ചര്‍മ്മത്തിലുണ്ടാകുന്ന കുരുക്കള്‍ ശ്രദ്ധിക്കാതെ പോകരുത്.. അവ ചിലപ്പോള്‍ ഗുരുതര പ്രശ്‌നത്തിലേക്ക് നയിച്ചേക്കാം...
ചര്‍മ്മത്തിന് പുറത്തുണ്ടാകുന്ന കുരുക്കള്‍ മിക്കവാറും പേര്‍ക്ക് വലിയൊരു പ്രശ്‌നമാണ്. സൗന്ദര്യ പ്രശ്‌നത്തിനേക്കാളുപരി അത് പലതരം ക്യാന്‍സര്‍ കുരുക്കളുമാകാം. അതിനാല്‍ നിറത്തിലും വലിപ്പത്തിലും വ്യത്യാസമുണ്ടാവുകയാണെങ്കില്‍ എത്രയും വേഗം ഡോക്ടറെ സമീപിക്കേണ്ടത് അത്യാവശ്യമാണ്. സ്രവങ്ങള്‍ ഒലിക്കുന്ന തരത്തിലുള്ള ചര്‍മ്മത്തിലെ പാടുകളോ കുരുക്കളോ ആണെങ്കിലും ഡോക്ടറെ കാണിച്ച് ക്യാന്‍സര്‍ അല്ലെന്ന് ഉറപ്പു വരുത്തണം. കാരണം ചര്‍മത്തിലുണ്ടാവുന്ന സ്‌ക്വാമസ് സെല്‍ കാര്‍സിനോമ, ബേസല്‍ സെല്‍ കാര്‍സിനോമ എന്ന ക്യാന്‍സര്‍ കുരുക്കളുടെ രൂപത്തിലാണ് പ്രകടമാവുന്നത്.
സ്‌ക്വാമസ് സെല്‍ കാര്‍സിനോമ ക്യാന്‍സര്‍ ചര്‍മ്മത്തിന്റെ ഏറ്റവും പുറമെയുള്ള പാളിയെയാണ് ബാധിക്കുന്നത്. സ്‌കിന്‍ ക്യാന്‍സര്‍ ഫൗണ്ടേഷന്റെ കണക്കുകള്‍ അനുസരിച്ച് ഏറ്റവും സാധാരണമായി കണ്ടുവരുന്ന ചര്‍മ്മ ക്യാന്‍സറുകളില്‍ രണ്ടാമത്തേതാണിത്. മുഖം, ചെവി, മൂക്ക്, ചുണ്ടുകള്‍ തുടങ്ങി സൂര്യപ്രകാശവുമായി സമ്പര്‍ക്കത്തിലാവുന്ന ചര്‍മ്മഭാഗങ്ങളെയാണ് കൂടുതലായും സ്‌ക്വാമസ് സെല്‍ ക്യാന്‍സര്‍ (എസ്.സി.സി) ബാധിക്കുന്നത്.സൂര്യപ്രകാശത്തില്‍ നിന്നുള്ള അള്‍ട്രാവയലറ്റ് രശ്മികളാണ് സാധാരണ എസ്.സി.സി കാരണമാവുന്നത്.
ചര്‍മ്മത്തിന്റെ പുറംപാളിയിലെ ലോലമായ സ്‌ക്വാമസ് കോശങ്ങളുടെ ഡിഎന്‍എയില്‍ ഉണ്ടാകുന്ന തകരാറുകള്‍ മൂലമാണ് എസ്.സി.സി ഉണ്ടാകുന്നത്. വെളുത്ത നിറം, (ഇത്തരം ചര്‍മ്മത്തില്‍ മെലാനിന്റെ അംശം കുറവായിരിക്കുകയും അള്‍ട്രാവയലറ്റ് രശ്മികളില്‍ നിന്നുള്ള സംരക്ഷണം ലഭിക്കാതെവരികയും ചെയ്യും) ടാനിംഗ് ബെഡുകളുടെ ഉപയോഗം, സണ്‍ബേണുകള്‍, കുറഞ്ഞ പ്രതിരോധശക്തി തുടങ്ങിയവയാണ് എസ്.സി.സിക്കുള്ള സാധ്യത വര്‍ദ്ധിപ്പിക്കുന്നത്.
എസ്.സി.സി പ്രത്യക്ഷപ്പെടുന്നത് ചുവന്ന പാടുകളായിട്ടാണ്്. ഇവ പൊറ്റപിടിച്ചതോ രക്തമൊലിക്കുന്നതോ ആവാം. ഇവ ഭേദമാകാത്ത മുറിവുകളായും അരിമ്പാറ പോലെയുള്ള വളര്‍ച്ചകളായും കുരുക്കളായും കാണപ്പെടാം. ഇവ ഏതാനും ആഴ്ചകള്‍കൊണ്ട് ഭേദമാകാത്തതോ കാലക്രമേണ വലിപ്പം കൂടുന്നവയോ ആണെങ്കില്‍ ഡോക്ടറുടെ സഹായം തേടണം. മുഖത്തെ കുരു, തടിപ്പ്, മുഴ മുറിച്ചു നീക്കല്‍, മോഹ്‌സ് ശസ്ത്രക്രിയ, ക്രയോസര്‍ജറി, മരുന്നുകള്‍, ലേസര്‍ ശസ്ത്രക്രിയ, റേഡിയേഷന്‍ തുടങ്ങിയ മാര്‍ഗങ്ങളിലൂടെ എസ്.സി.സി ചികിത്സിക്കാം.
"
https://www.facebook.com/Malayalivartha
