റഷ്യ ഞെട്ടിത്തരിച്ചു... ചന്ദ്രനില്‍ ഖനനത്തിനുള്ള കരാര്‍ ഒപ്പിട്ട് അമേരിക്കന്‍ പ്രസിഡന്റ് ഡോണള്‍ഡ് ട്രംപ് രംഗത്ത്
റഷ്യ ഞെട്ടിത്തരിച്ചു. അമേരിക്കയുടെ അപ്രതീക്ഷിത നീക്കം. ആ കരാര്‍ ഒപ്പിട്ട് ട്രംപ്. കൊവിഡ് വന്നു രാജ്യം ഗതിമുട്ടി നില്‍ക്കുന്നതിനിടെയാണ് ചന്ദ്രനില്‍ ഖനനത്തിനുള്ള കരാര്‍ ഒപ്പിട്ട് അമേരിക്കന്‍ പ്രസിഡന്റ് ഡോണള്‍ഡ് ട്രംപ് രംഗത്ത് വന്നിരിക്കുന്നത്. ബഹിരാകാശത്തെ ട്രംപ് ഇങ്ങനെ കോളനിവല്‍ക്കരിക്കുന്നത് സ്വീകാര്യമല്ല എന്ന് റഷ്യന്‍ സ്‌പേസ് ഏജന്‍സി ആയ റോസ്‌കോസ്മോസ് വ്യക്തമാക്കി.
ചന്ദ്രോപരിതലത്തിലെ ജലം, ധാതുക്കള്‍ എന്നിവയില്‍ അമേരിക്കയ്ക്കുള്ള അവകാശം സംബന്ധിച്ച ഒന്നാണ് ഈ ഓര്‍ഡര്‍. അസമയത്തുള്ള ഈ കരാര്‍ ഒപ്പിടല്‍, ആഗോളതലത്തില്‍ ഏറിയ കൂറും വിമര്‍ശനങ്ങള്‍ക്കാണ് കാരണമായത് . നിലവിലെ നിയമത്തിന് വിധേയമായിക്കൊണ്ട് അമേരിക്കയ്ക്കും ബഹിരാകാശത്തെ വിശിഷ്യാ ചന്ദ്രോപരിതലത്തിലെ ധാതുക്കളുടെയും ജലത്തിന്റെയും പര്യവേക്ഷണത്തിനും വിനിയോഗത്തിനുമുള്ള അവകാശമുണ്ടായിരിക്കും. ബഹിരാകാശമെന്നത് മനുഷ്യന്റെ പ്രവൃത്തികളെ സംബന്ധിച്ചിടത്തോളം നിയമപരമായും ഭൗതികമായും അനതിസാധാരണമായ ഒരിടമാണ്. അത് ഒരു ആഗോള പൊതുവിടമാണ് എന്ന് അമേരിക്ക കരുതുന്നില്ല എന്ന് ഓര്‍ഡര്‍ പറയുന്നു.
അന്താരാഷ്ട്ര നിയമങ്ങള്‍ ലംഘിക്കാതെ തന്നെ അവിടെ വ്യവസായികാടിസ്ഥാനത്തിലുള്ള ഖനനം നടത്താനും, അവിടെ ലഭ്യമായ വിഭവങ്ങള്‍ വിനിയോഗിക്കാനും അമേരിക്കയ്ക്ക് അവകാശമുണ്ട് എന്നും ഓര്‍ഡര്‍ പറയുന്നുണ്ട്. എന്നാല്‍ അമേരിക്കയുടെ ഈ അവകാശവാദം അന്താരാഷ്ട്രതലത്തില്‍ നിയമപരമായ നിലനില്‍പ്പുള്ള ഒന്നാണോ എന്ന് ഇനിയും ഉറപ്പിക്കാറായിട്ടില്ല. അമേരിക്കന്‍ മണ്ണിലെ ഖനനങ്ങളെപ്പറ്റി പറയുന്ന അതേ ലാഘവത്തോടെ അമേരിക്കയ്ക്ക് ബഹിരാകാശത്തെ ഖനനങ്ങളെപ്പറ്റി പറയാന്‍ സാധിക്കുമോ എന്ന് ഉറപ്പിച്ചു പറയാറായിട്ടില്ല. ബഹിരാകാശ ക്ലബ്ബില്‍ അംഗത്വം നേടിയിട്ടുള്ള ചുരുക്കം ചില രാജ്യങ്ങള്‍ ഇനിയും ബഹിരാകാശത്തെ ഒരു ഗ്ലോബല്‍ കോമണ്‍സ് അഥവാ ആഗോള പൊതു ഇടം ആയി അംഗീകരിക്കാന്‍ സന്മനസ്സു കാണിച്ചിട്ടില്ല. അത് അവിടെ ഉണ്ടാകാന്‍ സാധ്യതയുള്ള വിഭവങ്ങളെ തങ്ങളുടെ ശാസ്ത്രസാങ്കേതിക വളര്‍ച്ച മുതലെടുത്തുകൊണ്ട് ഏകപക്ഷീയമായി ചൂഷണം ചെയ്യാം എന്നുള്ള സ്വകാര്യമോഹത്തിന്റെ പുറത്താണ്.
സ്‌പേസിലേക്ക് പോകാന്‍ കോപ്പുകൂട്ടുന്ന അല്ലെങ്കില്‍ പോയിക്കഴിഞ്ഞ റഷ്യ, ചൈന, ജപ്പാന്‍, മറ്റുള്ള യൂറോപ്യന്‍ രാജ്യങ്ങള്‍ എന്നിവര്‍ ഇതേ കാരണത്താലാണ് മൂണ്‍ ട്രീറ്റിയില്‍ ഇന്നുവരെ ഒപ്പുവെക്കാതെ മാറി നില്‍ക്കുന്നത്. ചന്ദ്രനിലേക്കുള്ള യാത്രകള്‍ക്കും, ചൊവ്വ പര്യവേക്ഷണത്തിനും ഒക്കെ അമേരിക്ക പദ്ധതിയിടുന്നുണ്ട് എന്നും, ഈ എക്സിക്യൂട്ടീവ് ഓര്‍ഡര്‍ ബഹിരാകാശത്ത് വ്യവസായികാടിസ്ഥാനത്തിലുള്ള റിയല്‍ എസ്റ്റേറ്റ്, മൈനിങ് സൈറ്റുകളുടെ ഡെവലപ്പ്മെന്റ് ലക്ഷ്യമിട്ടുള്ളതാണ് എന്നും പ്രസിഡന്റിന്റെ ഡെപ്യൂട്ടി അസിസ്റ്റന്റും നാഷണല്‍ സ്‌പേസ് കൗണ്‍സിലിന്റെ എക്സിക്യൂട്ടീവ് സെക്രട്ടറി വ്യക്തമാക്കി.
ലോകം മുഴുവന്‍ കൊവിഡ് ഭീതിയില്‍ നില്‍ക്കുന്നതിനിടെ ചന്ദ്രോപരിതലത്തിലെ വിഭവങ്ങളുടെ പര്യവേക്ഷണവും വിനിയോഗവും സംബന്ധിച്ച അമേരിക്കന്‍ നയങ്ങളെപ്പറ്റി പ്രതിപാദിക്കുന്ന ഒരു എക്സിക്യൂട്ടീവ് ഓര്‍ഡര്‍ ഒപ്പിടാന്‍ സമയം കണ്ടെത്തിയ പ്രസിഡന്റ് ഡോണള്‍ഡ് ട്രംപിന്റെ നടപടി വലിയ വിമര്‍ശനങ്ങള്‍ക്ക് കാരണമായിരിക്കുകയാണ്.
"
https://www.facebook.com/Malayalivartha
