ലോക എയ്ഡ്‌സ് ദിനം ആചരിക്കുന്ന ഈ വേളയില്‍ സംസ്ഥാന ആരോഗ്യ വകുപ്പും എയിഡ്‌സ് കണ്‍ട്രോള്‍ സൊസൈറ്റിയും സംയുക്തമായി വിപുലമായ പരിപാടികളാണ് ആസൂത്രണം ചെയ്തിട്ടുള്ളത്. എച്ച്.ഐ.വി. അണുവ്യാപനത്തെ കുറിച്ച് ജനങ്ങളില്‍ അവബോധം സൃഷ്ടിക്കുന്നതിനും, നിലവില്‍ എച്ച്.ഐ.വി. അണു ബാധിതരായിട്ടുള്ളവര്‍ക്ക് ആരോഗ്യ സംരക്ഷണവും സാമൂഹ്യ സുരക്ഷിതത്വവും ഉറപ്പ് വരുത്തുന്നതിനുമാണ് ഈ ദിനം ആചരിക്കുന്നത്. ഈ വര്‍ഷത്തെ ലോക എയ്ഡ്‌സ് ദിന സന്ദേശം ''  '' Know Your HIV Status”. അതായത് ഓരോരുത്തരും അവരവരുടെ എച്ച്.ഐ.വി. സ്ഥിതി അറിയുക എന്നുള്ളതാണ്.

ആഗോളതലത്തില്‍ യു എന്‍ എയ്ഡ്‌സ് ന്റെ ലക്ഷ്യം 2030ടു കൂടി ഈ ഭൂമുഖത്തു നിന്നും എച്ച്.ഐ.വി. യെ തുടച്ചു നീക്കുക എന്നുള്ളതാണ്. ഇതിന്റെ മുന്നോടിയായി 2020 ഓടു കൂടി 909090 എന്ന ലക്ഷ്യം പ്രാപ്തമാക്കുവാനാണ് ആഹ്വാനം ചെയ്തിരിക്കുന്നത്. അതായത് ആദ്യഘട്ടത്തില്‍ എച്ച്.ഐ.വി. അണുബാധയുള്ള 90 ശതമാനം ജനങ്ങളും അവര്‍ എച്ച്.ഐ.വി. അണുബാധിതരാണ് എന്ന് തിരിച്ചറിയുക, തുടര്‍ന്ന് എച്ച്.ഐ.വി. അണുബാധിതരാണ് എന്നു കണ്ടെത്തിയ 90 ശതമാനം ആളുകള്‍ക്കും ആന്റി റിട്രോ വൈറല്‍ ചികിത്സ (ART) ഉറപ്പാക്കുക, എ.ആര്‍.റ്റി ചികിത്സ ലഭ്യമാക്കിയിട്ടുള്ള 90% പേരിലും എച്ച്.ഐ.വി രോഗാണുവിന്റെ പ്രവര്‍ത്തനത്തെ നിയന്ത്രണ വിധേയമാക്കുക. എച്ച്.ഐ.വി അണുബാധിതരായിട്ടുള്ള 90% ആളുകളെയും കണ്ടെത്തുക എന്ന അത്യന്തം ശ്രമകരമായ ആദ്യഘട്ടം വിജയകരമായി പൂര്‍ത്തിയാക്കാന്‍ സാധിച്ചാല്‍ മാത്രമേ നമുക്ക് ഈ ലക്ഷ്യപ്രാപ്തി കൈവരിക്കുവാന്‍ സാധിക്കുകയുള്ളൂ. അതുകൊണ്ടുതന്നെ എച്ച്.ഐ.വി അണുബാധ പിടിപെടാന്‍ സാധ്യതയുള്ള സാഹചര്യങ്ങളില്‍പ്പെടുന്ന ഓരോരുത്തരും അവരവരുടെ എച്ച്.ഐ.വി സ്ഥിതി പരിശോധിച്ച് അറിയേണ്ടതും അണുബാധ ഉണ്ടായതായി കണ്ടെത്തിയാല്‍ ഉടന്‍തന്നെ ചികിത്സ ആരംഭിക്കേണ്ടതും അത്യന്താപേക്ഷിതമാണ്. ഇതിനായി സംസ്ഥാന സര്‍ക്കാരും കേരള സംസ്ഥാന എയ്ഡ്‌സ് നിയന്ത്രണ സൊസൈറ്റിയും സംയുക്തമായി ഒരു വര്‍ഷം നീണ്ടുനില്‍ക്കുന്ന എച്ച്.ഐ.വി പ്രതിരോധ തീവ്രയത്‌ന പരിപാടി സംഘടിപ്പിക്കുന്നുണ്ട്.

കേരളത്തില്‍ നിലവില്‍ എച്ച്.ഐ.വി അണുബാധിതരായി 31612 പേരെയാണ് കണ്ടെത്തിയിട്ടുള്ളത്. സംസ്ഥാനത്ത് മുതിര്‍ന്നവരിലെ എച്ച്.ഐ.വി അണുവ്യാപന തോത് 0.12 ശതമാനമാണെങ്കില്‍ ദേശീയതലത്തില്‍ ഇത് 0.26 ശതമാനമാണ്. മറ്റ് സംസ്ഥാനങ്ങളെ അപേക്ഷിച്ച് കേരളത്തില്‍ എച്ച്.ഐ.വി അണുവ്യാപനതോത് കുറവാണെങ്കിലും ലക്ഷ്യപ്രാപ്തിയിലേക്ക് നാം ഇനിയും ബഹുദൂരം മുന്നോട്ട് പോകേണ്ടതായിട്ടുണ്ട്. സംസ്ഥാന സര്‍ക്കാരും കേരള സംസ്ഥാന എയ്ഡ്‌സ് നിയന്ത്രണ സൊസൈറ്റിയും സംയുക്തമായി നടത്തുന്ന എയ്ഡ്‌സ് പ്രതിരോധ പ്രവര്‍ത്തനങ്ങള്‍ അതിന്റെ ലക്ഷ്യപ്രാപ്തിയില്‍ എത്തണമെങ്കില്‍ എല്ലാവരുടേയും സഹായ സഹകരണങ്ങള്‍ അത്യന്താപേക്ഷിതമാണ്. 909090 എന്ന ലക്ഷ്യത്തിന്റെ ആദ്യപടിയായി നമുക്കേവര്‍ക്കും നമ്മുടെ എച്ച്.ഐ.വി സ്റ്റാറ്റസ് പരിശോധിച്ച് മനസിലാക്കാവുന്നതാണ്. ഇതിനുള്ള സൗകര്യം സംസ്ഥാന ജ്യോതിസ് കേന്ദ്രങ്ങളില്‍ സൗജന്യമായി ലഭിക്കുന്നതാണ്. അവിടെ നല്‍കുന്ന വിവരങ്ങളും പരിശോധനാ ഫലവുമെല്ലാം രഹസ്യമായി സൂക്ഷിക്കുന്നതാണ്. 2030ഓടു കൂടി പുതിയ എച്ച്.ഐ.വി അണുബാധയില്ലാത്ത ഒരു സമൂഹത്തെ സൃഷ്ടിക്കുന്ന ഈ മഹത്തായ വിപ്ലവത്തില്‍ നമ്മുടെ എച്ച്.ഐ.വി സ്ഥിതി അറിഞ്ഞുകൊണ്ട് നമുക്കും പങ്കുചേരാം.