ഇപ്പോൾ കോവിഡ് വാക്സിൻ എടുക്കുന്ന തിരക്കിലാണ് പലരും. വളരെ സുരക്ഷിതവും ഒപ്പം പാർശ്വഫലങ്ങളൊന്നും ഇല്ലാത്തതുമാണ് വാക്സിൻ. എങ്കിലും കോവിഡ് വാക്‌സീൻ എടുത്ത ചിലർക്ക് ചില ചെറിയ പാർശ്വഫലങ്ങളുണ്ടാകാം.

പനി, ശരീരവേദന തുടങ്ങിയവ അനുഭവപ്പെടാനുള്ള സാധ്യതയുണ്ട്. എന്നാൽ കുറച്ചു നല്ല ആഹാരം കഴിക്കുന്നതിലൂടെ ഈ പാർശ്വഫലങ്ങളെ അതിജീവിക്കാൻ സാധിക്കും. കോവിഡ് വാക്‌സീൻ സ്വീകരിച്ച ചിലർക്ക് പാർശ്വഫലങ്ങളുണ്ടാകാമെന്ന് സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ അറിയിക്കുന്നു.

ശരീരത്തിൽ സംഭവിക്കുന്ന ഇൻഫ്ളമേഷൻ മൂലമാണ് ഈ പാർശ്വഫലങ്ങൾ. സ്പൈക്ക് പ്രോട്ടീനിനോട് ശരീരം പ്രതികരിക്കുന്നു. പ്രതിരോധ സംവിധാനം എന്തിനോടെങ്കിലും പൊരുതുമ്പോൾ പനി, കൈവേദന, ശരീരവേദന തുടങ്ങിയവ ഉണ്ടാകാം. പെട്ടെന്ന് സുഖം പ്രാപിക്കാൻ പ്രതിരോധശക്തി വർധിപ്പിക്കുന്ന ഭക്ഷണം കഴിക്കണം.

വാക്‌സീൻ എടുത്ത ശേഷം കഴിക്കാൻ പറ്റിയ മികച്ച വിഭവം ചിക്കൻ സൂപ്പ് ആണെന്ന് വിദഗ്‌ധർ ചൂണ്ടിക്കാണിക്കുന്നു . സസ്യഭുക്കുകൾ ആണെങ്കിൽ പച്ചക്കറി സൂപ്പ് കുടിക്കാം.

പ്രത്യേകിച്ചും ജലാംശം കൂടുതലുള്ള ഭക്ഷണം കഴിക്കണം. കോവിഡ് വാക്‌സീൻ എടുത്ത ശേഷം ധാരാളം വെള്ളം കുടിക്കണം.ചിക്കൻ, ബീൻസ്, പയർ വർഗങ്ങൾ, ഉരുളക്കിഴങ്ങ്, ബ്രക്കോളി ഇവയുടെയെല്ലാം സൂപ്പ് പ്രതിരോധ ശക്തി വർധിപ്പിക്കും. നോൺവെജ് കഴിക്കുന്ന ആളാണ് നിങ്ങളെങ്കിൽ, വാക്‌സീൻ എടുത്തശേഷം ചിക്കൻസൂപ്പ് കുടിക്കുന്നതാണ് ഏറ്റവും നല്ലത്.

ചിക്കൻ സൂപ്പിന് ഔഷധഗുണങ്ങളും ആന്റി ഇൻഫ്ളമേറ്ററി ഗുണങ്ങളും ഉണ്ടെന്ന് 'ചെസ്റ്റ്' ജേണലിൽ പ്രസിദ്ധീകരിച്ച പഠനം പറയുന്നു. കൂടാതെ കാരറ്റ്, സെലറി, ഉപ്പും കുരുമുളകും ഇവയെല്ലാം ഇൻഫ്ളമേഷനെ ചെറുക്കും. മാംസരസത്തിൽ ഗ്ലൈസിൻ , ആർജിനിൻ എന്നീ അമിനോ ആസിഡുകൾ ഉണ്ട്. ഇവയ്ക്ക് ശക്തിയേറിയ ആന്റി ഇൻഫ്ളമേറ്ററി ഗുണങ്ങളുണ്ട്. അതുകൊണ്ട് കോവിഡ് വാക്സീൻ എടുത്ത ശേഷം പച്ചക്കറികളും ഇറച്ചിയും എല്ലാം വേവിച്ചുണ്ടാക്കുന്ന സൂപ്പ് കുടിക്കുന്നത് ഏറെ നല്ലതാണ്.

വാക്‌സിന്‍ സ്വീകരിക്കുന്നവര്‍ ഭക്ഷണം, വിശ്രമം എന്നിവയുടെ കാര്യത്തില്‍ ജാഗ്രത പാലിക്കണമെന്നും നിര്‍ദ്ദേശത്തില്‍ പറയുന്നു. ആരോഗ്യകരമായ ഭക്ഷണം കഴിക്കുകയും നന്നായി വെള്ളം കുടിക്കുകയും വേണം. അതോടൊപ്പം ശരീരത്തിന്റെ പ്രതിരോധ ശേഷി കാത്തുസൂക്ഷിക്കുന്നതിന് നന്നായി ഉറങ്ങുകയും വേണം. ടെന്‍ഷന്‍, സമ്മര്‍ദ്ദം തുടങ്ങിയവ ഉണ്ടാവാതെ നോക്കണം.