പോഷകങ്ങളടങ്ങിയ ഭക്ഷണവും വ്യായാമവുമാണ് മികച്ച ആരോഗ്യത്തിന് വേണ്ടത്. എന്നാലും 50 വയസ്സുകഴിഞ്ഞാൽ സ്ത്രീകൾക്ക് സാധാരണ ഭക്ഷണവും വ്യായാമവും കൊണ്ട് മാത്രം ഊർജസ്വലത നിലനിർത്താനാവില്ല .ഭക്ഷണത്തിൽ ഇനി പറയുന്ന സപ്പ്ളിമെന്റുകൾ അടങ്ങിയിട്ടുണ്ടെന്നു ഉറപ്പുവരുത്തണം ചെറുപ്രായത്തില്‍, ആര്‍ത്തവം, ഗര്‍ഭകാലം, മുലയൂട്ടല്‍ എന്നീ ജൈവികപ്രവര്‍ത്തനങ്ങള്‍ക്കുവേണ്ടി ശരീരത്തെ സജ്ജമാക്കാനും പ്രായമേറുമ്പോള്‍ ഇവമൂലം ശരീരത്തിനുണ്ടായ നഷ്ടങ്ങള്‍ നികത്താനും പോഷകങ്ങള്‍ അത്യാവശ്യമാണ്.

50 വയസ്സുകഴിഞ്ഞാൽ മുടി നരച്ചും ചർമ്മത്തിൽ ചുളിവുകൾ പ്രത്യക്ഷപ്പെട്ടും തുടങ്ങിയിരിക്കും. ഈ അവസരത്തിൽ, മുപ്പതുകളിലോ നാൽപ്പതുകളിലോ എത്തിനിൽക്കുന്നതു പോലെയാവില്ല നിങ്ങളുടെ ശരീരം. അതിനാൽ, ശരീരത്തിന് മുമ്പു നൽകിയിരുന്നതിനെക്കാൾ കൂടുതൽ ശ്രദ്ധ നൽകുക. സന്തുലിതമായ ഭക്ഷണക്രമത്തിനൊപ്പം ചില സപ്ളിമെന്റുകൾ കൂടി ഉൾപ്പെടുത്തുന്നത് നിങ്ങളുടെ ശരീരത്തിന് മുമ്പുണ്ടായിരുന്ന ആരോഗ്യം നിലനിർത്താൻ സഹായിക്കും. ഇത് രോഗങ്ങൾ മൂലമുള്ള ബുദ്ധിമുട്ടുകൾ ഇല്ലാതാക്കുന്നതിനും സഹായിക്കും.

വൈറ്റമിനുകളും ധാതുക്കളും ശാരീരിക പ്രവർത്തനങ്ങൾ ശരിയായ രീതിയിൽ നടക്കാൻ സഹായിക്കുന്നു. ക്യാൻസർ, ഹൃദ്രോഗങ്ങൾ തുടങ്ങിയ രോഗാവസ്ഥകൾക്കെതിരെ പൊരുതുന്നതിനും ഇവ സഹായകരമാണ്‌
വൈറ്റമിൻ ബി12 (Vitamin B12)

നാൽപ്പതു കഴിയുന്നതോടെ, നിങ്ങൾക്ക് വേണ്ട സപ്ളിമെന്റുകളുടെ പട്ടികയിൽ പ്രധാന സ്ഥാനം നൽകേണ്ടത് വൈറ്റമിൻ ബി12 ന് ആണ്. രക്തം, തലച്ചോർ എന്നിവയുടെ പ്രവർത്തനങ്ങൾ ശരിയായ രീതിയിൽ നടക്കുന്നതിന് വൈറ്റമിൻ ബി12 അത്യാവശ്യമാണ്. മത്സ്യം, മുട്ട, കോഴിയിറച്ചി, പാൽ ഉത്പന്നങ്ങൾ എന്നിവയിൽ വൈറ്റമിൻ ബി12 അടങ്ങിയിട്ടുണ്ട്.

കാത്സ്യം (Calcium)
എല്ലുകൾക്ക് ബലക്ഷയം ഉണ്ടാകാതിരിക്കുന്നതിനും ഒടിവുകൾ പറ്റുന്നതിനെ പ്രതിരോധിക്കുന്നതിനും കാൽസ്യത്തിനു വളരെ വലിയ പങ്കാണു വഹിക്കാനുള്ളത്. നാല്പതു കഴിഞ്ഞാൽ പൊതുവെ കാൽസ്യത്തിന്റെ അഭാവം കാണപ്പെടാൻ തുടങ്ങും. പേശികൾക്കും ഞരമ്പുകൾക്കും ഹൃദയത്തിന്റെ പ്രവർത്തനങ്ങൾക്കുമടക്കം ശരീരത്തിന്റെ അടിസ്ഥാനപരമായ പ്രവർത്തനങ്ങൾക്ക് കാത്സ്യം അത്യാവശ്യമാണ്. ആവശ്യത്തതിന് കാൽസിയം ലഭിച്ചില്ലെങ്കിൽ അത് എല്ലുകളിൽ നിന്ന് അലിയിച്ചെടുക്കും. ഇത് എല്ലുകൾ ദുർബലപ്പെടാൻ കാരണമാവും.
പാൽ ഉത്പന്നങ്ങൾ, ചീര, ബ്രോക്കോളി, ബദാം എന്നിവ ഉൾപ്പെടുത്തിയുള്ള ഒരു സമീകൃതമായ ഭക്ഷണക്രമം പിന്തുടരുന്നതിലൂടെ ശരീരത്തിന് ആവശ്യമായ കാത്സ്യം ലഭ്യമാക്കാൻ സാധിക്കും.

ഒരു സ്ത്രീക്ക് ഒരു ദിവസത്തെ ഭക്ഷണത്തിലൂടെ ശരാശരി 600 mg കാത്സ്യം ലഭ്യമാക്കണമെന്നാണ് ശുപാർശചെയ്യപ്പെടുന്നത്. നിങ്ങളുടെ ശാരീരികാവസ്ഥയെ അടിസ്ഥാനമാക്കി, കൂടുതൽ കാത്സ്യം ആവശ്യമുണ്ടോ എന്ന് ഡോക്ടർ നിശ്ചയിക്കും.

വൈറ്റമിൻ ഡി (Vitamin D)
പ്രായവുമായി ബന്ധപ്പെട്ട അസുഖങ്ങളിൽ നിന്ന് സംരക്ഷണം നൽകുന്നതിന് വൈറ്റമിൻ ഡി യുടെ പങ്ക് വളരെ വലുതാണ്. വൈറ്റമിൻ ഡി യുടെ അപര്യാപ്തതയുള്ള സ്ത്രീകൾക്ക്, ഹൃദ്രോഗം, മൾട്ടിപ്പിൾ സ്ക്ളീറോസിസ്, സ്തനാർബുദം പോലെയുള്ള ക്യാൻസർ വകഭേദങ്ങൾ തുടങ്ങിയവയ്ക്കുള്ള അപകടസാധ്യത കൂടുതലാണെന്നാണ് കണക്കാക്കപ്പെടുന്നത്.

പാൽ ഉത്പന്നങ്ങൾ, ധാന്യങ്ങൾ, സെറിയലുകൾ, മത്സ്യം എന്നിവയിൽ വൈറ്റമിൻ ഡി ധാരാളമായി അടങ്ങിയിട്ടുണ്ട്.

മഗ്നീഷ്യം (Magnesium)
രക്തസമ്മർദത്തെ നിയന്ത്രിക്കുന്ന ഒരു പ്രധാനപ്പെട്ട പോഷകമാണ് മഗ്നീഷ്യം. നാൽപ്പതു കഴിഞ്ഞ സ്ത്രീകൾക്ക് രക്തസമ്മർദം അധികരിക്കുന്നതു മൂലമുള്ള അപകടസാധ്യത കൂടുതലായിരിക്കും. പേശികൾ, ഞരമ്പുകൾ, ഹൃദയം എന്നിവയുടെ പ്രവർത്തനത്തിൽ മഗ്നീഷ്യത്തിനു പ്രധാനപ്പെട്ട പങ്കുവഹിക്കാനുണ്ട്.

ഭക്ഷണത്തിലെ മഗ്നീഷ്യത്തിന്റെ പോരായ്മ മൂലം പ്രമേഹം, ഹൃദ്രോഗങ്ങൾ, കോശജ്വലനം സംബന്ധിച്ച അവസ്ഥകൾ (ഇൻഫ്ളമേറ്ററി കണ്ടീഷൻസ്) എന്നിവ ഉണ്ടാകാനുള്ള സാധ്യതയുണ്ട്. അണ്ടിപ്പരിപ്പ് ഉൾപ്പെടെയുള്ള നട്സുകൾ, വെണ്ണപ്പഴം, ഇരുണ്ട പച്ചനിറത്തിലുള്ള ഇലക്കറികൾ, സോയ ഉത്പന്നങ്ങൾ, പയർവർഗങ്ങൾ എന്നിവയിൽ നിന്ന് നമുക്ക് ആവശ്യത്തിനുള്ള മഗ്നീഷ്യം ലഭിക്കും.

Potassium (പൊട്ടാസ്യം)
രക്തസമ്മർദത്തെ നിയന്ത്രിക്കുന്ന ഘടകമായതിനാൽ പൊട്ടാസ്യം വളരെ പ്രധാനമാണ്. ഭക്ഷണത്തിൽ കൂടുതൽ പൊട്ടാസ്യം ഉൾപ്പെടുത്തുന്നത് സ്ത്രീകളിൽ പക്ഷാഘാതത്തിനുള്ള സാധ്യത കുറയ്ക്കുമെന്ന് ‘ആൽബർട്ട് ഐൻസ്റ്റീൻ കോളജ് ഓഫ് മെഡിസിൻ’ ൽ നടത്തിയ ഒരു പഠനം വെളിപ്പെടുത്തുന്നു.

നേന്ത്രപ്പഴം, മധുരക്കിഴങ്ങ്, ബീൻസ്, തുവര മുതലായവ പൊട്ടാസ്യത്തിന്റെ സ്രോതസ്സുകളാണ്.പൊട്ടാസ്യം ആവശ്യത്തിൽ അധികം ശരീരത്തിൽ എത്തുന്നത് ഹൃദയാരോഗ്യത്തിന് നല്ലതായിരിക്കില്ല. സ്ത്രീകൾക്ക് 3.2 ഗ്രാം പൊട്ടാസ്യമാണ് ആവശ്യമുള്ളത് .

ഒമേഗ 3 ഫാറ്റി ആസിഡ് (Omega 3 fatty acid)
ഒമേഗ 3 ഫാറ്റി ആസിഡുകൾ ഭക്ഷണത്തിൽ ഉൾപ്പെടുത്തുന്നത് വളരെ പ്രാധാന്യമർഹിക്കുന്നു. കാരണം, തലച്ചോറിന്റെ പ്രവർത്തനങ്ങളിൽ ഇതിന് വളരെ പ്രധാനപ്പെട്ട പങ്കുവഹിക്കാനുണ്ട്. ശരീരത്തിൽ ഉണ്ടാകുന്ന കോശജ്വലനം സംബന്ധിച്ച പ്രശ്നങ്ങൾ സുഖപ്പെടുത്തുന്നതിനും കാത്സ്യത്തിന്റെ നില ഉയർത്തുന്നതു വഴി എല്ലുകളുടെ ശക്തി വർദ്ധിപ്പിക്കുന്നതിനും ഒമേഗ 3 ഫാറ്റി ആസിഡുകൾ സഹായിക്കുന്നു.

മത്സ്യം, വാൾനട്ട്, ഇലക്കറികൾ, ചണവിത്ത് എന്നിവ ഒമേഗ 3 ഫാറ്റി ആസിഡിന്റെ സ്രോതസ്സുകളാണ്. കഴിക്കേണ്ട അളവ്, പാർശ്വഫലങ്ങൾ എന്നിവയെ കുറിച്ച് മനസ്സിലാക്കുന്നതിന് ഡോക്ടറുടെ ഉപദേശം തേടുക.

പ്രോബയോട്ടിക്കുകൾ (Probiotics)
ദഹനത്തെ സഹായിക്കുമെന്നതിനാലും ആമാശയം ആരോഗ്യമുള്ളതാക്കി നിലനിർത്താൻ സഹായിക്കുമെന്നതിനാലും നാൽപ്പതു കഴിഞ്ഞ സ്ത്രീകൾ പ്രോബയോട്ടിക്കുകൾ കഴിക്കുന്നത് ഗുണം ചെയ്യും. അതിസാരം തുടങ്ങിയ ദഹനസംബന്ധമായ പ്രശ്നങ്ങളിൽ നിന്ന് സംരക്ഷണം നൽകുന്നതിന് പ്രോബയോട്ടിക്കുകൾ സഹായിക്കും. പുളിപ്പിച്ച സോയ ഉത്പന്നങ്ങൾ, തൈർ തുടങ്ങിയ ഭക്ഷണപദാർത്ഥങ്ങളിൽ നിന്ന് പ്രോബയോട്ടിക്കുകൾ ലഭിക്കും.

വിററാമിൻ ഗുളികകൾ ഡോക്ടറുടെ നിർദേശം കൂടാതെ കഴിക്കരുത്. പ്രായമാകുന്നതു തടയാനോ ഓർമശക്‌തി കൂട്ടാനോ മരുന്നില്ല എന്ന സത്യം അംഗീകരിക്കുക.