ഇസ്ലാമിക് സ്റ്റേറ്റില്‍ ചേര്‍ന്നതില്‍ ഇന്ന് ദു:ഖിക്കുന്നതായി സംഘടനയില്‍ നിന്നും പുറത്തുവന്ന ഷമീമ ബീഗം വ്യക്തമാക്കി. ഐഎസില്‍ ഇത്തരമൊരു സംസ്കാരമാണെന്ന് തനിക്കറിയില്ലായിരുന്നുവെന്നും ഇത് ഒരു ഇസ്ലാമിക സമൂഹമാണെന്നാണ് താന്‍ കരുതിയതെന്നും ഷമീമ പറഞ്ഞു.

ഭീകര സംഘടനയില്‍ ചേരാനായി സിറിയയിലേക്ക് പോയതിനെ തുടര്‍ന്ന് ഇവര്‍ക്ക് പൗരത്വം നഷ്ടപ്പെടുകയായിരുന്നു. സമൂഹത്തിന് ഉപയോഗപ്രദമാകുന്ന കാര്യങ്ങള്‍ തനിക്ക് ചെയ്യണമെന്നും ഭീകരവാദത്തിനെതിരെ പോരാടാന്‍ യുകെയെ സഹായിക്കുമെന്നും യുവതി വ്യക്തമാക്കി.

'ഹൃദയത്തിന്റെ അടിത്തട്ടില്‍ നിന്ന് താന്‍ ക്ഷമ ചോദിക്കുന്നു. യുകെയിലെ നീതിന്യായ വ്യവസ്ഥയെ അഭിമുഖീകരിക്കാനുള്ള അവസരത്തിനായി പ്രധാനമന്ത്രി ബോറിസ് ജോണ്‍സണോട് അപേക്ഷിക്കുന്നു.

യുകെ കോടതിയില്‍ വിചാരണ നടത്തി നല്‍കുന്ന ഏത് ശിക്ഷയും സ്വീകരിക്കാന്‍ താന്‍ തയ്യാറാണ്. ഇനി ഐഎസിലേക്ക് മടങ്ങുന്നതിനേക്കാള്‍ ഭേദം മരിക്കുന്നതാണ്. താന്‍ ഒരു അമ്മയും ഭാര്യയും മാത്രമാണ്.' ഷമീമ പറഞ്ഞു.

ഒരു വര്‍ഷത്തിലേറെയായി ഹിജാബ് ധരിക്കാറില്ലെന്നും അത് സ്വയം മാറ്റുകയായിരുന്നുവെന്നും യുവതി പറഞ്ഞു. ഹിജാബില്‍ വളരെയധികം സങ്കോചം തോന്നിയിരുന്നുവെന്നും അത് താനല്ലെന്ന് പോലും തോന്നിയതായും ഷമീമ പറഞ്ഞു.