പെൺകുട്ടികളെ ബാധിക്കുന്ന പോളി സിസ്റ്റിക് ഓവറി സിൻഡ്രോമിനെ തിരിച്ചറിയാം; പ്രതിവിധികൾ തേടാം
കൗമാരം മുതൽ ഒട്ടേറെ സ്ത്രീകളെ ബാധിക്കുന്ന ആരോഗ്യ പ്രശ്നമാണ് പി സി ഒ എസ്/ പോളി സിസ്റ്റിക് ഓവറി സിൻഡ്രോം. പലരും ഈ രോഗത്തെ നിസ്സാരമായി തള്ളി കളയാറാണ് പതിവ്. പിന്നീട് ഇത് ഗുരുതരമായ ആരോഗ്യ പ്രശ്നങ്ങൾക്ക് ഇടയാക്കും. പെൺകുട്ടികളുടെ ശരീരത്തിൽ ഏറെ മാറ്റം വരുന്ന കൗമാര കാലത്തു തന്നെയാണ് ഇത് പോലുള്ള രോഗങ്ങൾ വരുന്നത്. സ്ത്രീ ഹോർമോണുകളുടെ താളം തെറ്റലിൽ ഉണ്ടാകുന്ന രോഗമാണ് പി സി ഒ എസ്.
പോളി സിസ്റ്റിക് ഓവറി സിൻഡ്രോമിന്റെ ലക്ഷണങ്ങൾ കൗമാര പ്രായത്തോടെയാണ് തുടങ്ങുക. എങ്കിലും പ്രസവ ശേഷവും ആർത്തവ വിരാമ സമയത്തും ചിലരിൽ രോഗ ലക്ഷണങ്ങൾ ഉണ്ടാകാറുണ്ട്. ആർത്തവ പ്രശ്നങ്ങളായ ആർത്തവം വൈകുക, ആർത്തവം നിലയ്ക്കുക, അമിത രക്ത സ്രാവം എന്നിവ ഈ രോഗത്തിന്റെ ലക്ഷണമാണ്.
നെഞ്ച്, ഉദരം, മുഖം കൈ കാലുകളിലും പുരുഷമാരെ പോലെ രോമ വളർച്ച ഉണ്ടാവുകയാണെങ്കിൽ സൂക്ഷിക്കുക. ഇവയൊക്കെ പി സി ഒ എസ്സിലേക്കു നയിക്കും.
കൂടിയ തോതിൽ മുഖക്കുരു, അമിത വണ്ണം, മുടി കൊഴിച്ചിൽ, ചർമ്മത്തിൽ കറുത്ത പാടുകൾ എന്നിവ വന്നാലും ശ്രദ്ധിക്കുക. ഇവയെല്ലാം പോളി സിസ്റ്റിക് ഓവറി സിൻഡ്രോമിന്റെ ലക്ഷണങ്ങൾ ആയിരിക്കും.
പി സി ഒ എസ്സ് ഉള്ള മിക്ക സ്ത്രീകളുടെയും അണ്ഡശയത്തിൽ ദ്രാവകം നിറഞ്ഞ ചെറിയ സിസ്റ്റുകൾ ഉണ്ടാകാറുണ്ട്. ഈ സിസ്റ്റുകൾ പൊട്ടിപ്പോകുമോ, അണുബാധയ്ക്ക് ഇടയാക്കുമോ? ക്യാൻസറിന് കാരണമാകുമോ എന്നൊക്കെ അനവധി പേടികൾ സ്ത്രീകൾക്ക് വരാറുണ്ട്. എന്നാൽ അത്തരം പ്രശ്നങ്ങളൊന്നും ഈ സിസ്റ്റുകൾ ഉണ്ടാക്കാറില്ല. ഇവ ഹോർമോൺ തെറ്റലുകൾക്കു കാരണമാകാറുണ്ട്. ഒരു ഹോർമോണിന്റെ അനുപാതം തെറ്റിയാൽ മറ്റു ഹോർമോണുകളുടെയും താളം തെറ്റലിനു കാരണമാകുന്നു. ഇതൊരു ദീർഘ കാല രോഗമാണ്. വന്ധ്യത, പ്രമേഹം, ഹൃദോഹം എന്നിവയിലേക്ക് ഇത് നയിക്കും. ലക്ഷണങ്ങൾ കണ്ടു തുടങ്ങിയാൽ ഉടൻ ഡോക്ടറെ കണ്ടു പ്രതി വിധികൾ തേടുക.
ആരോഗ്യകരമായ ആഹാര രീതി ശീലിക്കണം. കൊഴുപ്പും മധുരവും അടങ്ങിയവ ധാരാളം കഴിക്കരുത്. ബേക്കറി പലഹാരങ്ങൾ, ജങ്ക് ഫുഡ്, ഫാസ്റ്റ് ഫുഡ്, കോള പോലുള്ള പാനീയങ്ങൾ ഒഴിവാക്കണം. പഞ്ചസാര, ഉപ്പു എന്നിവയുടെ ഉപയോഗം മിതമായിരിക്കണം. ദിവസവും അര മണിക്കൂർ വ്യായാമത്തിനായി ചിലവഴിക്കുക.
പി സി ഒ എസ്സിൻറെ ചികിത്സ പ്രധാനമായും അതിന്റെ ലക്ഷണങ്ങളെ അടിസ്ഥാനമാക്കിയിട്ടുള്ളതാണ്. മറ്റു രീതികളിൽ ഇതിനെ നിയന്ത്രിക്കാൻ കഴിഞ്ഞില്ലായെങ്കിൽ മാത്രമാണ് ശസ്ത്ര ക്രിയയിലേക്കു നീങ്ങുന്നത്.
https://www.facebook.com/Malayalivartha