എള്ള് കാഴ്ചയില്‍ ചെറുതാണ് എങ്കിലും ഗുണങ്ങളില്‍ വമ്പനാണ്. വളരെക്കാലം മുന്‍പു തന്നെ ഇലകള്‍ക്കോ പഴങ്ങള്‍ക്കോ വേണ്ടിയല്ലാതെ വിത്തിനും എണ്ണയ്ക്കും വേണ്ടി മനുഷ്യര്‍ ഉപയോഗിച്ചിരുന്ന സസ്യമാണിത്.

എള്ളില്‍ 55 ശതമാനം എണ്ണയും 20 ശതമാനം പ്രോട്ടീനും ഉണ്ട്. ഫാറ്റി ആസിഡുകളുടെയും ചില അമിനോ ആസിഡുകളുടെയും കലവറ ആണിത്. എള്ളെണ്ണയില്‍ ലിനോലെനിക് ആസിഡ്, ഒലേയിക് ആസിഡ് ഇവയുണ്ട്. കൂടാതെ അമിനോ ആസിഡുകളായ ലൈസിന്‍, ട്രിപ്പ്‌റ്റൊഫാന്‍, മെഥിയോനൈന്‍ എന്നിവയുമുണ്ട്.

ഒരു ടേബിള്‍ സ്പൂണ്‍ എള്ളില്‍ 52 കാലറി ഉണ്ട്. കൂടാതെ കൊഴുപ്പ്, കാര്‍ബോ ഹൈഡ്രേറ്റ്, പ്രോട്ടീന്‍, കോപ്പര്‍, മാംഗനീസ്, കാല്‍സ്യം, മഗ്‌നീഷ്യം, ഇരുമ്പ്, ഫോസ്ഫറസ്. സിങ്ക്, തയാമിന്‍ ഇവയും അടങ്ങിയിരിക്കുന്നു.

എള്ളിന്റെ ആരോഗ്യ ഗുണങ്ങള്‍ അറിയണോ?

ഫലപ്രദമായി പ്രമേഹം തടയും. എള്ളില്‍ മഗ്‌നീഷ്യവും മറ്റ് പോഷകങ്ങളുമുണ്ട്. എള്ളെണ്ണ പ്രമേഹം തടയാന്‍ സഹായിക്കുന്നു. കൂടാതെ പ്ലാസ്മ, ഗ്ലൂക്കോസ് നില മെച്ചപ്പെടുത്താനും സഹായിക്കുന്നു. എള്ളിലടങ്ങിയ മഗ്‌നീഷ്യം രക്തസമ്മര്‍ദം കുറയ്ക്കാന്‍ സഹായിക്കും. കൊളസ്‌ട്രോള്‍ ഉല്‍പ്പാദനം തടയുന്ന ഫൈറ്റോസ്‌റ്റെറോളുകള്‍ എള്ളിലടങ്ങിയിട്ടുണ്ട്. കറുത്ത എള്ളിലാണ് ഫൈറ്റോസ്‌റ്റെറോള്‍ ധാരാളം ഉള്ളത്.

അര്‍ബുദത്തെ പ്രതിരോധിക്കുന്ന സംയുക്തങ്ങളായ ഫൈറ്റിക് ആസിഡ്, മഗ്‌നീഷ്യം, ഫൈറ്റോസ്‌റ്റെറോള്‍ ഇവ എള്ളിലുണ്ട്. സമ്മര്‍ദം അകറ്റാന്‍ സഹായിക്കുന്ന ധാതുക്കള്‍ ആയ മഗ്‌നീഷ്യം, കാല്‍സ്യം ഇവ എള്ളിലുണ്ട്. തയാമിന്‍, പെറ്റോഫാന്‍ മുതലായ ജീവകങ്ങളുമുണ്ട്. ഇത് സെറോടോണിന്‍ എന്ന ഹോര്‍മോണിന്റെ ഉത്പ്പാദനം കൂട്ടുന്നു.

കറുത്ത എള്ളില്‍ ഇരുമ്പ് ധാരാളമുണ്ട്. വിളര്‍ച്ചയ്ക്കും ക്ഷീണത്തിനും എള്ള് ഗുണകരം. സന്ധിവാതത്തില്‍ നിന്ന് ആശ്വാസം നല്‍കാന്‍ എള്ളിന് കഴിയും. എള്ളില്‍ ധാരാളം കോപ്പര്‍ അടങ്ങിയിട്ടുണ്ട്. ഇതാണ് സന്ധിവാതത്തെ തടയുന്നത്. വേദന കുറയ്ക്കുകയും എല്ലുകളെയും സന്ധികളെയും രക്തക്കുഴലുകളെയും ശക്തിപ്പെടുത്തുകയും ചെയ്യുന്നു.

നാരുകള്‍ ധാരാളം ഉള്ളതിനാല്‍ ദഹനം സുഗമമാക്കുകയും മലബന്ധം അകറ്റുകയും ചെയ്യുന്നു. മുടി കൊഴിച്ചില്‍ തടയുന്നു. എള്ള് മുടിയുടെ വേരുകളെ ബലപ്പെടുത്തുന്നു. എള്ളിലടങ്ങിയ ഒമേഗ ഫാറ്റി ആസിഡുകള്‍ മുടി വളരാന്‍ സഹായിക്കുന്നു. അതോടൊപ്പം തലയോട്ടിയെ എണ്ണമയമുള്ളതാക്കുന്നു. മുടി നരയ്ക്കുന്നതിനെയും തടയുന്നു.

എള്ളിലടങ്ങിയ നിരോക്‌സീകാരികള്‍ പ്രായമാകലിനെ തടയുന്നു. ചര്‍മത്തിനു യുവത്വമേകുന്നു. എള്ളെണ്ണ ചര്‍മത്തെ മൃദുവാക്കുന്നു. ആന്റി ഇന്‍ഫ്ലമേറ്ററി ഗുണങ്ങള്‍ ഉള്ളതിനാല്‍ ചുവപ്പ്, തടിപ്പ്, മുഖക്കുരു ഇവയെ എല്ലാം അകറ്റുന്നു. എള്ളിലടങ്ങിയ എണ്ണ പല്ലിലെ പ്ലാക്ക് അകറ്റി ആരോഗ്യമേകുന്നു. കാല്‍സ്യവും സിങ്കും കറുത്ത എള്ളില്‍ ധാരാളമുണ്ട്. ഇത് എല്ലുകള്‍ക്ക് ശക്തിയേകുന്നു.

എള്ളില്‍ കൊഴുപ്പ് ധാരാളം അടങ്ങിയിട്ടുണ്ട്. കൂടാതെ പോളി അണ്‍സാച്ചുറേറ്റഡ് ഫാറ്റി ആസിഡ്, ഒമേഗ 6 ഇവയും എള്ളിലുണ്ട്. നാരുകള്‍, ഇരുമ്പ്, കാല്‍സ്യം, മഗ്‌നീഷ്യം, ഫോസ്ഫറസ് ഇവയെല്ലാം ഊര്‍ജ്ജ നില വര്‍ധിപ്പിക്കുന്നു. എള്ളിലടങ്ങിയ ആന്റിഓക്‌സിഡന്റ് ആന്റി ഇന്‍ഫ്‌ലമേറ്ററി സംയുക്തമായ സെസാമോള്‍ അതിറോസ്‌ക്ലീറോസിസ് തടയുന്നു. ഹൃദയാരോഗ്യമേകുന്നു.

റേഡിയേഷന്‍ ചികിത്സ മൂലം ഉണ്ടായ ഡി എന്‍ എ തകരാറുകള്‍ പരിഹരിക്കാന്‍ എള്ളിലടങ്ങിയ സെസാമോളിനും എള്ളെണ്ണയ്ക്കും കഴിയും. കരളിന്റെ ആരോഗ്യകരമായ പ്രവര്‍ത്തനത്തിനും എള്ള് സഹായകമാണ്. ശിശുക്കളില്‍ എള്ളെണ്ണ പുരട്ടി തടവുന്നത് കുട്ടികളിലെ വളര്‍ച്ചയ്ക്കും നല്ല ഉറക്കം ലഭിക്കാനും സഹായകം. കൂടാതെ ഡയപ്പര്‍റാഷ് തടയാനും എള്ളെണ്ണ നല്ലതാണ്. എള്ളിലടങ്ങിയ മഗ്‌നീഷ്യം ശ്വാസകോശ സംബന്ധമായ രോഗങ്ങളെ തടയാന്‍ സഹായിക്കുന്നു.