യെമനിലെ ഹൊദിദായില്‍ സൗദി അറേബ്യയുടെ നേതൃത്വത്തിലുള്ള സഖ്യസേനയുടെ കനത്ത വ്യോമാക്രമണം. ഹൊദിദായിലെ തിരക്കേറിയ മത്സ്യ മാര്‍ക്കറ്റിലുണ്ടായ ആക്രമണത്തില്‍ 20 പേര്‍ കൊല്ലപ്പെട്ടു. അമ്പതോളം പേര്‍ക്കു പരിക്കേറ്റു.

അല്‍തവ്‌ര ആശുപത്രിയുടെ പ്രധാന ഗേറ്റില്‍ നിന്ന് അഞ്ച് കിലോമീറ്റര്‍ മാത്രം മാറി സ്ഥിതി ചെയ്യുന്ന മാര്‍ക്കറ്റിലാണ് വ്യോമാക്രമണമുണ്ടായത്. മാര്‍ക്കറ്റിന്റെ ഒരു ഭാഗം ആക്രമണത്തില്‍ തകര്‍ന്നു. പരിക്കേറ്റവരെ ആശുപത്രിയിലേക്ക് മാറ്റിയതായി അധികൃതര്‍ അറിയിച്ചു.

യെമന്‍ മുന്‍ പ്രസിഡന്റ് അലി അബ്ദുല്ല സാലിഹിനെ (75) ഹൂതികള്‍ വധിച്ചതിനു പിന്നാലെയാണ് സൗദി നേതൃത്വത്തിലുള്ള സഖ്യസേന വ്യോമാക്രമണം ശക്തമാക്കിയത്. ഇതുവരെ പതിനായിരത്തിലധികം ആളുകള്‍ കൊല്ലപ്പെട്ടു. 30 ലക്ഷത്തിലധികം പേര്‍ പലായനം ചെയ്തു.