വയറിളക്കമെന്ന രോഗത്താൽ അഞ്ചുവയസ്സിന് താഴെയുള്ള നിരവധി കുട്ടികൾ മരണപ്പെടുന്നുണ്ട്.ഒരു കുഞ്ഞിന് വയറിളകമ്പോൾ ആ കുട്ടിയുടെ ശരീരത്തിലെ ജലവും ലവണങ്ങളും നഷ്ടമാകുകയാണ് ചെയ്യുന്നത്. ഇതിലൂടെ നിർജലീകരണം സംഭവിക്കുകയും ഇത് മരണത്തിലേക്ക് നയിക്കുകയും ചെയ്യും. എന്നാൽ കുട്ടികളെ ഈ വലിയ ആപത്തിൽ നിന്നും രക്ഷപ്പെടുത്താൻ ഒരു ലായനി ഉണ്ട്. ഒ.ആർ.എസ്. എന്ന ലായനിയുടെ കണ്ടുപിടുത്തതോടെ കഴിഞ്ഞ കുറച്ച് ദശകങ്ങളായി കുട്ടികളുടെ മരണനിരക്ക് കുറയ്ക്കാൻ കഴിഞ്ഞു എന്നത് വലിയ നേട്ടമാണ്. അതുകൊണ്ട് തന്നെ ഇതിന് അത്ഭുത ലായനി എന്ന വിശേഷണം നൽകുന്നതിൽ തെറ്റില്ല.

വയറിളക്ക ചികിത്സയിൽ വലിയൊരു വഴിത്തിരിവായിരുന്നു ഒ.ആർ.എസിന്റെ കണ്ടുപിടുത്തം. മനുഷ്യരാശിക്കും വൈദ്യശാസ്ത്രത്തിനും വലിയ ഒരു മുതൽക്കൂട്ടു തന്നെയാണ് ഒ.ആർ.എസ്.1975ൽ ആണ് ലോകാരോഗ്യസംഘടനയും യൂണിസെഫും ഒ.ആർ.എസ്. ലായനിയുടെ ഗുണങ്ങൾ തിരിച്ചറിഞ്ഞത്. ഉപ്പും പഞ്ചസാരയും ലവണങ്ങളും കൃത്യമായ അനുപാതത്തിൽ ഉള്ള ഒരു ലായനി ആണ് ഒ.ആർ.എസ്.സോഡിയം, ക്ലോറെെഡ് ​ഗ്ലൂക്കോസ്, പൊട്ടാസ്യം, സിട്രേറ്റ് എന്നിവയാണ് ഇതിൽ അടങ്ങിയിരിക്കുന്നത്.

വ്യക്തിശുചിത്വം ഇല്ലായ്മ, പരിസരശുചിത്വം ഇല്ലായ്മ, അണുബാധ, പഴകിയ ഭക്ഷണം, മലിനജലം
ഈ കാരണങ്ങളാണ് വയറിളക്കത്തി ലേക്ക് നയിക്കുന്നത്. കുട്ടികളിൽ വയറിളക്കരോഗങ്ങളെ എങ്ങനെ തടയാം എന്നുകൂടെ നമുക്ക് നോക്കാവുന്നതാണ്.

പഴകിയതും തുറന്നു വെച്ചിരിക്കുന്നതുമായ ആഹാരം കഴിക്കുന്ന സാഹചര്യങ്ങൾ ഒഴിവാക്കുക, 6 മാസം വരെ മുലപ്പാൽ മാത്രം അവർക്ക് നൽകുക,വ്യക്തി ശുചിത്വം പാലിക്കുക, കുട്ടികളെ അതു ശീലിപ്പിക്കുക,
കുട്ടികൾക്ക് തിളപ്പിച്ചാറിയ വെള്ളം കൊടുക്കുക, ഭക്ഷണം പാകം ചെയ്യുന്നതിന് മുൻപും കുട്ടികൾക്ക് ഭക്ഷണം കൊടുക്കുന്നതിന് മുൻപും കുട്ടികളുടെ മലമൂത്രവിസർജനങ്ങൾ കഴുകിയതിന് ശേഷവും അമ്മമാർ കൈകൾ നന്നായി സോപ്പിട്ട് കഴുകുക.

ഭക്ഷണം കഴിക്കുന്നതിന് മുൻപും ബാത്റൂമിൽ പോയതിന് ശേഷവും കുട്ടികളെ കൈകൾ സോപ്പിട്ട് കഴുകാൻ കുട്ടികളെ ശീലിപ്പിക്കുക.ഇതൊക്കെ ചെയ്താൽ ഒരു പരിധിവരെ നമുക്ക് വയറിളക്കത്തെ തടയാം.

മലത്തിൽ രക്തത്തിന്റെ അംശം കാണുക, .
അമിതമായ ദാഹം,
മലം അമിതമായ തോതിൽ പോകുക,
നിർത്താതെയുള്ള ഛർദിയും പനിയും
കുഴിഞ്ഞു താഴ്ന്ന കണ്ണുകൾ, താഴ്ന്ന ഉച്ചി,അപസ്മാരം,ക്ഷീണം കാരണം കുട്ടി മയങ്ങി കിടക്കുക,
മൂത്രത്തിന്റെ അളവ് കുറയുക, ഇതൊക്കെയാണ് വയറിളക്കത്തിന്റെ ലക്ഷണങ്ങൾ.

ഒ.ആർ.എസ്. ലായനി എങ്ങനെ തയ്യാറാക്കുന്നു എന്ന് നോക്കാം
:
വൃത്തിയുള്ള പാത്രത്തിലേക്കു പാക്കറ്റ് മുറിച്ചു പൗഡർ മുഴുവൻ ഇടുക. 200 മില്ലിലിറ്റർ പാക്കറ്റ് - 1 ഗ്ലാസ് വെള്ളത്തിലും 1 ലിറ്റർ പാക്കറ്റ് - 5 ഗ്ലാസ്സ് വെള്ളത്തിലും

തിളപ്പിച്ചാറിയ വെള്ളം ഒഴിച്ച ശേഷം വൃത്തിയുള്ള സ്പൂൺ കൊണ്ട് നന്നായി ഇളക്കുക.

ഒരിക്കൽ തയ്യാറാക്കിയ ലായനി 24 മണിക്കൂറിനുള്ളിൽ ഉപയോഗിക്കണം.

2 വയസ്സിനു താഴെയുള്ള കുട്ടിക്ക് 50 -100 എം.എൽ. വരെയും

2 വയസ്സിനു മുകളിൽ ഉള്ള കുട്ടിക്ക് 100-200 എം.എൽ. വരെയും കൊടുക്കാവുന്നതാണ്.

ഒറ്റയടിക്ക് ഒരുമിച്ചു കൊടുക്കരുത്, ഓരോ സ്പൂൺ വച്ച് കൊടുക്കുക.

ഛർദിച്ചാൽ 10-15 മിനിറ്റ് കഴിഞ്ഞു വീണ്ടും കൊടുക്കണം.

മറ്റുള്ള ഭക്ഷണപദാർഥങ്ങളുമായി ചേർന്ന് ഒ.ആർ.എസ്. കൊടുക്കരുത്.

നിർജലീകരണം പരിഹരിക്കുന്നത് വരെ ഒ.ആർ.എസ്. ലായനി കൊടുക്കുക.