സ്‌പെയിന്റെ തലസ്ഥാനമായ മാഡ്രിഡില്‍ ബഹുനിലക്കെട്ടിടത്തിലുണ്ടായ സ്‌ഫോടനത്തില്‍ മൂന്നു പേര്‍ മരിച്ചു. നിരവധിപ്പേര്‍ക്ക് പരിക്കേല്‍ക്കുകയും ചെയ്തു. ഗ്യാസ് ചോര്‍ച്ചയാണ് സ്ഫോടനത്തിന് കാരണമായതെന്നാണ് പ്രാഥമിക നിഗമനം.

ബുധനാഴ്ച വലിയ ശബ്ദത്തോടെയാണ് കെട്ടിടത്തില്‍ സ്ഫോടനമുണ്ടായത്. കത്തോലിക്ക സഭയുടെ ഉടമസ്ഥതയിലുള്ളതാണ് കെട്ടിടം. രക്ഷാപ്രവര്‍ത്തകരേയും പോലീസിനേയും സംഭവ സ്ഥലത്ത് വിന്യസിച്ചതായി മാഡ്രിഡ് അടിയന്തര രക്ഷാസേന അറിയിച്ചു.