ഭാരം കുറയ്ക്കുന്നവര് ശ്രദ്ധിക്കാന്...
മിക്കവാറും പേര് ഇപ്പോള് ഭാരം കുറക്കാനും സീറോ സൈസാകാനും ആഗ്രഹിക്കുന്നവരാണ് . അതിനുവേണ്ടി പട്ടിണി കിടന്നും പലവിധ ഡയറ്റുകള് പരീക്ഷിച്ചും വലഞ്ഞവരായിരിക്കും പലരും. എന്നാല് ഭാരം കുറക്കാന് ചെയ്യുന്ന കാര്യങ്ങളിലെ സത്യവും മിഥ്യയും ഒന്നു നോക്കാം...
അമിതഭാരം കുറക്കാന് കാര്ബോഹൈഡ്രേറ്റ് ഒഴിവാക്കണമെന്നാണ് എല്ലാവരുടെയും ചിന്ത. ഇതിനായി കാര്ബോഹൈഡ്രേറ്റ് അടങ്ങിയ എല്ലാ ഭക്ഷണവും ഒഴിവാക്കി ഊര്ജം നഷ്ടപ്പെട്ട അവസ്ഥയിലെത്തുകയാണ് ജനങ്ങള്. എന്നാല് തന്റെ ഭക്ഷണത്തില് എന്ത് കാര്ബോഹൈഡ്രേറ്റാണ് അടങ്ങിയതെന്നാണ് ആദ്യം ശ്രദ്ധിക്കേണ്ടത്. അനാരോഗ്യകരമായ കാര്ബോഹൈഡ്രേറ്റുകളായ പൊട്ടറ്റോ ചിപ്സ്, ബര്ഗര്, പിസ്സ, മറ്റ് പഞ്ചസാര അടങ്ങിയ ഭക്ഷണ പദാര്ഥങ്ങള് എന്നിവ നിര്ബന്ധമായും ഒഴിവാക്കണം.
എന്നാല് ആരോഗ്യകരമായ കാര്ബോഹൈഡ്രേറ്റ് അടങ്ങിയ ഭക്ഷണങ്ങള് കഴിക്കണം. ബീന്സ്, പയര് തുടങ്ങിയ പച്ചക്കറികള്, പഴങ്ങള്, ധാന്യങ്ങള് എന്നിവ ഭക്ഷണത്തില് അടിസ്ഥാനപരമായി ഉള്പ്പെടുത്തേണ്ടവയാണ്.
ഭാരം കുറക്കാനുള്ളതിന്റെ ആദ്യത്തെതും അടിസ്ഥാനപരവുമായ നിയമം ഒരിക്കലും ഭക്ഷണം ഒഴിവാക്കരുതെന്നാണ്. ഭക്ഷണം ഒഴിവാക്കുമ്പോള് ശരീരം മെറ്റാബോളിസം സാവധാനമാക്കി ഊര്ജ്ജം സംഭരിച്ചുവെക്കാന് ശ്രമിക്കും. ദിവസത്തിനൊടുവില് ഇത് അമിത ഭക്ഷണം അതും അനാരോഗ്യകരമായ ഭക്ഷണപദാര്ഥങ്ങള് കഴിക്കുന്നതിലേക്ക് നയിക്കുകയും ചെയ്യും.
കാര്ബോ ഹൈഡ്രേറ്റിന്റെ കാര്യത്തില് എന്നപോലെയാണ് കൊഴുപ്പിലും. എല്ലാ കൊഴുപ്പും അനാരോഗ്യകരമല്ല. മനുഷ്യശരീരത്തിന് അത്യന്താപേക്ഷിതമായ ഒന്നാണ് കൊഴുപ്പ്. അതിനാല് തന്നെ കൊഴുപ്പിനെ നിങ്ങളുടെ ഭക്ഷണക്രമത്തില് നിന്ന് ഒഴിവാക്കരുത്. കൊഴുപ്പ് ഒഴിവാക്കുന്നത് ഭാരം കുറക്കുകയില്ല. ആരോഗ്യകരമായ കൊഴുപ്പ് അടങ്ങിയ നട്സ്, സീഡ്സ്, തൈര്, ഒലീവ് ഓയില്, അവകാഡോ, പാല്ക്കട്ടി, പാല് എന്നിവ ഭക്ഷണത്തില് ഉള്പ്പെടുത്താം.
പ്രിയപ്പെട്ട ഭക്ഷണങ്ങള് ഒഴിവാക്കേണ്ടി വരുമെന്നാണ് ഭാരം കുറക്കാന് ഡയറ്റ് തുടങ്ങുന്നവരുടെ ഏറ്റവും വലിയ വിഷമം. എന്നാല് ഇത് തെറ്റിദ്ധാരണ മാത്രമാണ്. കലോറി കൂടിയ ഭക്ഷണങ്ങളോടാണ് പ്രിയം കൂടുതലെങ്കില് അത് അളവ് കുറച്ച് ഡയറ്റില് ഉള്പ്പെടുത്താം. കഴിക്കുന്ന ഭക്ഷണത്തിലെ ആകെ കലോറിയുടെ അളവ് കൂടാതിരുന്നാല് മതി.
"
https://www.facebook.com/Malayalivartha