അമിതമായ ഭക്ഷണവും വ്യായാമത്തിന്റെ അഭാവവുമാണു കൂടുതല്‍ പേരുടെയും കുടവയറിനു കാരണം. അമിതമായെത്തുന്ന ഗ്ലൂക്കോസ് കൊഴുപ്പാക്കി ശരീരത്തില്‍ സംഭരിക്കപ്പെടുന്നു. കുടലില്‍ ഒമെന്റം എന്ന ഭാഗത്താണ് ആവശ്യമില്ലാത്ത കൊഴുപ്പ് അടിഞ്ഞു കൂടുന്നത് . ഇതാണ് വയറുചാട്ടത്തിന് പ്രധാന കാരണം. വ്യായാമമില്ലായ്മയും കുടവയറിനു കാരണമാകും. ദീര്‍ഘനേരം ഇരുന്ന് ജോലി ചെയ്യുന്നവരില്‍ കുടവയറുണ്ടാകാനുളള സാധ്യത കൂടുതലാണ്. ചിലരില്‍ വയറിലെ മസിലുകളുടെ അമിതമായ അയവ് മൂലവും കുടവയറുണ്ടാകും.
അമിതവണ്ണമുളളവരിലാണു സാധാരണ കുടവയര്‍ കാണുക. വയര്‍ മാത്രമാണ് കൂടുതലെങ്കില്‍ എത്രയും പെട്ടെന്ന് ഡോക്ടറെ കാണണം. ഇത് രോഗലക്ഷണമാകാനാണു സാധ്യത. ലിവര്‍ സിറോസിസ് പോലുളള അസുഖമുളളവരില്‍ ഇങ്ങനെ കാണാറുണ്ട്. കുടവയറുളളവര്‍ക്കു ടൈപ്പ് 2 ഡയബറ്റീസ്, ഹൃദ്രോഗങ്ങള്‍ തുടങ്ങിയവ ഉണ്ടാവാനുളള സാധ്യത കൂടുമെന്ന് മറക്കേണ്ട.
കുടവയറിനെ ഒളിപ്പിച്ചു വയ്യ്ക്കരുത്. മടി മാറ്റിവച്ചു കൃത്യമായി വ്യായാമം ചെയ്തു നോക്കൂ. ഒപ്പം ജീവിത ശൈലീ ക്രമീകരണവും ഉണ്ടെങ്കില്‍ കുറഞ്ഞ നാളുകള്‍ക്കുളളില്‍ വയര്‍ കുറയ്ക്കാനാകും. വയര്‍ കുറയ്ക്കാനായി യോഗയില്‍ ധനുരാസനം എന്ന യോഗ വളരെ ഉത്തമമമാണ്. അതൊന്നു ശീലിച്ചാല്‍ വയര്‍ കുറയ്ക്കാനാകും. ധനുരാസനം എങ്ങനെ ചെയ്യാമെന്നു നോക്കാം.....

ആദ്യം കമിഴ്ന്ന് കിടക്കുക,

ശ്വാസം വിട്ടുകൊണ്ട് കാല്‍മുട്ടു മടക്കി, കാല്‍പ്പാദം ഉയര്‍ത്തി, നെഞ്ചുയര്‍ത്തി കൈകള്‍കൊണ്ട് കാല്‍പ്പടത്തില്‍ പിടിക്കുക (ഇപ്പോള്‍ ധനുരാസനമായി).

ശ്വാസം എടുത്തുകൊണ്ട് കൈകള്‍ തിരിച്ച് തോളിന് മുകളിലൂടെയാക്കുക. കാല്‍വിരലുകളിലാണ് പിടിത്തം. വയറിലാണ് ഭാരം മുഴുവന്‍. കാലുകള്‍ അടുപ്പിക്കാന്‍ ശ്രമിക്കുക. (കാലുകള്‍ തലയില്‍ ചേര്‍ക്കുകയും ആവാം).

45 തവണ ശ്വാസോച്ഛ്വാസം ചെയ്ത ശേഷം തിരിച്ചുവരിക.

ഗുണങ്ങള്‍:
ഭുജംഗാസനത്തിന്റെയും ശലഭാസനത്തിന്റെയും ഗുണങ്ങള്‍ ഇതിനു കിട്ടും. വയറിന് പരമാവധി വലിവു കിട്ടും. വയറിലെ വണ്ണം കുറയും. കാലിലെ സന്ധികള്‍ക്കും പേശികള്‍ക്കും നട്ടെല്ലിനും വലിവ് കിട്ടുന്നു. ഉദരത്തിലെ അവയവങ്ങള്‍ക്കും ഗ്രന്ഥികള്‍ക്കും മര്‍ദം കിട്ടുന്നു. വയറ് കുറയുന്നു. നാഭീചക്രത്തിന്റെ പ്രവര്‍ത്തനം സുഖകരമാവും. ദഹനശക്തി കൂടും. വയറിന്റെ ഭാഗത്തുള്ള മറ്റ് അവയവങ്ങള്‍ക്കും ഉണര്‍വു നല്‍കും. അതുകൊണ്ടുതന്നെ, പ്രമേഹത്തിന് നല്ലതാണ് രക്തശുദ്ധിയുണ്ടാകും.

നട്ടെല്ലിന് നല്ല അയവു കിട്ടും. കഴുത്തിലെ ഗ്രന്ഥികള്‍ക്കും ഗുണപ്രദമാണ് തോളെല്ലുകള്‍ക്കും ഗുണകരമാണ് കഴുത്തും ചുമലുകളും വിരിയുന്നു. ശരീരത്തിന് ആകൃതി നല്‍കുന്നു. പിരിമുറുക്കം കുറയ്ക്കുന്നു. ആര്‍ത്തവ പ്രശ്‌നങ്ങളകറ്റുന്നു. ശരീരത്തിന്റെ ഭാരം കുറയ്ക്കാനും സഹായകരമാണ്. അനേകം ഗുണങ്ങളുള്ള ആസനമാണിത്