മലയാള മാസത്തിലെ അവസാന മാസമായ കർക്കടകത്തിലേക്കു എത്തിയിരിക്കുകയാണ് നാം. മലയാളികളെ സംബന്ധിച്ചു കർക്കടകം വെള്ളപ്പൊക്കത്തിന്റെയും തോരാ മഴയുടെയും കാലമാണ്. അത് മാത്രമല്ല ആരോഗ്യ കാര്യത്തിൽ മലയാളികൾ ഏറെ ശ്രദ്ധ പുലർത്തുന്ന കാലം കൂടിയാണ് വന്നിരിക്കുന്നത്. മലയാളികളുടെ ജീവിത രീതി, ആഹാര രീതി ശൈലികൾ എല്ലാം മാറിയിരിക്കുകയാണ്. അത് കൊണ്ടു തന്നെ പുത്തൻ രോഗങ്ങളും നമ്മെ തേടി എത്തിയിട്ടുണ്ടല്ലോ ? രോഗങ്ങളെ പരിഹരിക്കാനും പ്രതിവിധികൾ തേടാനുമുള്ള മാസം കൂടിയാണ് കർകടക മാസം. കർക്കടക മാസത്തിൽ ആരോഗ്യപരമായി എന്തൊക്കെ പുതിയ തീരുമാനങ്ങളിലേക്കു മാറണം എന്ന് ചിന്തിക്കുക കൂടി ചെയ്യാം. 

കർക്കടക കാലത്തു ആരോഗ്യ സംരക്ഷണം എന്ന ലക്ഷ്യത്തോടെ നാം കർക്കടക കഞ്ഞി കുടിക്കാറുണ്ട്. ശരീര ബലം, ദഹന ശക്തി എന്നിവ കർക്കടക മാസത്തിൽ പൊതുവെ കുറഞ്ഞിരിക്കും. ശക്തിയോടെയും ചുറുചുറുക്കോടെയും ഇരിക്കാൻ കർക്കടക കഞ്ഞി കുടിക്കാവുന്നതാണ്. ഇത് രോഗ പ്രതിരോധ ശക്തി കൂട്ടുകയും ത്രിദോഷങ്ങളുടെ സന്തുലിതാവസ്ഥയെ നേരെയാക്കുകയും ചെയ്യും. ദശപുഷ്പങ്ങളായ കറുക , കയ്യോന്നി, വിഷ്ണു ക്രാന്തി, പൂവാം കുറുന്തൽ, മുയൽ ചെവിയൻ, തിരുതാളി, ചെറൂള,ഉഴിഞ്ഞ, മുക്കുറ്റി, നിലപ്പന എന്നിവയുടെ നീരും കർക്കടക കഞ്ഞിയിൽ ചേർത്തിട്ടുണ്ട്. ഞവരയരി, ഗോതമ്പു, മുതിര, യവം തുടങ്ങിയ ധാന്യങ്ങളും കർക്കടക കഞ്ഞിയിൽ അടങ്ങിയിട്ടുണ്ട്. ഇവ കൂടാതെ പഞ്ചകോലം, ജീരകം, അയമോദകം, ഉലുവ തുടങ്ങിയ മരുന്നുകളും നെയ്യുമൊക്കെ അടങ്ങിയ കർക്കടക കഞ്ഞി സേവിക്കുന്നത് നല്ലതാണ്.

മഴക്കാലത്ത് ശരീരത്തിൽ വാതം പ്രകോപിതമാകും. വാതശമനത്തിനായി പ്രഭഞ്ജനവിമർദനം കുഴമ്പ്, ധാന്വന്തരം കുഴമ്പ്, കൊട്ടം ചുക്കാദി തൈലം എന്നിവ ഉപയോഗിച്ചു കുളിക്കാവുന്നതാണ്. അതിനു ശേഷം പത്തു മണിയോടെയാണ് കഞ്ഞി കുടിക്കേണ്ടുന്നത്. നാഡീ ഞരമ്പുകളെ ഉണർത്തി ഊർജസ്വലത നൽകുന്നതിനുള്ള ചികിൽസകളാണ് ഉഴിച്ചിലും തിരുമ്മലും. ഇത്‌ വാതരോഗ ശമനത്തിനും ശരീരത്തിലെ മാലിന്യം വിയർപ്പ്, മലം, മൂത്രം എന്നിവ വഴി പുറന്തള്ളുന്നതിനും ഏറെ സഹായകമാണ്.

നമ്മുടെ തൊടിയിലൊക്കെ കാണപ്പെടുന്ന പത്തില കറികൾക്ക് കർക്കടക കാലത്തുള്ള പ്രാധാന്യം ഏറെയാണ്. തകര, മത്തൻ, താള്, വെള്ളരി, ചീര, കുമ്പളം, വെള്ളരി, ചേന, കുമ്പളം, നെയ്യുണ്ണി, ആനകൊടിത്തൂവ എന്നിവയാണ് പത്തിലകൾ. സുഖചികിൽസയെ കുറിച്ച് ഓർക്കാനുള്ള സമയം കൂടിയാണല്ലോ കർക്കടകം.നമ്മുടെ ശരീരത്തെ ഒന്ന് റീചാർജ് ചെയ്യാനുള്ള കാലം. മനസും ശരീരവും ഒരു വർഷക്കാലത്തേക്ക് ഉന്മേഷത്തോടെ നിലനിർത്താൻ തയാറെടുക്കേണ്ട കാലം കൂടിയാണ് എത്തിയിരിക്കുന്നത്. കർക്കടക മാസത്തിലെ ഒരിക്കലും പാടില്ലാത്ത ശീലങ്ങളിലൊന്നാണ് ഉച്ചയുറക്കം. ഈ മാസം പകൽ ഉറക്കത്തെ മാറ്റി നിർത്താം.

എളുപ്പത്തിൽ ദഹനം നടക്കാത്ത കഠിന ആഹാരങ്ങൾ ഈ കാലത്തു ഒഴിവാക്കണം. ചെറുപയർ ഒഴികെയുള്ള പയറുവർഗങ്ങൾ, കടല, പൊറോട്ട, അമരക്കായ, ഉഴുന്നുചേർത്ത ആഹാരങ്ങൾ തുടങ്ങിയവ ഇതിൽപ്പെടുന്നതാണ്. ഐസ്‌ക്രീം പോലെ റഫ്രിജറേറ്ററിൽ വച്ച തണുത്ത ആഹാരങ്ങളും ഈ മാസം വേണ്ട .മൽസ്യാഹരം അമിതമായി കഴിക്കരുത്.