണമുള്ളവർക്കും മിതമായ രീതിയിൽ കഴിക്കാവുന്നതാണ്. പച്ച കാരറ്റ് കഴിക്കുന്നതിനെക്കാൾ ഗുണം കൂടുന്നത് പാചകം ചെയ്തു കഴിക്കുമ്പോഴാണ്.
അമിതമായാൽ അമൃതും വിഷമാണ് എന്ന് പറയുന്നത് പോലെ അമിതമായി കാരറ്റ് കഴിക്കുന്നത് രക്തത്തിൽ കരോട്ടിൻ കൂടുതലാകാനും ത്വക്കിനു മഞ്ഞനിറം ഉണ്ടാകാനും സാധ്യതയുണ്ട്. മിതമായ രീതിയില് പച്ച കാരറ്റ് കഴിക്കുന്നതാണ് ശരീരത്തിന് നല്ലത്. ഉപയോഗം അമിതമായാല് വിവിധ ആരോഗ്യ പ്രശ്നങ്ങള് ഉണ്ടാകുമെന്ന കാര്യത്തില് സംശയമില്ല. രക്തത്തില് കരോട്ടിന്റെ അളവ് കൂടുതലാകും എന്നതാണ് പ്രധാന പ്രശ്നം. കരോട്ടിന് രക്തത്തില് കലരുമ്പോള് ചര്മ്മം ഓറഞ്ച് നിറത്തിലേക്ക് മാറുന്നതും ആരോഗ്യ പ്രശ്നങ്ങള്ക്ക് കാരണമാകും. അപ്പോൾ മിതമായ രീതിയിൽ കാരറ്റിനെ കഴിക്കൂ.
https://www.facebook.com/Malayalivartha