കൊറോണ വൈറസ് വ്യാപനം നിയന്ത്രിക്കാനാകാതെ ലോകരാജ്യങ്ങള്‍. വൈറസ് സ്ഥിരീകരിച്ചവരുടെ എണ്ണം ഒമ്ബത് ലക്ഷം പിന്നിട്ടു. ബുധനാഴ്ച വരെ വൈറസ് സ്ഥിരീകരിച്ചവരുടെ എണ്ണം 9,03,772 ആയി. ലോകത്താകെ 45,334 പേരാണ് ഇതുവരെ വൈറസ് ബാധിച്ച് മരണപ്പെട്ടത്. ഇറ്റലിയില്‍ മരണനിരക്കില്‍ ഇന്നും കുറവില്ല. 13,155 ജീവനാണ് ഇതുവരെ ഇറ്റലിയില്‍ പൊലിഞ്ഞത്. സ്‌പെയിനില്‍ മരണപ്പെട്ടവരുടെ എണ്ണം 9,053 ആയി ഉയര്‍ന്നു. അമേരിക്കയില്‍ മരണം 4,000 പിന്നിട്ടു. ബ്രിട്ടണില്‍ മരണം 2300 കടന്നു. അഞ്ഞൂറിലേറേ രോഗികള്‍ ബുധനാഴ്ച ബ്രിട്ടണില്‍ മരിച്ചു.

എന്നാല്‍ ചൈനയില്‍ മരണം കുറഞ്ഞു. പത്തില്‍ താഴെ മാത്രം മരണമാണ് ബുധനാഴ്ച റിപ്പോര്‍ട്ട് ചെയ്തത്. ആകെ മരണം 3312 ആയി. ഫ്രാന്‍സിലും ഇറാനിലും മരണം യഥാക്രമം 3523, 3036 ആയി വര്‍ധിച്ചു. ബെല്‍ജിയത്തിലും നെതര്‍ലാന്‍ഡിലും രോഗികളുടെ എണ്ണം വര്‍ധിക്കുകയാണ്. നൂറിലേറെ മരണവും പുതുതായി റിപ്പോര്‍ട്ട് ചെയ്തു. അതേസമയം അമേരിക്കയില്‍ കൊറോണ രോഗികളുടെ എണ്ണം രണ്ട് ലക്ഷം പിന്നിട്ടു. ഇറ്റലിയില്‍ 1,10,574 പേര്‍ക്കും സ്‌പെയ്‌നില്‍ 102,136 പേര്‍ക്കും രോഗം സ്ഥിരീകരിച്ചു.

ചൈനയില്‍ 81,554 രോഗികളും ജര്‍മനിയില്‍ 75,754 രോഗികളുമുണ്ട്. ലോകത്താകമാനം 190,660 ആളുകള്‍ രോഗം പൂര്‍ണമായും ഭേദപ്പെട്ട് ആശുപത്രിവിട്ടു. അതേസമയം ഇന്ത്യയില്‍ 1637 പേര്‍ക്കാണ് ഇതുവരെ വൈറസ് സ്ഥിരീകരിച്ചത്. 38 പേര്‍ മരിച്ചു. കഴിഞ്ഞ ഒരാഴ്ചയ്ക്കിടയില്‍ നാല് ലക്ഷം പേര്‍ക്കാണ് ലോകത്ത് പുതുതായി രോഗം ബാധിച്ചത്. ഐക്യരാഷ്ട്രസഭയുടെ ചരിത്രത്തിലെ ഏറ്റവും വലിയ പ്രതിസന്ധിയാണിതെന്ന് ബുധനാഴ്ച യുഎന്‍ സെക്രട്ടറി ജനറല്‍ അന്റോണിയോ ഗുട്ടറസ് വ്യക്തമാക്കിയിരുന്നു.