ദുബായ് നമ്പർ പ്ലേറ്റുകള് സ്മാർട്ടാകുന്നു; അപകടങ്ങളോ മറ്റെന്തെങ്കിലും അത്യാഹിതമോ ഉണ്ടായാൽ നമ്പർ പ്ലേറ്റ് പോലീസിലറിയിക്കും
വാഹനാപകടമുണ്ടായാൽ ഉടന് രക്ഷാസംവിധാനമൊരുക്കാൻ സ്മാര്ട്ട് നടപടികളുമായി ദുബായ് റോഡ് ഗതാഗത അതോറിറ്റി (ആര്.ടി.എ) രംഗത്തെത്തിയിരിക്കുകയാണ്. ലോകത്താദ്യമായി സ്മാര്ട്ട് നമ്പർ പ്ലേറ്റുകള് അടുത്ത മാസം മുതൽ ദുബായിയിൽ പരീക്ഷിക്കാനാണ് ആര്.ടി.എ ഒരുങ്ങുന്നത്.
അപകടങ്ങളോ മറ്റെന്തെങ്കിലും അത്യാഹിതമോ ഉണ്ടായാലുടന് തന്നെ പൊലീസിനും ആംബുലന്സ് സേവന കേന്ദ്രത്തിലേക്കും സന്ദേശം എത്തുന്ന രീതിയിലാണ് നമ്പർ പ്ലേറ്റുകള് ക്രമീകരിക്കുന്നത്. വേള്ഡ് ട്രേഡ് സെന്ററിൽ ഇന്നലെ ആരംഭിച്ച ദുബായ് ഇന്റര്നാഷനല് ഗവൺമെന്റ്റ് അച്ചിവ്മെന്റ്സ് എക്സിബിഷനിലാണ് പുതിയ നമ്പർ പ്ലേറ്റുകള് പ്രദര്ശിപ്പിച്ചിരിക്കുന്നത്. ജി.പി.എസും ട്രാന്സ്മിറ്ററും മൈക്രോ ചിപ്പുമാണ് ഇൗ ഡിജിറ്റല് പ്ലേറ്റിലുണ്ടാവുക.
വാഹനത്തെയും ഡ്രൈവറുടെ രീതികളും കണ്ട്രോള് സെന്ററിലിരുന്നു നിരീക്ഷിക്കാനും ആവശ്യാനുസരണം നിര്ദ്ദേശം നല്കാനും പുതിയ സംവിധാനം വഴി സാധിക്കും. ഇൗ നമ്പർ പ്ലേറ്റില് അധിഷ്ഠിതമായി ഫീസുകളും ഫൈനുകളും അടക്കാനും മറ്റും കഴിയുമെന്നതിനാല് ഉപഭോക്തൃ സേവന കേന്ദ്രങ്ങളിലേക്ക് പോകുന്ന സമയം പോലും ലാഭിക്കാനാകുമെന്ന് ആര്.ടി.എ ലൈസന്സിങ് വിഭാഗം ഡയറക്ടര് സുല്ത്താന് അല് മര്സൂഖി പറഞ്ഞു.
മെയ് മാസം മുതല് ഇൗ വര്ഷം അവസാനം വരെ പരീക്ഷണാടിസ്ഥാനത്തിൽ നടപ്പിലാക്കുന്ന നമ്പർ പ്ലേറ്റുകള് എല്ലാ വിധ പോരായ്മകളും പരിഹരിച്ച് അടുത്ത വര്ഷം മുതല് സമ്പൂർണ്ണമായി നടപ്പാക്കാനുള്ള ചർച്ചകളും നടക്കുന്നു.
https://www.facebook.com/Malayalivartha