ഒരാൾ മരിച്ച ശേഷം അവരുടെ അവയവങ്ങളിൽ പലതും ജീവനോടെ ഇരിക്കും. ഈ അവയവങ്ങൾ പ്രതീക്ഷിച്ച് ഒട്ടനവധി ആൾക്കാർ പുതുജീവിതത്തിലേക്ക് ചുവടുകൾ വയ്ക്കാൻ കാത്തിരിപ്പുണ്ട്. അങ്ങനെയുള്ളവരുടെ പ്രതീക്ഷകൾക്ക് മങ്ങലേൽക്കുന്നു എന്ന വിവരമാണ് ഇപ്പോൾ പുറത്തുവരുന്നത്. അവയവദാനം ഇപ്പോൾ കുറയുന്നു.

മരണാനന്തര അവയവദാനം കാര്യമായി തന്നെ കുറയുകയാണ്. സർക്കാരിന്റെ കീഴിലുള്ള കേരള നെറ്റ്വർക്ക് ഫോർ ഓർഗൻ ഷെയറിങ്ങിന്റെ കണക്കുകൾപ്രകാരം ഈവർഷം ഇതുവരെ സംസ്ഥാനത്ത് നാലുപേരുടെ മരണാനന്തര അവയവദാനം മാത്രമാണ് നടക്കുന്നത് . 2019-ൽ 19 പേരുടെയും 2020-ൽ 21 പേരുടെയും മരണാനന്തര അവയവദാനം നടന്നുവെന്നത് ശ്രദ്ധേയമായ കാര്യം.

ബന്ധുക്കൾക്കോ സുഹൃത്തുക്കൾക്കോവേണ്ടി കരൾ, വൃക്ക എന്നിവ ദാനം ചെയ്യുന്നവരുടെ എണ്ണത്തിലും കാര്യമായ കുറവ് സംഭവിച്ചിരിക്കുകയാണ്. സമയബന്ധിതമായി
അവയവദാനം നടത്തണം. അതാണ് ഏറ്റവും പ്രധാനമായ കാര്യം. മരിച്ച വ്യക്തിയുടെ കോവിഡ് പരിശോധനകൾക്ക് കുറെ സമയം ആവശ്യമായി വരുന്നതും മറ്റു നടപടിക്രമങ്ങൾ പാലിക്കേണ്ടിവരുന്നതുമാണ് ഇപ്പോൾ മരണാനന്തര അവയവദാനങ്ങൾ കുറയാനുള്ള പ്രധാന കാരണങ്ങളിലൊന്നായി കരുതുന്നു.

കൈകൾ മാറ്റിവെക്കുന്നതിനായി കൊച്ചി അമൃത ആശുപത്രിയിൽ 15 രോഗികൾ കാത്തിരിപ്പിലാണെന്ന് ക്ലിനിക്കൽ പ്രൊഫസറും സെന്റർ ഫോർ പ്ലാസ്റ്റിക് ആൻഡ് റീകൺസ്ട്രക്ടീവ് സർജറി വിഭാഗം മേധാവിയുമായ ഡോ. സുബ്രഹ്മണ്യ അയ്യർ വ്യക്തമാക്കി.

ഹൃദയത്തിന്റെ പ്രവർത്തനം തീർത്തും തകരാറിലായ 15 രോഗികളാണ് അവയവമാറ്റത്തിനായി കാത്തിരിക്കുന്നതെന്ന് ഡോക്ടർമാർ വ്യക്തമാക്കുന്നു.