മലയാളിയുടെ സ്വന്തം നാടന്‍ വാറ്റ് ഇപ്പോൾ ഹിറ്റാണ്..! നമ്മുടെ കോട്ടയത്തോ, കോഴിക്കോട്ടോ അല്ല.. എന്തിന് കേരളത്തിലേ അല്ല... അങ്ങ് കാനഡയിലാണ്.. പേര് മന്ദാകിനി.. !

തരംഗമായ ലണ്ടനിലെ കൊമ്പന്‍ ബിയറിനും അര്‍ലണ്ടിലെ മഹാറാണിക്കും ശേഷം സാമൂഹ്യമാധ്യമങ്ങളില്‍ വൈറലാകുന്നത് ഇപ്പോൾ മന്ദാകിനിയാണ്. കാനഡയില്‍ സ്ഥിരതാമസമാക്കിയ കോതമംഗലം ചേലാട് സ്വദേശികളായ സഹോദരന്‍മാരും മൂവാറ്റുപുഴ സ്വദേശിയുമാണ് ഈ മന്ദാകിനിക്ക് പിന്നിലെ ബുദ്ധികേന്ദ്രം.

കാനഡയിലെ ഒന്റാറിയോ പ്രവിശ്യയില്‍ സര്‍ക്കാരിന്റെ പൂർണമായ അനുവാദത്തോടെയാണ് മന്ദാകിനി വിപണിയില്‍ ഇറക്കിയിരിക്കുന്നത്. മറ്റു രാജ്യങ്ങളിലെ നാടന്‍ മദ്യങ്ങള്‍ രാജ്യാന്തര വിപണിയില്‍ വില്‍ക്കുന്നതു കണ്ടാണ് നമ്മുടെ നാടന്‍ വാറ്റും മാര്‍ക്കറ്റ് ചെയ്തുകൂടെയെന്ന ചിന്ത വന്നതെന്നാണ് മന്ദാകിനിയുടെ നിര്‍മ്മാതാക്കള്‍ പറയുന്നത്.

ഇതേതുടര്‍ന്ന് നാലുവര്‍ഷം നല്ല പഠനവും നടത്തി. ഇവര്‍ റെസീപ്പി തയ്യാറാക്കി ഡിസ്റ്റലറിയില്‍ നല്‍കിയിരുന്നു. പുറത്തുള്ള ഡിസ്റ്റലറിയിലാണ് മന്ദാകിനി ഇവര്‍ നിര്‍മ്മിക്കുന്നത്. 46 ശതമാനമാണ് മന്ദാകിനിയിലുള്ള ആല്‍ക്കഹോളിന്റെ അളവ് എന്നത്.

കേരളത്തിലെ പാരമ്പര്യമുള്ള നല്ല വാറ്റുകാരുടെ നാടന്‍ വിദ്യകള്‍ സമന്വയിപ്പിഎച്ചുകൊണ്ടാണ് മന്ദാകിനിയുടെ നിര്‍മ്മാണമെന്നാണ് സംരഭകരുടെ വാദം എന്നത്. കരിമ്പാണ് വാറ്റുന്നതെന്നും കമ്പനിയുടെ വെബ്‌സൈറ്റില്‍ വ്യക്തമാക്കുന്നുണ്ട്. മന്ദാകിനി മലബാറി വാറ്റ് എന്നാണ് ബോട്ടിലിന്റെ പുറത്തെ ലേബലിൽ കാണുവാൻ സാധിക്കുന്നത്.

അതോടൊപ്പം തന്നെ ഹെന്‍ഡ്രിക് വാന്‍ റീഡിന്റെ ഹോര്‍ത്തുസ് മലബാറിക്കസില്‍ നിന്ന് പ്രചോദമുള്‍ക്കൊണ്ടും മലബാര്‍ മേഖലയില്‍ സുലഭമായ നാടന്‍ വാറ്റിനെ ഓര്‍മിപ്പിക്കുന്ന വിധത്തിലുമാണ് മന്ദാകിനിയുടെ നിര്‍മാണവുമെന്ന് വെബ്സൈറ്റില്‍ കാണിക്കുന്നുണ്ട്.

അതേസമയം 39.95 കനേഡിയന്‍ ഡോളറാണ് മന്ദാകിനിക്ക് കാനഡയില്‍ ഉള്ള വില. അതായത് 2300 ഇന്ത്യന്‍ രൂപ. കാനഡയിലെ വോണ്‍ ഒന്റാറിയോയിലെ ഡിസ്റ്റിലറിയിലാണ് മന്ദാകിനി നിലവിൽ ഉത്പാദിപ്പിക്കുന്നത്. കാനഡയ്ക്ക് പുറമെ അമേരിക്കയിലും യുകെയിലും മന്ദികിനിക്ക് ആവശ്യക്കാർ ഏറെയാണ്. എന്നാൽ സമൂഹമാധ്യമങ്ങളിൽ വൈറലായ മന്ദാകിനിക്ക് കേരളത്തിലും ആവശ്യക്കാർ ഏറെയാണ്.