കുളിര്‍മയേകുന്ന ആരോഗ്യപാനീയമുണ്ടാക്കാന്‍ കറ്റാര്‍വാഴ
സൗന്ദര്യ വര്‍ദ്ധക ലേപനങ്ങളിലും കേശസംരക്ഷണ തൈലങ്ങളിലും പ്രചാരത്തിലുളള കറ്റാര്‍വാഴ ഭക്ഷ്യയോഗ്യവുമാണ്. ധാരാളം ജീവകങ്ങളും ധാതുക്കളും അടങ്ങിയ ഇവയുടെ ഇലകള്‍ മറുനാട്ടിലെ നാട്ടുചന്തകളില്‍ സുലഭമായിക്കഴിഞ്ഞു. പൂന്തോട്ടങ്ങളിലെ അലങ്കാരപ്പാറകള്‍ക്കിടയില്‍ അഴകേകാനും അനുയോജ്യമാണിവ.
ദഹന സംബന്ധമായ രോഗങ്ങള്‍, ഗര്‍ഭാശയ രോഗങ്ങള്‍, വാതം, കഫം, ചര്‍മ്മരോഗങ്ങള്‍, തീപൊളളിയ വ്രണങ്ങള്‍ എന്നിവയ്‌ക്കെല്ലാം തന്നെ കറ്റാര്‍വാഴ ഔഷധമാണ്. കറ്റാര്‍വാഴ ഇലകളുടെ തൊലി നീക്കി ഉളളിലുളള നേര്‍ത്ത മാംസളമായ ഭാഗമാണ് ഉപയോഗയോഗ്യമായത്. ഇത് ജ്യൂസിനും അച്ചാറിനും ചമ്മന്തിയ്ക്കും വരെ ഉപയോഗിക്കാം. കറ്റാര്‍വാഴയുടെ ഇലപ്പോളകള്‍ പുറന്തൊലി നീക്കി എടുക്കുന്ന മാംസളമായ ഐസ് കട്ടകളോട് സമാനമായ ഭാഗമാണ് ജ്യൂസ് ഉണ്ടാക്കാന്‍ ഉപയോഗിക്കുന്നത്. കറ്റാര്‍വാഴ നീരും നാരങ്ങയും ഇഞ്ചിയും ചേര്‍ത്ത ജ്യൂസും സ്‌ക്വാഷും കുളിര്‍മയേകുന്ന ആരോഗ്യ പാനീയങ്ങള്‍ തന്നെയാണ്.
ഏതുതരം മണ്ണിലും വളരെ പരിമിതമായ പരിചരണത്തില്‍ കറ്റാര്‍വാഴ വളര്‍ത്തിയെടുക്കാം. വേരുപടലം ഉപരിതലത്തിലായതിനാല്‍ നീര്‍വാര്‍ച്ച ഉറപ്പാക്കേണ്ടതാണ്. തണലില്‍ വളരുന്നവയാണെങ്കില്‍ പോലും നല്ല സൂര്യപ്രകാശം ലഭിക്കുന്ന തുറസ്സായ ഇടങ്ങളില്‍ ആണ് മെച്ചപ്പെട്ട വളര്‍ച്ച കാണാറുളളത്. കറ്റാര്‍വാഴയുടെ ചിനപ്പുകള്‍ അഥവാ ഇളപ്പുകള്‍ ആണ് നടാന്‍ ഉപയോഗിക്കുന്നത്.
https://www.facebook.com/Malayalivartha
