കൊതുക് കടി കിട്ടിയിട്ടില്ലാത്തവരായി ആരുമുണ്ടാകില്ല. ചിലപ്പോഴൊക്കെ ഒരു കൂട്ടം ആള്‍ക്കാരുമായി ഇരുന്നാലും കൊതുക് നമ്മളെ മാത്രം ലക്ഷ്യമിട്ട് വന്ന് കടിക്കാറുള്ളതായി ചിലരെങ്കിലും അഭിപ്രായപ്പെടാറുണ്ട്. ഇത്രയും ആളുകള്‍ ഉണ്ടായിട്ട് തന്നെ മാത്രം എന്താണ് തിരഞ്ഞുപിടിച്ച് കടിക്കുന്നത് എന്ന് ചിന്തിച്ചിട്ടുള്ളവരും ഉണ്ടാകും. മറ്റുള്ളവരെ വിട്ട് നിങ്ങളെ മാത്രം മിക്കപ്പോഴും കൊതുകുകള്‍ ലക്ഷ്യമിട്ട് വരുന്നുണ്ടെങ്കില്‍ അതിന് ചില കാരണങ്ങളുമുണ്ട്. ഇത് എന്ത്‌കൊണ്ടാണെന്ന് നോക്കാം.

ധരിച്ചിരിക്കുന്ന വസ്ത്രത്തിന്റെ നിറം:

ചുവപ്പ്, കറുപ്പ്, നേവി ബ്ലൂ തുടങ്ങിയ നിറത്തിലുള്ള വസ്ത്രങ്ങളാണ് നിങ്ങള്‍ ധരിച്ചിരിക്കുന്നതെങ്കില്‍ കൊതുക് നിങ്ങളിലേയ്ക്ക് ആകര്‍ഷിക്കപ്പെടും. ഇരുണ്ടതും കടുത്തതുമായ നിറങ്ങള്‍ കൊതുക് പെട്ടന്ന് ആകര്‍ഷിക്കുമെന്നാണ് പഠനം പറയുന്നത്. കൊതുകുകള്‍ക്ക് നിങ്ങളെ എളുപ്പത്തില്‍ കണ്ടെത്താന്‍ ഇരുണ്ടവസ്ത്രങ്ങള്‍ സഹായിക്കും. കൊതുകില്‍ നിന്ന് രക്ഷപെടാനായി ഫുള്‍സ്ലീവ് ആയിട്ടുള്ള വസ്ത്രം ധരിക്കുന്നതിനൊപ്പം ഇളം നിറത്തിലുള്ള വസ്ത്രം ധരിച്ചാലും മതി. ഒപ്പം, ഇറുകിയ വസ്ത്രവും ഒഴിവാക്കുക. അയഞ്ഞ വസ്ത്രങ്ങള്‍ ധരിച്ചാലും കൊതുകു കടി ഒഴിവാക്കാം.

നിങ്ങളുടെ ഗന്ധം:

കാഴ്ച കഴിഞ്ഞാല്‍ പിന്നെ ഗന്ധമായിരിക്കും കൊതുകുകള്‍ നിങ്ങളെ ലക്ഷ്യമിടുന്നതിനുള്ള കാരണം. നിശ്വാസത്തിലൂടെ പുറത്തുവിടുന്ന കാര്‍ബണ്‍ഡയോക്‌സൈഡിന്റെ അളവ് കൊതുകുകള്‍ ആകര്‍ഷിക്കപ്പെടാനുള്ള ഒരു ഘടകമാണ്. പുഷ്പ സുഗന്ധമുള്ള സോപ്പുകള്‍, ഡിയോഡറന്റുകള്‍, പെര്‍ഫ്യൂമുകള്‍, മോയ്‌സ്ചറൈസിംഗ് ലോഷനുകള്‍, ലിപ്സ്റ്റിക്കിന്റെ മണം എന്നിവയിലേയ്ക്ക് കൊതുകുകള്‍ കൂടുതല്‍ ആകര്‍ഷിക്കപ്പെടുന്നു. നിങ്ങളുടെ ചര്‍മത്തില്‍ നിന്നുള്ള ഈ ഗന്ധം അവര്‍ ഒരു രാസ സിഗ്നലുകളായി ആണ് കാണുന്നത്.

ഗര്‍ഭം:

മലേറിയ അണുക്കളുടെ വാഹകരായ കൊതുകുകള്‍ ആകര്‍ഷിക്കപ്പെടുന്നതിനുള്ള അപകടസാധ്യത ഗര്‍ഭിണികളായ സ്ത്രീകള്‍ക്ക് അല്ലാത്ത സ്ത്രീകളെ അപേക്ഷിച്ച് ഇരട്ടിയായിരിക്കുമെന്ന് ഗവേഷണങ്ങള്‍ സൂചിപ്പിക്കുന്നു. ഗര്‍ഭാവസ്ഥയില്‍, മെറ്റാബോളിക് നിരക്ക് കൂടുന്നത് മൂലം സ്വതന്ത്രമാക്കപ്പെടുന്ന കാര്‍ബണ്‍ഡയോക്‌സൈഡിന്റെ അളവ് വര്‍ദ്ധിക്കുന്നതിനൊപ്പം ശരീരത്തിന്റെ ചൂട് അല്പം കൂടുകയും ചെയ്യുന്നത് കൊതുകുകളെ ആകര്‍ഷിക്കാന്‍ കാരണമാകുന്നു.

രക്തഗ്രൂപ്പ്:

നിങ്ങളുടെ രക്തഗ്രൂപ്പ് 'ഒ' ആണെങ്കില്‍ കൊതുകുകള്‍ ആകര്‍ഷിക്കപ്പെടാനുള്ള സാധ്യത 'എ', 'എബി' അല്ലെങ്കില്‍ 'ബി' ഗ്രൂപ്പില്‍ ഉള്ളവരെക്കാള്‍ അധികമായിരിക്കും. രക്ത ഗ്രൂപ്പുമായി ബന്ധപ്പെട്ട് ഉത്പാദിപ്പിക്കപ്പെടുന്ന ഒരു രാസ സ്രവമായിരിക്കാം ഇതിനു കാരണമാകുന്നതെന്ന് ജപ്പാനില്‍ നിന്ന് പുറത്തുവന്ന ഒരു പഠനത്തില്‍ പറയുന്നു.