വിദേശനാടുകളിലടക്കം ഏറെ ആവശ്യക്കാരുള്ള മത്സ്യമായ കലവയുടെയും വംശം അപകടത്തില്‍. ഇപ്പോള്‍ നിലനില്‍ക്കുന്ന സാഹചര്യത്തിലാണെങ്കില്‍ രാജ്യന്തര വിപണിയില്‍ ഉയര്‍ന്ന കച്ചവടമൂല്യമുള്ള കലവയുടെ നിലനില്‍പ്പ് അവതാളത്തിലാകും. വര്‍ധിച്ചു വരുന്ന അമിത മത്സ്യബന്ധനമാണ് കലവയെ പ്രതിസന്ധിയിലാക്കിയിരിക്കുന്നത്. മത്സ്യയിനങ്ങളുടെ നിലനില്‍പ്പിനെക്കുറിച്ച് വിലയിരുത്തുന്നതിനുള്ള രാജ്യാന്തര സംഗമത്തിലാണ് അമിതമത്സ്യബന്ധനം ഈ മീനുകള്‍ക്കുമേല്‍ സമ്മര്‍ദ്ദമേറുന്നതായി കണ്ടെത്തിയത്. കലവയെ സംരക്ഷിക്കുന്നതിനായുള്ള മാര്‍ഗങ്ങള്‍ ഉടന്‍ സ്വീകരിച്ചില്ലെങ്കില്‍ നിലനില്‍പ്പ് തന്നെ അപകടത്തിലാകുമെന്നാണ് വിദഗ്ധര്‍ പറയുന്നത്. ഏതു സാഹചര്യത്തിലും മികച്ച വളര്‍ച്ച, ഏറെ സ്വാദുള്ള മത്സ്യം എന്നതാണു കലവയുടെ പ്രത്യേകത.

കടലില്‍ നിന്നു ലഭിക്കുന്ന കലവയ്ക്കു കിലോയ്ക്ക് 400 മുതല്‍ 450 രൂപ വരെ ലഭിക്കുന്നു. അതേ സമയം കൃഷി ചെയ്‌തെടുക്കുന്ന കവല മത്സ്യത്തിന് വിദേശ വിപണിയില്‍ ഇവയുടെ മൂന്നും നാലും ഇരട്ടിവരെ ലഭിക്കുന്നുണ്ട്. ഉയര്‍ന്ന വിപണന മൂല്യമുള്ള ഈ മത്സ്യങ്ങളെ അമിതമായി പിടിക്കുന്നത് ഇവയുടെ വംശനാശത്തിന് കാരണമായേക്കാമെന്ന് മത്സ്യശാസ്ത്രജ്ഞര്‍ ചൂണ്ടിക്കാട്ടി. ചെറുമീനുകളെ പിടിയ്ക്കുന്നത് തടയുന്നില്ലെങ്കില്‍ കലവ ഇന്ത്യയില്‍ നിന്നും അപ്രത്യക്ഷമാകുമെന്നാണ് ശാസ്ത്രഞ്ജര്‍ പറയുന്നത്. പ്രായപൂര്‍ത്തിയെത്തുന്നതിലെ കാലതാമസവും ഒന്നിച്ചു മുട്ടയിടുന്നതും വളര്‍ച്ചയ്ക്കിടയില്‍ സംഭവിക്കുന്ന ലിംഗവ്യത്യാസവുമാണ് ഈ മത്സ്യങ്ങള്‍ അമിത മത്സ്യബന്ധനത്തിന് ഇരയാകുന്നതിന് കാരണമാകുന്നതെന്നും അവര്‍ വ്യക്തമാക്കി.