മൊബൈൽ ആപ്ലിക്കേഷൻ വഴി വാഹന രജിസ്‌ട്രേഷൻ പുതുക്കാനുള്ള സംവിധാനമൊരുക്കി ഖത്തർ രംഗത്തെത്തിയിരിക്കുകയാണ്. ആഭ്യന്തര മന്ത്രാലയത്തിന്റെ മെട്രോഷ് 2 ആപ്പ് വഴിയാണ് ഇതിനുള്ള സൗകര്യം ഒരുക്കിയിരിക്കുന്നത്.

സർക്കാർ സേവനങ്ങൾ പൂർണമായും ഓൺലൈൻ വഴിയാക്കാനുള്ള ഖത്തർ ഗവണ്മെന്റിന്റെ സ്മാർട്ട് പദ്ധതിയുടെ ഭാഗമായാണ് ' ഇസ്തിമാറ ' എന്നറിയപ്പെടുന്ന വാഹന രജിസ്‌ട്രേഷൻ പുതുക്കാനുള്ള സൗകര്യം കൂടി മെട്രാഷ് 2 വിൽ ഉൾപ്പെടുത്തിയിരിക്കുന്നത്.

ആഭ്യന്തര മന്ത്രാലയത്തിന്റെ മൊബൈൽ ആപ്ലിക്കേഷനായ മെട്രാഷ് ടു വഴി ഇതിനകം തന്നെ നിരവധി സർക്കാർ സേവേനങ്ങൾ ലഭ്യമാകുന്നുണ്ട്. വാഹനങ്ങളുടെ ഇസ്തിമാറ തീർന്നാൽ ഇനി മുതൽ മെട്രാഷ് ടു വഴിയും ആഭ്യന്തര മന്ത്രാലയത്തിന്റെ വെബ്സൈറ്റ് വഴിയും പുതുക്കാനാവും.

ട്രാഫിക് വകുപ്പ് സംഘടിപ്പിച്ച ചടങ്ങിൽ ഡയറക്ടർ ജനറൽ ബ്രിഗേഡിയർ മുഹമ്മദ് സഅദ് അൽഖർജിയാണ് സർവ്വീസ് ഔദ്യോഗികമായി ഉദ്ഘാടനം ചെയ്തത്. ഇസ്തിമാറ പുതുക്കുന്നതിന് മുന്നോടിയായുള്ള സാങ്കേതിക പരിശോധന പൂർത്തിയാക്കി ഇൻഷുറൻസ് എടുത്തുകഴിഞ്ഞാൽ മെട്രാഷ് 2 വഴി ഇസ്തിമാറ പുതുക്കാം.

ക്രെഡിറ്റ് കാർഡ് വഴിയോ കമ്പനികളുടെ ബാങ്ക് അക്കൗണ്ട് ഡെബിറ്റ് ഉപയോഗിച്ചോ പണമടക്കുകയുമാവാം. തുടർന്ന് ഏതെങ്കിലും ട്രാഫിക് ഓഫീസിൽ ചെന്നാൽ പുതുക്കിയ കാർഡ് കൈപ്പറ്റാനാവും.