വെള്ളം കുടിക്കുന്നത് നല്ലതാണ്. പക്ഷേ ശീതള പാനീയങ്ങൾ കുടിക്കുന്നത് നല്ലതല്ല. ആരോഗ്യത്തോടെ രോഗങ്ങൾ ഒന്നും കൂടാതെ ജീവിക്കാൻ സ്ഥിരമായി ശീതളപാനീയങ്ങള്‍ കുടിക്കുന്ന ശീലം നിര്‍ത്തുന്നതാണ് നല്ലത് എന്ന മുന്നറിയിപ്പ് നല്കിയിരിക്കുയാണ് ഫ്രാന്‍സിലെ കാന്‍സറുമായി ബന്ധപ്പെട്ട് ഗവേഷണം നടത്തുന്ന രാജ്യാന്തര ഏജന്‍സി.കൂടിയ അളവിൽ ശീതളപാനീയങ്ങള്‍ കുടിക്കുന്നത് മരണസാധ്യത വര്‍ധിപ്പിക്കുന്നതായി ഗവേഷകര്‍ പറയുന്നു. കൃത്രിമമായോ അല്ലാതെയോഉള്ള അമിതമായ അളവില്‍ മധുരം കലര്‍ന്ന ശീതളപാനീയങ്ങള്‍ പാടെ ഉപേക്ഷിക്കണമെന്നും പകരം ആരോഗ്യപ്രദമായ പാനീയങ്ങള്‍ കഴിക്കാന്‍ തയ്യാറാകണമെന്നും പഠന റിപ്പോര്‍ട്ടില്‍ വെളിപ്പെടുത്തുന്നു. പത്തു യൂറോപ്യന്‍ രാജ്യങ്ങളില്‍ നിന്നായി പങ്കെടുത്ത നാലരലക്ഷം പുരുഷന്മാരിലും സ്ത്രീകളിലും നടത്തിയ പഠനത്തിലാണ് ഈ കണ്ടെത്തല്‍ നടത്തിയിരിക്കുന്നത്.  ദിവസം രണ്ടു മൂന്ന് ഗ്ലാസ് ശീതളപാനീയം കൂടിക്കുന്നവര്‍ക്ക് മാസത്തില്‍ ഒരു തവണ കഴിക്കുന്നവരെ അപേക്ഷിച്ച്‌ മരണസാധ്യത കൂടുതലാണെന്നും ആ പഠനം പറയുന്നു.

പതിനാറുവര്‍ഷക്കാലത്തെ വിവിധ മെഡിക്കല്‍ കേസുകള്‍ പരിശോധിച്ചതിന്റെ അടിസ്ഥാനത്തില്‍ 41,693 പേര്‍ ഈ ശീലം മരിച്ചതായി പഠനറിപ്പോര്‍ട്ടുകൾ പറയുന്നു. ശീതളപാനീയം ശീലമാക്കിയതിന്റെ ഫലമായി 43 ശതമാനം പേര്‍ ക്യാന്‍സര്‍ രോഗം പിടിപ്പെട്ടു മരിച്ചുവെന്നും പഠനത്തിൽ പറയുന്നു. ശീതളപാനീയങ്ങള്‍ കുടിക്കുന്ന 21.8 ശതമാനം പേര്‍ ഞരമ്ബുസംബന്ധമായ അസുഖങ്ങള്‍ വന്നും 2.9 ശതമാനം പേര്‍ ദഹനസംബന്ധമായ അസുഖങ്ങള്‍ വന്നും മരിച്ചതായും പഠനറിപ്പോര്‍ട്ടുകൾ വെളിപ്പെടുത്തുന്നു.പതിവായി സോഫ്‌റ്റ് ഡ്രിങ്കുകള്‍ കുടിക്കുന്നത് ഹൃദയാരോഗ്യത്തെയും ബാധിക്കുന്നുണ്ടെന്നും പഠനങ്ങള്‍ പറയുന്നു. ഇത് പ്രധാനമായും കുട്ടികളെയാണ് കൂടുതലായി ബാധിക്കുക. ചെറുപ്രായത്തില്‍ സോഫ്റ്റ് ഡ്രിങ്കുകള്‍ അമിതമായി ഉപയോഗിക്കുന്നത് അവരുടെ കണ്ണിന് പിന്നിലുള്ള ധമനികളെ ചുരുക്കുകയും അത് ഭാവിയില്‍ ഉയര്‍ന്ന രക്തസമ്മര്‍ദ്ദത്തിന് കാരണമാകുകയും ചെയ്യുന്നു . മാത്രമല്ല അത് ഹൃദയത്തെയും ബാധിക്കും.

മധുരങ്ങളിലെ പ്രധാന വില്ലനായ ഫ്രക്ടോസ് കോൺസിറപ്പാണ് പല സോഫ്റ്റ് ഡ്രിങ്ക്സിലും ചേർക്കുന്നത് . സാധാരണ പഞ്ചസാരയെക്കാൾ പലമടങ്ങ് മധുരവും താരതമ്യേന വിലക്കുറവും കാരണം ഇതു കോളകളിലെല്ലാം ചേർക്കുന്നു. ഇതു ആരോഗ്യപ്രശ്നങ്ങൾ ഉണ്ടാക്കുന്നവയാണ്. മറ്റു മധുരങ്ങൾ വേഗം ആഗിരണം ചെയ്യുകയും രക്തത്തിലെ ട്രൈഗ്ലിസറൈഡ്, ചീത്ത കൊഴുപ്പുകളുടെ ഉത്പാദനം എന്നിവ കൂട്ടുകയും ചെയ്യുന്നു. സോഫ്റ്റ് ഡ്രിങ്ക്സിലൂടെ എത്തുന്ന മധുരം കുട്ടികളിലും കൗമാരക്കാർക്കിടയിലും അമിതവണ്ണവും പൊണ്ണത്തടിയും ഉണ്ടാക്കുന്നതായി പഠനങ്ങൾ പറയുന്നു. ഇവയുടെ ഉപയോഗം വയറിനു ചുറ്റും അടിഞ്ഞു കൂടുന്ന കൊഴുപ്പിന്റെ (വിസറൽ ഫാറ്റ്) അളവു കൂട്ടുകയും ഇതു പ്രമേഹത്തിലേക്ക് നയിക്കുകയും ചെയ്യുന്നു .സോഫ്റ്റ് ഡ്രിങ്ക്സിൽ നിറം ചേർക്കുന്ന പദാർഥങ്ങളും ചീത്തയാകാതിരിക്കാൻ ചേർക്കുന്ന സോഡിയം ബെൻസോയേറ്റും പേശികളുടെ പ്രവർത്തനം ഉത്തേജിപ്പിക്കുകയും കുട്ടികളിൽ ശ്രദ്ധക്കുറവിനും പിരുപിരിപ്പിനും വഴിയൊരുക്കുകയും ചെയ്യുന്നു.